ეკონომიკური განვითარებისა და ინოვაციების ცენტრი ჩაის დარგის განვითარებას პრიორიტეტად მიიჩნევს
გარემოს დაცვისა და სოფლის მეურნეობის მინისტრმა, ოთარ შამუგიამ და სახელმწიფო რწმუნებულმა გურიაში გიორგი ურუშაძემ, ჩაის მწარმოებელი რეგიონების ფერმერებმა, კოოპერატივების, ჩაის გადამამუშავებელი საწარმოს წარმომადგენლებმა, ოზურგეთის მუნიციპალიტეტის სოფელ ქვემო ბახვში ექსპერიმენტული წესით გაშენებული ჩაის პლანტაცია დაათვალიერეს.
მინისტრის თქმით, ჩაი საქართველოსთვის ტრადიციული კულტურაა და მას განვითრების პოტენციალი აქვს, თუ მისი ხარისხის გაუმჯობესებაზე იზრუნებენ. სწორედ ამიტომ, ხორციელება ჩაის რეაბილიტაციის სახელმწიფო პროგრამა, რომლის ფარგლებშიც, 1600 ჰექტარზე მეტ ფართობზე ჩაის პლანტაციების რეაბილიტაცია განხორციელდა.
„ვეხმარებით გადამმუშავებელ სექტორსაც. გურიაში, სოფელ ბახვში გვქონდა შეხვედრა ფერმერებთან; ვისაუბრეთ იმ საკითხებზე, თუ რა დამატებითი მხარდაჭერა ესაჭიროება სექტორს შემდგომი განვითარებისთვის. ჩვენ მზად ვართ, მეტი მხარდაჭერა გავუწიოთ ფერმერებს, რათა ვაწარმოოთ მაღალი ხარისხის, კონკურენტუნარიანი ჩაი", - განაცხადა ოთარ შამუგიამ.
აღსანიშნავია, რომ, ბოლო პერიოდში, ქართველი პრაქტიკოსი მეჩაიე ფერმერების მიერ დანერგილმა ჩაის ფოთლის წარმოების თანამედროვე ტექნოლოგიამ - ბუჩქის ბრტყელზედაპირიანმა ფორმირებამ, მნიშვნელოვნად გააუმჯობესა ჩაის მოვლა-მოყვანის კომპლექსური მექანიზაციის პროცესი და, ხარისხთან ერთად, ჩაის საკრეფი ზედაპირის ფართობი გაზარდა.
ერთ-ერთი პირველი, რომელმაც აღნიშნული ტექნოლოგიით 5 ჰა ჩაის პლანტაციის ფორმირება მოახდინა, სოფელ ქვემო ბახვში მცხოვრები დავით თენეიშვილია, რომლის ჩაის პლანტაციაში გარემოს დაცვისა და სოფლის მეურნეობის მინისტრი გაეცნო ოვალურზედაპირიანი ჩაის პლანტაციის ბრტყელზედაპირიან პლანტაციად ფორმირების პროცესს. ოთარ შამუგია იაპონური, ჩინური, თურქული და „საქჩაიმანქანის“ მიერ წარმოებული ქართული ხელის სასხლავი, საკრეფი და გვერდების სასხლავი აპარატების საჩვენებელ გამოცდას დაესწრო.
მინისტრთან შეხვედრაში მონაწილეობდნენ ა(ა)იპ ეკონომიკური გაერთიანებისა და ინოვაციების ცენტრი წარმომადგენლები და ჩაის მწარმოებელი ფერმერები: „ჩაი აკეთი“, „ჩიბათი“, შპს „ჩაი ჩიბათი“, „ქართული არომატი“. ა(ა)იპ ეკონომიკური გაერთიანებისა და ინოვაციების ცენტრი დაარსების დღიდან ჩართულია ჩაის დარგის განვითარებისა აღორძინების საქმეში. ამ პერიოდის მანძილზე ჩამოყალიბდა ჩაის მწარმოებელი კოოპერატივები, მოეწყო მცირე გადამამუშავებელი საწარმოები, ამჟამად რეაბილიტაცია მიმდინარეობს 13 ჰა-ზე, ლანჩხუთის მუნიციპალიტეტში რეაბილიტაციას ექვემდებარება 400 ჰა ფართობი. მინისტრი შეგვპირდა, რომ გაითვალისწინებს ფერმერთა თხოვნას და პროგრამაში მონაწილე მინიმალური ჯამური ფართობი 5 ჰა-დან შემცირდება 2-3 ჰა-მდე, მოსავლის ამღები ტექნიკის შეძენის მხარდაჭერის სახელმწიფო პროგრამაში დაემატება ჩაის სასხლავი, საკრეფი და ბუჩქის ფორმირების აპარატები, რომელთა ღირებულების 40-50% სახელმწიფო დააფინანსებს. ამ მიზნით კიდევ ერთი შეხვედრა გაიმართება ფერმერებთან.
პროფესორმა ნუგზარ ებანოიძემ სოფლის მეურნეობის სამინისტროს კვლევითი ცენტრის აგროსაინჟინრო კვლევის სამსახურის უფროსმა ჩვენთან საუბარში აღნიშნა: ბრტყელზედაპირიანი ტექნოლოგია უფრო მოსახერხებელია საინჟინრო კუთხით და ხელს უწყობს მოსავლიანობის ზრდას. ქართული მაღალხარისხიანი ჩაის და ბიო ჩაის სეგმენტზე დასამკვიდრებლად აღნიშნული ტექნოლოგია სწრაფად მოგვცემს საშუალებას უმოკლეს დროში აღვადგინოთ არსებული პლანტაციები და წარმოების მნიშვნელოვანი ზრდა განვახორციელოთ.
შემდეგ გარემოს დაცვისა და სოფლის მეურნეობის მინისტრი, ოთარ შამუგია ქალაქ ოზურგეთში, „ლაითურის ჩაის საექსპერიმენტო კომპანიის“ თანამედროვე სტანდარტებით აღჭურვილი ჩაის გადამმუშავებელი საწარმოს წარმოების პროცესს გაეცნო.
„საქართველოში ჩაის წარმოებას მრავალწლიანი ტრადიცია აქვს. ქართულ ჩაი პოპულარული და მოთხოვნადი იყო, რაც იმას ნიშნავს, რომ დარგს აქვს პოტენციალი. სწორედ ამან განაპირობა, რომ 2016 წლიდან სახელმწიფომ ჩაის პლანტაციების რეაბილიტაციის პროგრამის განხორციელება დაიწო. მხოლოდ ამ პროგრამის ფარგლებში, საქართველოში ჩაის პლანტაცია რეაბილიტირებულია 1,676 ჰა ფართობზე (აქედან 241 ჰა გურიაში); სახელმწიფოს მხრიდან თანადაფინანსება 3 მლნ ლარზე მეტს შეადგენს. ფერმერებს და მეწარმეებს ქართული ჩაის წარმოების ზრდისთვის ფინანსურ მხარდაჭერას ვთავაზობთ შეღავათიანი აგროკრედიტის პროექტის ფარგლებშიც, დღეისათვის, ამ მიმართულებისთვის 4,395,112,524 ლარის ღირებულების შეღავათიანი აგროკრედიტია გაცემული. ჩაის წარმოების ზრდისთვის გვაქვს საგრანტო კომპონენტიც, ტექნიკური დახმარება და სხვა. ეს მხარდაჭერა არის სტიმული და ამავე დროს გარანტია, რომ დარგი გახდეს კონკურენტუნარიანი, ქართული ჩაი ვაქციოთ მოთხოვნად პროდუქტად, რომელიც თავის ადგილს დაიმკვიდრებს საერთაშორისო ბაზარზე ახალზელანდიურ, ჩინურ, იაპონურ, ინდურ და სხვა ქვეყნების მიერ წარმოებულ ჩაის შორის.“ - განაცხადა ოთარ შამუგიამ.
„ლაითურის ჩაის საექსპერიმენტო კომპანიამ“, საწარმოს შესაქმნელად, 500,000 ლარიანი ინვესტიცია განახორციელა.აქედან, 155,000 ლარი შეღავათიანი აგროკრედიტია. კომპანია „ჩაის პლანტაციების რეაბილიტაციის პროგრამის“ ბენეფიციარიცაა და 28 ჰა ჩაის პლანტაციების რეაბილიტაციისთვის სახელწიფო გრანტი 52,000 ლარის ოდენობით აქვს მიღებული.
საწარმო სეზონზე 65 ტონა ჩაის ფოთოლს გადაამუშავებს. პროდუქციის რეალიზაცია ხდება როგორც ადგილობრივ, ასევე საერთაშორისო ბაზრებზე. გადამმუშავებელ საწარმოში, სეზონურად, 10 ადამიანია დასაქმებული. კომპანიაში, მიმდინარე წელს, სურსათის უვნებლობის საერთაშორისო სტანდარტი - HAჩჩP დაინერგა.
სახელმწიფოს დახმარებით, საქართველოს მასშტაბით, ჩაის წარმოების მიმართულებით 8,555,127 ლარის ღირებულების 42 სესხია გაცემული, მათ შორის, გურიის რეგიონში 6,083,890 ლარის ღირებულების 22 სესხია გაცემული. სახელმწიფოს ფინანსურმა მხარდაჭერამ მეწარმეებს დამატებითი ბიძგი მისცა, წარმოების განვითარება-გაფართოებისთვის.
ა(ა)იპ ეკონომიკური
განვითარებისა და ინოვაციების ცენტრის დირექტორი