გამოხმაურება წერილზე - ,,ღია წერილი პედაგოგიურ საზოგადოებას, ყველას, ვისაც განათლების სისტემაში არსებული პრობლემები აღელვებს!"
ქართულ განათლების სისტემას უამრავი პრობლემა რომ აქვს, ცხადზე ცხადია. პრობლემები კომპლექსურია და ამიტომ, ერთი კონკრეტული „რეცეპტი“ არ არსებობს. უპირველეს ყოვლისა, საჭოროა დიაგნოსტიკა და შემდეგ ერთიანი სტრატეგია, მოკლე და გრძელვადიანი გეგმებით.
მუდმივად ვსაუბრობთ, რომ ქვეყნის წარმატების გზა განათლებაზე გადის და სამწუხაროდ, საერთაშორისო კვლევებში მაჩანჩალა პოზიციებზე ვრჩებით.
დამნაშავის ძებნა შორს არ არის საჭირო, ხელისუფლების ვალდებულებაა ხარისხის უზრუნველყოფა. მოსწავლეების კონსტიტუციითა და კანონით გარანტირებული უფლებაა ხარისხიან განათლებაზე თანაბარი წვდომა.
შესაძლოა, სწორედ ხარისხისადმი უნდობლობამ წარმოშვა უნდობლობა შეფასებებისადმი. ერთია, რომ მოსწავლეს აქვს კანონიერი უფლება ნიშანი გამოცდის გზით აიმაღლოს და მეორეა, როცა ამას აქვს მასობრივი ხასიათი.
ჩნდება კითხვა: მასწავლებელი არის მიკერძოებული, არაკომპეტენტური, უსამართლო?
ბატონი სოსოს შემთხვევაში, ვფიქრობ, ამას ვერავინ იტყვის. მეტიც, მისი პროფესიონალიზმი, საქმისადმი და შესაბამისად, ბავშვებისადმი ერთგულება და უპირობო მსახურება საყოველთაოდ ცნობილი ფაქტია.
ზოგადად, რომ ნიშნებზე დაფუძნებული პროცესი მანკიერ პრაქტიკად იქცა, ეს აშკარაა, საბჭოური მიდგომის ანარეკლია. შეფასების გამჭვირვალობისთვის სასწავლო პროცესში შეფასების რუბრიკების სათანადოდ გამოყენება არის ყველაზე მეტად მიზანშეწონილი, როცა მოსწავლე თავად ახდენს საკუთარი შედეგების შეფასებას, რაც მასში თვითშეფასების უნარის განვითარებას უწყობს ხელს.
განვმეორდები და ვიტყვი, რომ მოსწავლეს, რა თქმა უნდა, აქვს აბსოლუტურად ლეგიტიმური უფლება ნიშნის ამაღლებისთვის მოითხოვოს გამოცდა და ეს პროცესი არ უნდა ბადებდეს მანიპულაციის, გაყალბების ეჭვებს და საგამოცდო საკითხები უნდა აკმაყოფილებდეს ეროვნული სასწავლო გეგმის საგნობრივი სტანდარტის მოთხოვნებს.
იმ შემთხვევაში, თუ გამოცდის შედეგები ბადებს ეროვნულ სასწავლო გეგმასთან შეუსაბამობის და მეტიც მანიპულაციის ეჭვებს, ეს შესაძლოა გახდეს მოკვლევის საგანი, როგორც სკოლის ადმინისტრაციის, ისე განათლების სამინისტროს მხრიდან.
და ბოლოს, მე-3 კლასში მშობლიურ ენაში მივიღე „3“, მაგრამ სკოლა, საქართველოში საუკეთესო პედაგოგის - ელენე სურგულაძის შეფასებით, ქართულ ენასა და ლიტერატურაში, დავამთავრე შეფასებით - 5/5-ზე. ამით იმის თქმა მსურს, რომ ნიშანს მაშინ მოაქვს სიხარული, როცა იცი, რომ ეს შენი ნიჭისა და შრომის შედეგია.
ყველა მოსწავლეს ვუსურვებ წარმატებას და ბატონ სოსოს, ნაყოფიერ და დაფასებულ საქმიანობას.
განათლების ექსპერტი
