გვინდა მოგიყვეთ — თაზო კვაჭაძეზე, ნიჭიერ, მიზანდასახულ და მრავალმხრივი შესაძლებლობებით გამორჩეულ ახალგაზრდაზე, რომელმაც თავისი შრომითა და მონდომებით უკვე არაერთ მნიშვნელოვან წარმატებას მიაღწია. სასკოლო წლები ზოგისთვის მხოლოდ გაკვეთილებს, გამოცდებსა და შეფასებებს უკავშირდება, ზოგისთვის კი სწორედ ეს წლები ხდება საკუთარი შესაძლებლობების აღმოჩენისა და დიდი მომავლის საფუძველი. თაზოსთვის სკოლა სწორედ ასეთი მნიშვნელოვანი ეტაპი აღმოჩნდა.წარმოშობით ლესელი ბიჭი თბილისში სწავლობდა.  სკოლა ოქროს მედალზე დაამთავრა. მისი ნიშნების ფურცელი წლების განმავლობაში მხოლოდ უმაღლესი  10-ქულიანი შეფასებებით იყო გამორჩეული. თუმცა თაზოს წარმატება მხოლოდ აკადემიური მოსწრებით არ შემოიფარგლებოდა.ორი წლის განმავლობაში ის სკოლის თვითმმართველობას ხელმძღვანელობდა, აქტიური საზოგადოებრივი ცხოვრებით გამოირჩეოდა და სკოლამ მისი განსაკუთრებული ჩართულობა სპეციალური ჯილდოთიც დააფასა.
მისი ცოდნისა და ინტელექტუალური შესაძლებლობების შესახებ კი მიღწევების შთამბეჭდავი ჩამონათვალიც მეტყველებს.
„კინგსის“ მათემატიკის კონკურსში მან ოთხჯერ მესამე ხარისხის ჯილდო მოიპოვა, ინგლისურის მიმართულებით _ ორი ვერცხლის მედალი, ქართულში კი ორი ვერცხლისა და ერთი ოქროს ხარისხის მფლობელი გახდა. გამარჯვებით დაასრულა „ვუნდერკინგის“ ფინალი.
განსაკუთრებული აღნიშვნის ღირსია პროექტ „რობინსონში“ მისი მონაწილეობაც _ რეგიონული მათემატიკის ნაკრები გუნდის ნომინაციაში ვერცხლის მედალი და 47/50 ქულა. წარმატებით იასპარეზა მათემატიკის საერთაშორისო ოლიმპიადაზეც.
თაზომ დაამთავრა თბილისის სახელმწიფო უნივერსიტეტის ბავშვთა ინტელექტუალური საკვირაო სკოლა. „ნაუტილუსის“ კონკურსში ქართულ ენასა და ლიტერატურაში ქვეყნის მასშტაბით მეხუთე ადგილი დაიკავა.
ის აქტიურად მონაწილეობდა საუნივერსიტეტო პროგრამებში, კონფერენციაში „ტოტალიტარიზმი და ეპოქა“ და არაფორმალური განათლების ფორუმში.
მაგრამ თაზოს ისტორია მხოლოდ წიგნებით, ფორმულებითა და მაღალი ქულებით არ იწერება. მისი ინტერესები გაცილებით ფართოა.
სკოლის ბიზნესფორუმზე მან 1500-ლარიანი გრანტი მოიპოვა და „საუკეთესო ჯუნიორის“ ტიტულიც დაიმსახურა. ეს კიდევ ერთი დასტურია იმისა, რომ ცოდნასთან ერთად მას იდეების განხორციელების, პასუხისმგებლობის აღებისა და ლიდერობის უნარიც აქვს.
შთამბეჭდავია მისი შემოქმედებითი გზაც _ შვიდი წლის განმავლობაში იყო ქართულ ცეკვის ანსამბლის წევრი და ამ სფეროშიც არაერთი პირველი ადგილი აქვს მოპოვებული.
ასეთი მრავალფეროვანი გამოცდილება იშვიათად იყრის თავს ერთი ახალგაზრდის ბიოგრაფიაში.
დღეს თაზო უკვე ახალი ცხოვრების ეტაპზეა. წარმატებული სასკოლო წლების შემდეგ მან სწავლა საქართველოს საზოგადოებრივ საქმეთა ინსტიტუტში (GIPA), ბიზნესის ადმინისტრირების მიმართულებით გააგრძელა.
ეს უკვე ახალი გზაა — უფრო დიდი გამოწვევებით, მეტი პასუხისმგებლობითა და, ალბათ, კიდევ უფრო დიდი გამარჯვებებით.
როცა სოფლის შვილი წარმატებას აღწევს, მისი გამარჯვება მხოლოდ ერთი ადამიანის გამარჯვება აღარ არის. ის ოჯახის, სოფლისა და იმ ადამიანების საერთო სიხარულად იქცევა, ვინც მის მომავალს გულშემატკივრობს.
თაზო კვაჭაძის გზა გვახსენებს, რომ დიდი მიზნების მისაღწევად მთავარი მხოლოდ ნიჭი არ არის. ნიჭს სჭირდება შრომა, დისციპლინა, მიზანდასახულობა, საკუთარი თავის რწმენა და სურვილი, რომ გუშინდელ საკუთარ თავზე უკეთესი გახდე.
თაზოს ეს ყველაფერი უკვე აქვს.
და ამიტომაც, ალბათ, დღევანდელი წარმატებები მისთვის საბოლოო შედეგი კი არა, დიდი მომავლის პირველი ნაბიჯებია.
სოფელ ლესიდან წამოსულ ნიჭიერ ახალგაზრდას წინ კიდევ ბევრი გზა, ბევრი შესაძლებლობა და ბევრი მწვერვალი ელოდება.
 ვუსურვებთ თაზოს იაროს წინ, არ დაკარგო ის შემართება, რომელმაც აქამდე მოიყვანა. ვუსურვებთ ჯანმრთელობას, ბედნიერებას, მიზნების ასრულებას, წარმატებულ სტუდენტობასა და კიდევ უფრო დიდ გამარჯვებებს.