არსებობენ ადამიანები, რომელთა საქმიანობა მხოლოდ პროფესიული მოვალეობის შესრულება არ არის. ისინი საკუთარ საქმეს სიყვარულით, პასუხისმგებლობითა და ადამიანებისადმი განსაკუთრებული დამოკიდებულებით ემსახურებიან. სწორედ ასეთი ადამიანია ნინო სალარიძე, რომელიც უკვე წლებია სოფელ ნიგოითში გაზეთ „ჰო და არას“ ერთგული გამავრცელებელია.ნინო იმ ადამიანთა რიცხვს მიეკუთვნება, ვისთვისაც მიცემული სიტყვის შესრულება და საქმის პატიოსნად კეთება ცხოვრების წესია. მას უყვარს თავისი საქმე და წლების განმავლობაში ერთგულად ემსახურება გაზეთსა და მის მკითხველებს. გაზეთი დროულად მიაქვს თითოეულ ოჯახამდე, რათა არც ერთმა მკითხველმა არ დააგვიანოს მისთვის საინტერესო ამბების გაცნობა. სოფელში ყველა იცნობს, აფასებს და სიყვარულით ელოდება. ნინოს გამოჩენა ოჯახების ჭიშკართან ყოველთვის სასიამოვნო შეხვედრაა, რადგან მასთან ერთად ადამიანებთან სითბო, ღიმილი და სიკეთეც მიდის.ნინო მხოლოდ ერთგული თანამშრომელი არ არის. ის შრომისმოყვარე, კეთილი და სტუმართმოყვარე ადამიანია. ოჯახთან ერთად სოფლის მეურნეობასაც მისდევს, ცდილობს წინსვლას, ოჯახის კეთილდღეობასა და წარმატებას. ჰყავს კარგი მეუღლე და ვაჟი, რომელთა გვერდითაც ქმნის სიყვარულითა და ურთიერთპატივისცემით სავსე ოჯახს.
მისი სახლის კარი მეგობრებისთვის, მეზობლებისა და ნათესავებისთვის მუდამ ღიაა. ნინო პურმარილიანი მასპინძელია, უყვარს ადამიანებთან ურთიერთობა, ყურადღების გამოჩენა და სტუმრის გულით მიღება. მის ხასიათში განსაკუთრებულად იგრძნობა ის უბრალოება და ადამიანური სითბო, რომელიც დღეს ასე ძვირფასი და დასაფასებელია.
 გაზეთ „ჰო და არას“ რედაქციისთვის ნინო სალარიძე მხოლოდ გაზეთის გამავრცელებელი არ არის — ის ჩვენი გუნდის ერთგული წევრი, საიმედო მეგობარი და თანამოაზრეა. ჩვენ ვაფასებთ მის მრავალწლიან შრომას, პასუხისმგებლობასა და იმ სიყვარულს, რომლითაც ყოველდღიურად ემსახურება საკუთარ საქმეს.
გვინდა, ეს სიკეთით სავსე, მშრომელი და ერთგული ადამიანი კიდევ მრავალი წელი იყოს ჩვენს გვერდით, ჩვენთან ერთად იშრომოს და თავისი კეთილი საქმე გააგრძელოს.
ძვირფასო ნინო,  გულითადად გისურვებთ ჯანმრთელობას, დღეგრძელობას, ოჯახურ ბედნიერებას, თქვენს მეუღლესა და შვილს წარმატებებს, წინსვლასა და ყოველივე საუკეთესოს.
 გაიხარე, ჩვენო ნინო! გვიყვარხარ, გვეიმედები და ვაფასებთ შენს ერთგულებას!                                                                                     
                                                                                           ,,ჰო და არას“ რედაქცია