რუსეთის საგარეო საქმეთა მინისტრის მოადგილე, სერგეი რიაბკოვი აშშ-ის არჩეული პრეზიდენტის, ჯო ბაიდენის მომავალ ადმინისტრაციას “რუსოფობიაში” სდებს ბრალს და გამოთქვამს ვარაუდს, რომ რუსეთის ურთიერთობა აშშ-სთან “ცუდიდან უარესისკენ” განვითარდება.
“უცნაური იქნება, კარგის მოლოდინი გვქონდეს ხალხისგან, რომელთაგან ბევრმა კარიერა რუსოფობიას და ჩემი ქვეყნისთვის ტალახის სროლას დააფუძნა”, – ამბობს რიაბკოვი სააგენტო ინტერფაქსისთვის მიცემულ ინტერვიუში, 23 დეკემბერს, როცა თვეზე ნაკლები დრო რჩება ბაიდენის ინაუგურაციამდე.
მოსკოვსა და ვაშინგტონს შორის ურთიერთობა ბოლო წლებში გაუარესდა, მათ შორის, 2014 წელს რუსეთის მიერ უკრაინის ყირიმის რეგიონის ანქესირების, აღმოსავლეთ უკრაინის და ლიბიის ომებში შესრულებული როლის, აშშ-სა და ევროპაში არჩევნებში ჩარევის და კიბერთავდასხმების გამო, რომლებშიც რუსეთს ადანაშაულებენ.
ბაიდენის ინაუგურაცია 20 იანვარს გაიმართება. ვარაუდობენ, რომ ის უფრო მკაცრ პოზიციას დაიკავებს კრემლთან მიმართებით, ადამიანის უფლებების და საგარეო პოლიტიკის გამო – შედარებით დონალდ ტრამპთან, რომელსაც ბევრი აკრიტიკებდა რუსეთთან რბილი პოლიტიკის გატარებისთვის.

კომენტარები