არიან ადამიანები, რომლებიც ცხოვრებას ფერებით, სითბოთი და სიკეთით ავსებენ. მათთვის მხატვრობა მხოლოდ პროფესია არ არის – ეს მათი ცხოვრების წესია, მათი სული და მათი სათქმელია. სწორედ ასეთ ხელოვანთა შორის ღირსეულ ადგილს იკავებს მხატვარი მარინა ჭყონია.
მარინა ჭყონია 1964 წლის 30 ნოემბერს დაიბადა. მისი ცხოვრების გზა პატარა გურული სოფლიდან – აცანიდან – დაიწყო. სწორედ აქ დაიბადა პირველი ოცნება, რომელიც წლების შემდეგ დიდ შემოქმედებით სამყაროდ იქცა. სკოლის დასრულების შემდეგ სწავლა თბილისში, მოსე თოიძის სახელობის სამხატვრო სასწავლებელში განაგრძო და იგი წარჩინებით დაამთავრა. მაშინ უკვე ნათელი იყო, რომ ხელოვნება მისი ცხოვრების მთავარი გზამკვლევი გახდებოდა.
პედაგოგიური საქმიანობა მამათის საშუალო სკოლაში დაიწყო, მოგვიანებით კი აცანის საბავშვო ბაღშიც მუშაობდა. ბავშვებთან ურთიერთობა, მათში შემოქმედებითი ნიჭის აღმოჩენა და ხელოვნების სიყვარული მისი ყოველდღიურობის განუყოფელი ნაწილი გახდა. თუმცა, პარალელურად, საკუთარი შემოქმედებითი გზაც თავდაუზოგავად გააგრძელა.1998 წელს მარინა ჭყონია საცხოვრებლად სანქტ-პეტერბურგში გადავიდა. უცხო გარემოშიც არ დაუკარგავს საკუთარი ხელწერა და შემოქმედებითი ენერგია. მუშაობდა მხატვრად, ხოლო ცოდნის გაღრმავების სურვილმა სანქტ-პეტერბურგის სამხატვრო აკადემიამდე მიიყვანა, რომელიც ხელოვნებათმცოდნის სპეციალობით წარმატებით დაამთავრა.მისი ფერწერული ტილოები და გობელენები დღეს უკვე საქართველოს საზღვრებსაც გასცდა. ისინი კერძო კოლექციებში ინახება პოლონეთში, გერმანიაში, საფრანგეთსა და რუსეთში. თითოეული ნამუშევარი კი ავტორის შინაგან სამყაროს, ემოციებსა და ცხოვრებისეულ გამოცდილებას ატარებს.დღეს მარინა ჭყონია ლანჩხუთის ვილი ბარამიძის სახელობის სამხატვრო სკოლაში მოღვაწეობს. იგი არა მხოლოდ ხატვას ასწავლის – მომავალ თაობას შთააგონებს, ასწავლის ფერების დანახვას, სილამაზის აღქმას და საკუთარი შესაძლებლობების რწმენას. სწორედ ამიტომ, მისი მრავალწლიანი პედაგოგიური და შემოქმედებითი საქმიანობა არაერთი დიპლომით, ლაურეატობითა და ჟიურის სპეციალური პრიზით არის დაფასებული. შემოქმედებითი ძიება მისთვის არასოდეს შეწყვეტილა. სხვადასხვა შემოქმედებით შეხვედრაზე მიღებული გამოცდილება, დაზგური გრაფიკის დაუფლება მის ხელოვნებას კიდევ უფრო მრავალფეროვანსა და ღირებულს ხდის.
მარინა ჭყონია საქართველოს მხატვართა კავშირის წევრია. მისი შემოქმედება კიდევ ერთხელ ადასტურებს, რომ ნიჭი, შრომა და საქმის სიყვარული ყოველთვის პოულობს ღირსეულ აღიარებას.  ამჯერად იგი პერსონალური გამოფენისთვის ემზადება. ეს იქნება კიდევ ერთი მნიშვნელოვანი ნაბიჯი ხელოვანის ცხოვრებაში, რომელმაც საკუთარი გზა მონდომებით, დაუღალავი შრომითა და ხელოვნების უსაზღვრო სიყვარულით შექმნა. მარინა ჭყონია მხოლოდ ნიჭიერი მხატვარი კი არ არის – იგი ღირსეული პედაგოგი, მოსიყვარულე მეუღლე, მზრუნველი დედა და კეთილშობილი ადამიანია. სწორედ ასეთი ადამიანები ამდიდრებენ ჩვენს კულტურას, შთააგონებენ მომავალ თაობებს და საკუთარი შემოქმედებით დროს უტოვებენ უკვდავ კვალს.  ვუსურვებთ ქალბატონ მარინა ჭყონიას ჯანმრთელობას, შემოქმედებით შთაგონებას, წარმატებულ პერსონალურ გამოფენას და კიდევ ბევრ ფერწერულ შედევრს, რომლებიც მის სახელს ქართული ხელოვნების ისტორიაში კიდევ უფრო გამორჩეულად დაამკვიდრებს