ჩვენ უბრალო ხალხი ახლა უკრაინელები ვართ, ჩვენს პატარა ქალაქში სადაც არ უნდა გაიაროთ ყველა იმაზე ლოცულობს ულამაზესი უკრაინელი ხალხი ამ ომში არ დამარცხდეს, საჯარო მოხელეთა დიდი ნაწილი საკუთარ პოზიციას ჯერ კიდევ არ აფიქსირებს, მთავრობას შესციცინებს თვალებში, ის რას იტყვის, მერე გავიმეორებო. ჭური ხომ იცი რაფერია, რომ ჩასძახებ იგივეს ამოგძახებს ეს ამბავი გურიაშიც იცის ყველამ და მთელს საქრთველოშიც. აგენს მისმა მწყემსმა უნდა ჩასძახოს სხვისი არ ეყურებიენო ხუმრობენ გურიში (ზოგიერთებთან ბოდიში...).
მარტის სუსხიან დღეებში გმირი უკრაინელი ხალხი სიცოცხლის ფასად ებრძვის ერთმორწმუნე საშინელ აგრესორს. თითქოს მარტმა ჯინაზე გამოაჩინა თავისი კლანჭები, ტემპერატურა დავარდა, დედაქალაქში თოვს, დასავლეთში კი კოკისპირული წვიმებია. ქუჩაში შეყვარებულ წყვილებსაც კი ვეღარ დაინახავთ, სახე აღარავის უღიმის, მეგობარ ქვეყანაში ომია.
_რუსი რაცხაა ახლა გეიგეთ ხომ? მეიტეხს პუტინი კისერს უკრაინაში, აგერ დეინახავთ თუ არა! _ ამხნევებენ ერთმანეთს ლანჩხუთელები.შენს პირს შაქარიო, დააყოლებს ვიღაცა და მერე იწყება იმის მოყოლა, ვინ რა ინფორმცია მოისმინა.
დღეს ჩვენ ყველა უკრაინელები ვართ, ინფორმციები კი ძალიან მძიმეა, არ მინდა გული დავუმძიმო ისედაც გულდამძიმებულ მკითხველს, მაგრამ ვიცი, რომ ახლა ყველა ტელეეკრანებთანაა მიჩიჩინებული რამე დამაიმედებელი ამბავი მოვისმინოო. ლაღი და აღმავლობისკენ მიმავალი უკრაინა დღეს რუსული აგრესიის ქარცეცხლშია გახვეული, ომი ის საშინელი ლოდია, რომლის გადაგორებასაც ეს მამაცი ხალხი ცდილობს.
...ამ ყველაფერს კი მოჰყვა, რუსეთის მოქალაქეების აქტიურად შემოსვლა სქართველოში. ორიოდე დღის წინ თავად ვიმგზავრე თბილისი ბათუმის სამარშუტო ავტობუსით, რომელიც სავსე იყო ჩემოდანაკიდებული რუსებით. მაგათ ჩემოდანი დაანახე და ყველგან წავლენ, ჩაილაპარაკა მძღოლმა. ამასობაში ჩემმა ტელეფონმაც დარეკა და პასუხი გავეცი. რაზგავარივაიტე პო ტიხონკუ - ჭკუა დამარიგა რუსმა, თუმცა მერე ჭკუის დარიგება თავადაც მიიღო.
ამ რთულ დღეებში ვრცელდება ინფორმაცია, რუსული ორგანიზაციის ალტ-ინფოს ოფისის გახსნის შესახებ, თუმცა რამდენიმე რეგიონში მან ფეხის მოკიდება ვერ შესძლო, რაც შეეხება ჩვენს მეზობელ ოზურგეთს, გავრცელებული ინფორმაციით ალტ-ინფოს ოფისი დღე-დღეზე გაიხსნება, მასთან დაკავშირებული პირები ცნობილია, რომელთა შორის ერთი მღვდელია. ლანჩხუთშიც ასევე სახელდება პიროვნებები, რომლებიც ალტ-ინფოს სახელთანაა დაკავშირებული, რაც შეეხება ფართს, რომელსაც დაიქირავებენ, ამის შესახებ ინფორმაცია ჯერ არ გვაქვს, მხოლოდ ის ვიცით, რომ ვისაც დაურეკეს ფართი არავინ მიაქირავა. ამაზე ლანჩხუთში ბევრი საუბრობს: ,,არავინ მიაქირავა ფართი და ჰაერში თუ გამეეკიდებიან ქე დევინახავთ მაგასაც, ქვესკნელში წევიდენ ჯობია, სანამ კიდო რუსეთს ახსენებდნენ.”
ბოლო დროის კიდევ ერთი ამბავი:-გავრცელდა ხმები, მაღაზიებში პროდუქტის დეფიციტის შესახებ. ადამიანები მარკეტებს მიაწყდნენ, ლანჩხუთის ზოგ მაღაზიაში შაქარი სართოდ არ იყიდებოდა, თუმცა აღმოჩნდა, რომ ქვეყანაში რეალურად შაქრის დეფიციტი არ ყოფილა.
საინტერესოა - ერთი ოჯახი რამდენ კილოგრამს, ან ტომარა შაქარს იყიდის და დაიდებს მარაგად... სატირალია ეს ყველაფერი, სასაცილო რომ არ იყოს....
,,მეგობრებო, შაქარი არის მაღაზიებში და იყიდება.... ტყუილად, ნაადრევად დაგირჩათ ნაყიდი და გადანახული. შაქარი არ გეყოფად ყველაფრად, მისგან ვერ მოამზადებთ გემრიელ კერძს და სჯობს, დაუტოვეთ სხვებსაც, რომ იყიდონ...
ფუღუსავით წინასწარ არ ღირს თვალების დათხრა. სახლში მაქვს 5 კილოგრამი შაქარი და ვინმეს თუ დაგჭირდებათ, შემიძლია გაგიყოთ ან, სულ დაგითმოთ.“ წერს სოცილურ ქსელში ფეისბუქმომხმარებელი იამზე ჩხაიძე
ამასობაში გაზაფხულიც ნელ-ნელა გვეპარება, მიუხედავად უამინდობისა ახლა ადამიანები აქტიურად ცდილობენ დაიჭირონ თადარიგი ხვნა-თესვის დაწყებისათვის, მოგეხსენებთ, რომ სასოფლო-სამეურნეო ტექნიკის იმედი ნაკლებად უნდა გქონდეს, დედაქლაქიდანაც ბევრი ჩამოდის და უბრუნდება მამაპაპისეულ კერას. ეკონომიკური კრიზისი, უსახსრობა და მეზობელ ქვეყნაში ომი, ეს ჩვენი დილემაა, მთავარი კი იასაა, უკრაინა არ დამარცხდეს ამ ომში!
ახლა ყველას საფიქრალი ერთია, არ დამარცხდეს უკრაინა ამ სასტიკ ომში
მაია კუკულაძე
განყოფილება: საზოგადოება
გადასვლები: 978
