დაპირისპირებისა და რყევების პირობებში მყოფი ჩვენი ქვეყანა ადგილობრივი ხელისუფლების წინასაარჩევნო მარათონს სულ მალე იწყებს. პანდემია ფასების კრიტიკულ ნიშნულამდე ზრდა და სიღატაკის გეომეტრიული პროგრესიით მატება დიდი ხანია დომინირებს. ჩვენ ვსვამთ შეკითხვებს მათთვის, ვინც აქტიურადაა ჩართული საზოგადოებრივ ცხოვრებაში, ვინც ფიქრობს და გამოაქვს დასკვნები: წინ მივდივართ თუ უკან?! დავშორდით თუ ვუახლოვდებით ჩვენი ქვეყნის უკეთესი მომავლის ზღურბლს?!
ამჯერად ჩვენი კითხვების ადრესატია ლანჩხუთის წინა მოწვევის საკრებულოს წევრი ,,ნინო ბურჯანაძე-დემოკრატიული საქართველოდან“, ექიმი ნონა მურვანიძე._ ქალბატონო ნონა, თქვენ ბრძანდებოდით, წინა მოწვევის ლანჩხუთის საკრებულოს წევრი. თქვენი თვალით დანახული იმ პრობლემათაგანი, წინა მოწვევის ხელისუფლების პერიოდში, რომელი მოგვარდა და რა არის ის, რაც დღემდე რჩება მოუგვარებელი?! რა არის ის მთავარი კითხვა, რომელსაც ვერც ერთმა ხელისუფლებამ ვერ უპასუხა?_ იყო ძალადობა? _ დასრულდა ხელისუფლების ცვლილებით. 2012 წელს ,,ქართული ოცნება“ ხელისუფლებაში მოვიდა დაპირებების კორიანტელით, არადა ეს კორიანტელი უკვე მართლა საოცნებოა. უპირატესი სამართლის აღდგენა იყო, მივიღეთ შერჩევითი სამართალი, რაც ანგრევს ქვეყნის დემოკრატიულ გზაზე სვლას; გვქონდა უმუშევრობა, მივიღეთ ტოტალური უმუშევრობა, გაღატაკებული მოსახლეობა.
ხელისუფლებაში ყოფნის მე-9 წელს ისევ არაფორმალური მმართველობა, დაკნინებული სახელმწიფო ინსტიტუტები; პოლიტიზირებული სასამართლო; პოლიტიზირებული პოლიცია; უცხოეთში ლუკმა პურის საშოვარზე, მონური შრომისთვის გამეტებული ჩვენი მოქალაქეები, მოშიმშილე ბავშვები და მოზარდები; მოსახლეობის სრული ნიჰილიზმი. დაბალი სამოქალაქო პასუხისმგებლობა, ისეთი რომ ამომრჩეველს ,,მამა-მარჩენალის“ დაკარგვა უფრო აშინებს, თანახმაა ყოველთვის აირჩიოს და მას აამოს. არ ვიცი რა გითხრათ, თქვენც არანაკლებ პრობლემას ჩამოთვლით, რომლის გამოსწორება პირველ რიგში ჩვენ უნდა მოვინდომოთ.
ჩვენმა დაქირავებულმა მთავრობამ უნდა იგრძნოს ყოველი შეუსრულებელი დაპირების, კანონის უგულებელყოფის, ხალხის გადახდილი ფულის არასწორად ხარჯვის დასასრული პოლიტიკური სანაგვეა.
თქვენი კითხვის პასუხად _ მთავარი კითხვა ბევრია, მაგრამ ვფიქრობ, ერთ-ერთი უმთავრესია _ გვაქვს კი დეცენტრალიზებული თვითმმართველობა? ეს ვერტიკალია მათი ხელისუფლებაში ყოფნის გახანგრძლივების ერთ-ერთი ბერკეტი.
_ ლანჩხუთის საკრებულოს წინა სხდომაზე თქვენ იყავით ჩაწერილი ჩოჩხათი-გულიანის გზის პრობლემებთან და ინერტული მასალის გატანასთან დაკავშირებით. კონკრეტულად რა კითხვები დასვით და რა პასუხები მიიღეთ?!
_ სოფელ ჩოჩხათს დიდი პრობლემა აქვს. გულიანი-ჩოჩხათი-შრომისუბანი-სუფსის 11 კილომეტრიანი ასფალტირებული გზა ხალხის ძალისხმევით, მრავალგზის პიკეტირებით მიღწეული შედეგი იყო. რამდენიმე წელიც ვერ შევინარჩუნეთ ეს გზა. შრომისუბანი-სუფსის მონაკვეთი დანგრეული და განადგურებულია. ასფალტი აღარ არსებობს. მიზეზი ხრეშის მძიმეწონიანი მანქანებით მოძრაობაა. ყველაზე დიდი პრობლემა მოედანს, ხორეთს დაუდგება არცთუ გრძელვადიან პროგნოზში და მიზეზი მდინარე სუფსიდან სველი წესით ხრეშის ამოღება-გატანა იქნება. ინგრევა მდინარის კალაპოტი, რაც იწვევს მიწის ქანების დაწევას და ოდა-სახლების დაბზარვას. ისედაც ვერავინ აკეთებს ახალს და მამაპაპისეულ სახლები ენგრევათ. არავინ კითხულობს, რატომ ექცევიან სოფელს ასე უღმერთოდ, არავინ ყავს ქომაგი.
_ წინასაარჩევნო მარათონი მალე გაჩაღდება, იქნებით თუ არა ჩართული და სად მოიაზრებთ საკუთარ თავს?
_ დღეს ყველას მართებს საარჩევნოდ ჩართვა. ,,ერთიანი საქართველო დემოკრატიული მოძრაობა’’ იღებს მონაწილეობას თვითმმართველობის არჩევნებში.
_ ბოლო მოვლენების შესახებ მინდა გკითხოთ. მთელი საქართველო ლამის წალეკა ჰომოფობიურმა მოწოდებებმა და მოხდა ის, რაც მოხდა. როგორ ფიქრობთ, იყო თუ არა ეს წინასაარჩევნო ტრიუკი, განსაკუთრებით კი რეგიონებისათვის, მოგეხსენებათ, რომ 5 ნოემბერს დიდი აქტიურობით გამოირჩეოდნენ რეგიონებიდან ჩაყვანილი ჰომოფობიური ჯგუფები, რომლებიც მრევლს უწოდებენ თავის თავს.
_ მთავრობის მიერ ჰომოფობიური განცხადებების წახალისებამ მოგვცა ის სავალალო შედეგი, რაც 5-6 ივლისს განვითარდა. სრულად ვემიჯნები და ვგმობ ძალადობას. საშინელი ტრაგედიაა ჟურნალისტის ძალადობრივი მკვლელობა, სხვა რამეს ვერ დავარქმევ მის სიკვდილს.
_ როგორ ხედავთ, გაერთიანებული მედიის კამპანია არის თუ არა დიდი გარდატეხის დასაწყისი?
_აღშფოთებული გაერთიანებული მედიის პროტესტია ქვეყანაში ცვლილებების გარდამტეხი და ვუერთდები მათ.
_ როგორია თქვენი შეფასებით წინაასაარჩევნო გარემო ზოგადად და ადგილზე რას ელოდებით? როგორი წყობა იქნება მონაწილე პარტიების გურიაში და ჩვენს რაიონში?
_ რაც შეეხება საარჩევნოდ ჩატარებულ ცვლილებებს, დიდად ნუ გაგვახარებს. მხოლოდ ჟვანიას გადადგომა არაა არჩევნების სამართლიანად ჩატარების პირობა. გაყალბებულ არჩევნებს ყავს ადრესატი, რომელიც უნდა დაისაჯოს.
დღევანდელი მოცემულობით ქართულ ოცნებას მესამე ვადით ხელისუფლებაში დარჩენა სწორედ ამ ჰომოფობიური ჯგუფებისა და კრიმინალების დახმარებით ესახებათ.
რაც შეეხება თქვენს კითხვას გურიასა და და ჩვენს რაიონში არჩევნებში მონაწილე პარტიების წყობასთან დაკავშირებით, ოპოზიცია გაიმარჯვებს საერთო გადაწყვეტილებით დასახელებული კანდიდატით.
მაია კუკულაძე
ნონა მურვანიძე: ამომრჩეველს ,,მამა-მარჩენალის“~ დაკარგვა უფრო აშინებს, თანახმაა ყოველთვის აირჩიოს და აამოს მას
განყოფილება: საზოგადოება
გადასვლები: 956