ზოგჯერ ადამიანის ცხოვრებაში არის ადგილი, რომელიც არასოდეს ავიწყდება. ადგილი, სადაც პირველად გადადგა პროფესიული ნაბიჯი, სადაც პირველად ირწმუნა საკუთარი შესაძლებლობების და სადაც მის მომავალს საფუძველი ჩაეყარა. ქეთა ტრაპაიძისთვის ასეთი ადგილი ჩვენი რედაქცია — „ჰო და არა“ გახდა.  ქეთა სრულიად ახალგაზრდა მოვიდა ჩვენთან. მაშინ, როდესაც ჟურნალისტიკა მისთვის  დიდი, საინტერესო და საპასუხისმგებლო სამყარო იყო, მან პირველი პროფესიული ნაბიჯები სწორედ ჩვენს რედაქციაში გადადგა. დღეს, როცა ვუყურებ მის განვლილ გზას, მიღწევებსა და შემოქმედებით წარმატებებს, განსაკუთრებული სიხარულით ვიხსენებთ იმ დროს, როცა მისი პროფესიული ცხოვრების დასაწყისის თანამონაწილენი გავხდით.ყველაზე მეტად კი ის მახარებს, რომ ქეთას ახსოვს თავისი პირველი ნაბიჯები და მადლიერებით იხსენებს რედაქციას, რომელმაც მას კარი გაუღო. ეს მადლიერება უბრალო სიტყვებზე მეტია — ეს არის ადამიანური ურთიერთობის, პატივისცემისა და იმ უხილავი კავშირის გამოხატულება, რომელიც დროსა და მანძილს უძლებს. 
  დღეს ქეთევან ტრაპაიძე მრავალმხრივი შემოქმედებითი ინტერესების მქონე პიროვნებაა. ჟურნალისტი, მწერალი, პოეტი, პროზაიკოსი და კომპოზიტორი — ადამიანი, რომლის საქმიანობაც სხვადასხვა ხელოვნების სფეროს აერთიანებს. მას უმუშავია სხვადასხვა ტელევიზიაში, მიჰყავდა საავტორო გადაცემა, გამოცემული აქვს წიგნი „აფეთქებული ბროწეულები“, მიღებული აქვს შემოქმედებითი და საზოგადოებრივი აღიარება. 
მნიშვნელოვანია ისიც, რომ ქეთას პროფესიული ინტერესები მხოლოდ ჟურნალისტიკითა და ლიტერატურით არ შემოიფარგლება. მის ცხოვრებაში განსაკუთრებული ადგილი უკავია მუსიკას, ხელოვნებასა და საზოგადოებრივ საქმიანობას. ეს მრავალფეროვნება კი მის პიროვნებას საკუთარ ხასიათსა და შემოქმედებით სახეს სძენს.
  სასიხარულოა, როცა ადამიანი, რომელმაც პირველი ნაბიჯები ჩვენს რედაქციაში გადადგა, შემდეგ საკუთარ გზას პოულობს, იზრდება, ვითარდება და წარმატებას აღწევს. ასეთ დროს გრძნობ, რომ შენს შრომასაც ჰქონია თავისი წილი სხვისი მომავლის შექმნაში.
ქეთა, გისურვებ, არასოდეს დაგკარგვოდეს შემოქმედებითი ცეცხლი, სიტყვის ძალა, მუსიკის სიყვარული და საკუთარი შესაძლებლობების რწმენა.
 დაე, შენი კალამი კიდევ დიდხანს ემსახურებოდეს სიმართლეს, შენს პოეზიასა და პროზას კიდევ ბევრი მკითხველი ჰყავდეს, შენს მუსიკას კი — მსმენელი. 
ადამიანის ნამდვილი წარმატება მხოლოდ მიღებული წოდებებით არ იზომება. ის იმ გზითაც ფასდება, რომელსაც გადის, იმ ადამიანებითაც, რომლებიც ახსოვს და იმ მადლიერებითაც, რომელსაც წლების შემდეგაც ინარჩუნებს.
ჩვენთვის განსაკუთრებით სასიხარულოა, რომ ქეთა ტრაპაიძეს ახსოვს, საიდან დაიწყო მისი პირველი ჟურნალისტური ნაბიჯები.
                                                                                                    ჰო და არა