არქიმანდრიტი მამა იოანე (კვარაცხელია) – სიყვარულით სავსე მოძღვარი, რომლის სინათლეც თითოეულის გულში შედის და სითბოს ტოვებს  

უკვე წლებია, აცანის ეკლესია-მონასტრების წინამძღვარი არქიმანდრიტი იოანე კვარაცხელიაა. მისი მრევლი მხოლოდ აცანის მცხოვრებლებით არ შემოიფარგლება — მასთან სულიერი ნუგეშისა და საზრდოს მისაღებად ადამიანები მეზობელი სოფლებიდან, სხვადასხვა რაიონიდან და საქართველოს სხვადასხვა კუთხიდან ჩამოდიან. მამაოს მსახურება მხოლოდ ტაძრების საკურთხევლითა და წირვა-ლოცვებთ არ შემოიფარგლება. ის ადამიანების ცხოვრების ყველაზე მნიშვნელოვან წუთებში მათ გვერდით დგას. იცის ოჯახების სიხარული და ტკივილი, მათი გაჭირვება, მოლოდინი და იმედი. მამა იოანესთვის მოძღვრობა ადამიანთან ახლოს ყოფნას ნიშნავს. მისთვის არ არსებობს დიდი და პატარა ტკივილი, მნიშვნელოვანი და უმნიშვნელო ადამიანი. თითოეულ ადამიანს თავისი სატკივარი, თავისი გზა და თავისი ჯვარი აქვს, რომელსაც მოსმენა, თანადგომა და ლოცვა სჭირდება. თავის მრევლთან ერთად დაუღალავად შრომობს — აგურს აგურზე დებს, საკუთარი ხელით ქმნის და აშენებს. მაგრამ ეს მხოლოდ  ტაძრების და მონასტრების მატერიალური მშენებლობა არ არის. არის კიდევ ერთი, უფრო დიდი და მნიშვნელოვანი მშენებლობა — ადამიანის სულის. მამა იოანე ადამიანებს იმედს უბრუნებს, აძლიერებს და უფლისკენ მიმავალ გზაზე ამხნევებს. ხშირად სწორედ განსაცდელის დროს სჭირდება ადამიანს ყველაზე მეტად ერთი ადამიანის გვერდით დგომა — ერთი სიტყვა, ერთი ლოცვა, ერთი გულწრფელი: „ნუ გეშინია, მარტო არ ხარ“. ალბათ, სწორედ ამაშია მისი მსახურების განსაკუთრებული ძალა. ის არის სულიერი მამა შვილმკვდარი დედისა და მამისთვის, ობლისთვის, ქვრივისთვის და ყოველი იმ ადამიანისთვის, რომელსაც ცხოვრების რთულ წუთებში დახმარება, თანადგომა და იმედი სჭირდება. აცანის ეკლესია-მონასტრების მოვლა, შენარჩუნება და განვითარება ყოველდღიურ შრომას, ერთგულებასა და სიყვარულს მოითხოვს. ამ საქმეში მამა იოანეს გვერდით მრევლიც დგას — ადამიანები, რომლებიც მასთან ერთად შრომობენ და იმ დიდი საქმის თანამონაწილენი ხდებიან, რომელსაც იგი წლებია ემსახურება. და ალბათ, ეს არის კიდევ ერთი მნიშვნელოვანი რამ, რასაც მისი მსახურება ქმნის — ადამიანებს ერთმანეთთან აახლოებს. ერთ საქმეში აერთიანებს მათ და აჩენს განცდას, რომ ეკლესია მხოლოდ შენობა არ არის; ეკლესია ადამიანთა ერთობაა, სადაც ერთმანეთის ტკივილიც უნდა გაიზიარო და სიხარულიც. მამა იოანეს მსახურებაში განსაკუთრებულად იგრძნობა ერთი რამ — სიტყვასა და საქმეს შორის ერთიანობა. როცა მოძღვარი თავად შრომობს, თავად დგას ადამიანების გვერდით და საკუთარი ცხოვრებით აჩვენებს რწმენის ძალას, მისი სიტყვა კიდევ უფრო ახლოს მიდის ადამიანების გულამდე.

დღეს, როცა ადამიანებს ერთმანეთის მოსმენისთვის ხშირად აღარ სცალიათ, განსაკუთრებით ძვირფასია მოძღვარი, რომელიც არა მხოლოდ გესაუბრება, არამედ გისმენს; არა მხოლოდ გასწავლის, არამედ თავად გიდგას გვერდით; არა მხოლოდ სიტყვით, არამედ საკუთარი შრომითა და ცხოვრებით გაჩვენებს რწმენის ძალას. ჩვენთვის სწორედ ასეთი მოძღვარია მამა იოანე. მისი არსებობა არაერთი ადამიანის ცხოვრებაში იმედთან არის დაკავშირებული. ზოგისთვის მისი სიტყვა რთულ წუთში ნუგეში აღმოჩნდა, ზოგისთვის — ლოცვა, ზოგისთვის კი უბრალოდ იმის ცოდნა, რომ საჭირო დროს მასთან მისვლა და საუბარი შეეძლო. ალბათ, მოძღვრის მსახურების ერთ-ერთი ყველაზე დიდი საზომიც სწორედ ეს არის — რამდენ ადამიანს დაეხმარე, რომ განსაცდელის მიუხედავად გზა გაეგრძელებინა; რამდენ ადამიანს დაანახე, რომ სასოწარკვეთილებაში გამოსავალიც არსებობს და სულიერი ძალის პოვნაც შესაძლებელია. უფლის დიდი წყალობაა, რომ ლანჩხუთის მუნიციპალიტეტს, სოფელ აცანას, ჰყავს ასეთი მოძღვარი — ადამიანი, რომელიც საკუთარ მსახურებას მხოლოდ სიტყვით კი არა, ყოველდღიური შრომით, სიყვარულითა და თავდადებით ასრულებს. მამაო, მადლობა იმისთვის, რომ ხართ ჩვენს გვერდით.მადლობა თქვენი მოთმინებისთვის, შრომისთვის, ლოცვისთვის, სიყვარულისა და იმედისთვის, რომელსაც ადამიანებს აძლევთ. მრავალჟამიერ თქვენს მსახურებას! უფალმა დიდხანს, ჯანმრთელად და მხნედ გვიმყოფოს თქვენი თავი — ჩვენს სულიერ მამად, მოძღვრად და იმ ადამიანად, რომლის გვერდით ყოფნაც არაერთ ჩვენგანს ძალას აძლევს. თქვენი არსებობით არაერთ ადამიანს პირდაპირი მნიშვნელობით დაუბრუნდა ცხოვრების გაგრძელების ძალა. თქვენ მაგალითი ხართ თითოეული იმ ადამიანისთვის, ვინც დღეს ან მომავალში გადაწყვეტს, გზა ღვთის ტაძრისკენ გააგრძელოს. გვჭირდებით. გვეიმედებით. გვიყვარხართ, მამაო. უფალმა დაგლოცოთ, გაგაძლიეროთ და გაგიმრავლოთ კეთილი საქმეები. მრავალჟამიერ!

                         სიყვარულით, თქვენი მრევლი