საკრებულოს გარჩევები!

we27 დეკემბერს გამართულ ლანჩხუთის მუნიციპალიტეტის საკრებულოს სხდომაზე, რომელსაც თავმჯდომარე ბესიკ ტაბიძე უძღვებოდა, 2018 წლის პრიორიტეტების დოკუმენტი და ბიუჯეტის პროექტი განიხილეს.
მთავარი ფინანსური დოკუმენტი საკრებულომ ხმათა უმრავლესობით დაამტკიცა.
მანამდე კი კორექტირებული ბიუჯეტის პროექტი განიხილა ყველა კომისიამ და ფრაქციამ, შესწორებული ვარიანტი კიდევ ერთხელ განხილული იქნა საჯაროდ.
აღნიშნული საკითხები საკრებულოს მერიის საფინანსო-საბიუჯეტო და მუნიციპალური შესყიდვების სამსახურის უფროსმა, როლანდ ლაშხიამ წარუდგინა.
2018 -2021 წწ-ში მუნიციპალიტეტის სტრატეგია თითქმის უცვლელია და მოიცავს ადგილობრივი ინფრასტრუქტურის განვითარებას, მოსახლეობის სოციალური პირობების გაუმჯობესებას, საზოგადოებრივი უსაფრთხოების უზრუნველყოფას, ჯანსაღი ცხოვრების წესის დანერგვას და სკოლამდელი განათლების ხელშეწყობას.
მთავარი საფინანსო დოკუმენტების ძირითადი პრიორიტეტები შემდეგნაირად განისაზღვრა:
• ინფრასტრუქტურის მშენებლობა, რეაბილიტაცია და ექსპლოატაცია;
• განათლება;
• კულტურა, რელიგია ახალგაზრდობის ხელშეწყობა და სპორტი;
• მოსახლეობის ჯანმრთელობის დაცვა და სოციალური უზრუნველყოფა.
• მმართველობა და თავდაცვა.
საბოლოოდ, ლანჩხუთის მუნიციპალიტეტის 2018 წლის ბიუჯეტი ჩამოყალიბდა და განისაზღვრა 8757600 ლარით.
საკრებულომ დაამტკიცა მუდმივმოქმედი ხუთივე კომისიის დებულება და საკრებულოს 2018 წლის სამუშაო გეგმა.
საკრებულოს მიერ დაამტკიცდა განკარგულება, ,,ლანჩხუთის მუნიციპალიტეტში 2018 წელს განსახორციელებელი ინფრასტრუქტურული პროექტების მოწონების შესახებ“, რომლის თანახმად, მომავალ წელს ლანჩხუთის მუნიციპალიტეტში 4 541 950 ლარის ღირებულების ინფრასტრუქტურული პროექტების განხორციელებაა დაგეგმილი.
საკრებულომ ადმინისტრაციული წარმოება დაიწყო ლანჩხუთის მუნიციპალიტეტის 2018 წლის ბიუჯეტიდან სოციალური დახმარებისა და მიღების წესსა და სოც-კულტურული ღონისძიებათა პროგრამების დაფინანსების წესის შესახებ.
საკრებულომ ცნობად მიიღო სამანდატო, საპროცედურო, იურიდიულ საკითხთა და ეთიკის კომისიის დადებითი დასკვნა ფრაქციების შექმნის შესახებ.
კომისიის თავმჯდომარის, ვერიკო კვირკველიას განცხადებით, საკრებულოში ორი ახალი ფრაქცია შეიქმნა - „ქართული ოცნება-კონსერვატორები“, გოგი მორჩილაძის და ფრაქცია „ქართული ოცნება-მრეწველები“, სპარტაკ კვაჭაძის თავმჯდომარეობით.
სხდომაზე, პირველი დებატები ინფრასტრუქტურული საკითხების განხილვას მოჰყვა. კლინიკა ,,ჯანმრთელობის“ დირექტორმა და ამავდროულად უმრავლესობის დეპუტატმა, ამირან ქანთარიამ მოითხოვა , მისი კლინიკის წინ საბიუჯეტო ორგანიზაციები მიერ დაზიანებული ასფალტის საფარის აღდგენა: ,,ორი წელიწადია ვიბრძვი უკვე ამ საკითხის მოსაგვარებლად, მოვახერხე და დამოუკიდებლად დავაგე ჩემი კლინიკის წინ ასფალტი, ამის შემდეგ საბიუჯეტო ორგანიზაციებმა დააზიანეს საფარი და არის კატასტროფული მდგომარეობა. ყველა გაწვიმებაზე წყალი ორ ნაკადად მოდის და პაციენტებს უწევთ ხტომა-ხტომით კლინიკაში შემოსვლა. რა გახდა ამ პრობლემის მოგვარება“-განაცხადა ქანთარიამ. კახა ასკურავამ და ზაზა წულაძემ გაკვირვება გამოთქვეს, თუ რატომ არ იყო ბიუჯეტში ჩასმული ჭყონაგორაში რამდენიმე ოჯახისთვის სასიცოცხლოდ მნიშვნელოვანი ინფრასტრუქტურული პროექტი. ასკურავამ მერიის ინფრასტრუქტურის სამსახურის უფროსს, ლევან ჩხაიძეს მიმართა: ,,თქვენ ადრე დამადანაშაულეთ პიარში, ასევე განაცხადეთ, რომ ჩემი ნათესავის გამო ვიბრძოდი. ახლა ხომ დამთავრდა არჩევნები, გარდა კახა ასკურავას ნათესავისა, იქ შვიდი ოჯახი იმყოფება მძიმე მდგომარეობაში. რატომ არ არის გათვალისწინებული 2018 წლის ბიუჯეტში ჭყონაგორაში განსახორციელებელი ინფრასტრუქტურული პროექტი?“. ოპოზიციონერ დეპუტატს მხარი აუბა ნიგოითის მაჟორიტარმა დეპუტატმა_ზაზა წულაძემ: ,, ბატონო ლევან, თუ მე მოვახერხე და ერთი ოჯახი გადავარჩინე და მეტნაკლებად ავაცილეთ საფრთხე, რატომ გგონიათ, რომ თქვენი ჩართულობის შემთხვევაში, შესაძლებელია ამ პრობლემის მოგვარება? სავსებით შესაძლებელია, რომ ადგილობრივი ინფრასტრუქტურის სამსახურის დახმარებით მოვაგვაროთ ეს პრობლემა.“ ლევან ჩხაიძის თქმით: ,,ამ საკითხთან დაკავშირებით მოწვეული იქნა გზების დეპარტამენტიდან ექსპერტთა ჯგუფი, რომელმაც განაცხადა, რომ აუცილებელია ცენტრალური გზა გადაიკვეთოს და ისე ჩაისვას მილები, სხვა გამოსავალს ისინი ვერ ხედავენ“. ზაზა წულაძე კატეგორიულად არ დაეთანხმა ამ მოსაზრებას:,, თუ იქნება ამოღებული გვირაბები, ხოლო შემდეგ გაიწმინდება მილები, მაშინ წყალი ჩვეულებრივად გავა. სრულ პასუხისმგებლობას ვიღებ ჩემს თავზე“. ნინოშვილის მაჟორიტარმა დეპუტატმა, დავით ჩხარტიშვილმა გაკვირვება გამოხატა იმის გამო, რომ ინფრასტრუქტურული პროექტებისთვის ძალიან მცირე თანხა იყო გამოყოფილი: ,,გაოცებული ვარ, როგორ უნდა გადანაწილდეს ეს 800 000 ლარი 16 თემზე, მე ნინოშვილზე ვიტყვი, არის ძალინ მძიმე მდგომარეობა და პირდაპირ გეტყვით, სოფელი ასახლების საშიშროების წინაშე დგას. ვიცი, რომ სხვა სოფლებსაც აწუხებთ ეს პრობლემა, უბრალოდ ვერ ვხვდები, ეს მცირე თანხა როგორ უნდა გადანაწილდეს. გამიჭირდება ამ ბიუჯეტისთვის ხელის აწევა.“ სხვა დეპუტატებმაც გამოთქვეს შენიშვნები, რასაც ადგილობრივი ხელისუფლების წარმომადგენლები პასუხობდნენ.
ამის შემდეგ, დაიწყო ტრადიციული სხვადასხვა, რომელიც ძალზედ ხმაურიანი გამოდგა. კახა ასკურავამ განაცხადა, რომ ის აღშოთებულია ადგილობრივი ხელისუფლებისა და ჩინური კომპანია ,,სინოჰიდროს“ ქმედებით. კერძოდ, საქმე ეხება შუხუთის საბავშვო ბაღში 22 დეკემბერს ჩატარებულ საახალწლო ზეიმს, სადაც ჩინურმა კომპანიამ, ლანჩხუთის მერთან და საკრებულოს თავმჯდომარესთან ერთად საჩუქრები გადასცა შუხუთის საბავშვო ბაღის აღსაზრდელებს. მკითველს შევახსენებთ, რომ 20 დეკემბერს სოფელ ქვიანში, ავტობანის მშენებარე ჩინური კომპანიის კუთვნილმა ავტომობილმა 15 წლის ვიკო ასკურავას სიცოცხლე შეიწირა. როგორც დეპუტატმა ზაზა წულაძემ განაცხადა, ტვირთის შიდა წარმოება თურქულ კომპანიას აქვს თავის თავზე აღებული და ჩინური კომპანია არაფერ შუაშია. ახლა დავუბრუნდეთ საკრებულოს სხდომას. კახა ასკურავა: ,,მაინტერესებს, რა აუცილებლობას წარმოადგენდა, ამხელა ტრაგედიიდან ორი დღის შემდეგ, იმ ჩინურ კომპანიასთან ერთად გადაგეცათ საჩუქრები ბაღში, რომლის სატვირთო ავტომობილმაც იმსხვერპლა ვიტო ასკურავას ოჯახი. იცით, რომ ამ ტრაგედიის გამო ქვიანში და ზოგადად ნიგოითის თემში ახალი წელი რომ არ იქნება? ეს ხომ ცინიზმია კომპანიის მხრიდან, რა საქველმოქმედო ღონისძიებები ჩაუტარებიათ მანამდე ,,სინოჰიდროს წარმომადგენლებს“? ასკურავას სიტყვის გამოსვლის დროს აშკარა ხდებოდა, რომ საკრებულოს თავმჯდომარე ბესო ტაბიძე მდგომარეობიდან გამოდიოდა: ,,შენ ვინ ყოფილხარ, ამ თემის პოლიტიზირებას როგორ ბედავ. ახლა, ბოლომდე გაგიცანი და დავრწმუნდი ვინც ხარ! გინდა დამაჯერო, რომ შენზე ნაკლებად შემტკივა გული იმ გარდაცვლილ ბავშვზე? ან რატომ არ გადაამოწმე, ნამდვილად ამ კომპანიის მანქანას თუ ემსხვერპლა ის ბავშვი. ღონისძიება იყო წინასწარ დაგეგმილი და ჩვენ რა უნდა გაგვეკეთებინა, ბავშვებისთვის უარი გვეთქვა? ამიტომ ვიღებ მე 95 %-ს არჩევნებში, ხოლო შენ ოპოზიციაში ხარ.“ტაბიძის შემდეგ, მოვისმინეთ ალექსანდრე სარიშვილის არანაკლებ ემოციური გამოსვლა: ,,კახა ეს რა დაგიწერია, ეს რა გვაკადრე და იკადრე. იმ წერილის წაკითხვის შემდეგ, რომელიც შენ დაწერე, მე მრცხვენოდა შენთან ერთად დავმჯდარიყავი დარბაზში. რისი გდაფარვა უნდა მოგვეხდინა ამ ღონისძიებით, რაებს იძახი. ალეკო სარიშვილს არც ერთი თანამდებობა და ხელისუფლება არ უღირს იმად, რომ ამხელა ტრაგედია კი არა, თუნდაც მცირე შემთხვევა გადაფაროს რაიმეს გამო. მე ვარ შეურაცხყოფილი იმით, რაც წავიკითხე და მინდა საკრებულოს წევრებს ვთხოვო, გამოითხოვონ ინფორმაცია იმის შესახებ, თუ რომელი კომპანიის სატვირთო მანქანას ემსხვერპლა ვიკო ასკურავას სიცოცხლე. ღონისძიება დაგეგმილი იყო ათი დღით ადრე, ყველა საორგანიზაციო საკითხი მოგვარებული იყო და რა უნდა გვექნა მითხარით? ამასთან ვაცხადებ, რომ ეს კომპანია ტრაგედიასთან არაფერ შუაში არ არის. თანაც სიცრუეა, რომ თითქოს ამ კომპანიას ადრე არ გაეწიოს საქველმოქმედო საქმიანობა-“განაცხადა მერამა.
მკითხველს გავაცნობთ კახა ასკურავას იმ წერილს, რომელმაც მერის და უმრავლესობის დეპუტატების აღშფოთბა გამოიწვია. კახა ასკურავამ თავის ფეისბუქგვერდზე შემდეგი წერილი განათავსა: ,,მართლა ყველაფერს აქვს საზღვარი! ამ ფოტოზე იმ კომპანიის "სინოჰიდროს" წარმომადგენელია მუნიციპილიტეტის ხელმძღვანელობასთან ერთად, რომლის ტექნიკურად გაუმართავმა თვითმცლელმაც, წინა დღეს 15 წლის მოზარდის სიცოცხლე იმსხვერპლა სოფელ ქვიანში, რამაც დაამუნჯა და გააქვავა მთელი სოფელი.ნაცვლად იმისა,რომ მუნიციპალიტეტის ხელმძღვანელობას ჰქონდეს შეკითხვები (თავისი კომპეტენციის ფარგლებში) მითუმეტეს იმისა, რომ ვიკო ასკურავას შემთხვევა არა არის პირველი მსხვერპლი და თუ ასე გაგრძელდება ჩვენდა საუბედუროდ არც უკანასკნელი აღმოჩნდეს შესაძლოა და ამ ფირმის წარმოადგენელბთან ერთად საზეიმო ღონისძიებებზე დადიან, თან სკოლაში?! სწორედ სკოლიდან მოდიოდა ვიკო ასკურავა, როცა ამ ფირმის მიერ დაქირავებული მანქანის საბურავმა იმსხვეპლა იგი და ამ ჩინური კომპანიის ხელმძღვანელობას ყოფნის თავხედობა და სწორედ სკოლაში ითხოვს შესვალას, როცა თავად ტრაგიკულად დაღუპული მოზარდი მიწასაც კი არ იყო მიბარებული. რომელი საჩუქარი და საქველმოქმედო ღონისძიება გამოისყიდის იმ ტრაგედიას, რომელიც ასკურავების ოჯახს მიაყენა სწორედ ამ ფირმის მიერ დაქირავებულმა მანქანამ ?ამას ჩემი მუნიციპალიტეტის ხელმძღვანელობას ვეკითხები,ან/და რა სასწრაფოდ აუცილებელი იყო ამ ღონისძიების მანდამინც ამ ტრაგედიიდან მეორე დღეს გამართვა,რას მივაწეროთ ეს ყველაფერი?! მგონი უკვე ორ წელზე მეტი გადის, რაც ეს ფირმა ლანჩხუთში მუშაობს და რომელი საქველმოქმედო ღონისძიება ჩაუტარებიათ?!
ცხარე კამათის დროს, კახა ასკურავამ აღნიშნა, რომ ვიკო ასკურავა მისი ნათესავი იყო და განსაკუთრებით აწუხებს ეს საკითხი. მან კატეგორიულად უარყო მერის ბრალდებები, თითქოს ასკურავა ამბობდა, რომ ამ ღონისძიებით ტრაგედიის გადაფარვა უნდოდათ. მისი თქმით, მან გააპროტესტა ჩინური კომპანიის ქველმოქმედება იმ დროს, როდესაც ტრაგედია ახალი მომხდარი იყო, რადგან მიაჩნია, რომ ეს მორალურად გაუმართლებელია.
თორნიკე ჯიჯიეშვილი

,,სანამ იმ პაგონებს დავახევდეთ, ჯობია აზრზე მოვიდეს...“

nugo,,ჰო და არა“ გთავაზობთ დაპირებულ ინტერვიუს ,,გურიას“ ყოფილი აღმასრულებელი დირექტორის მოადგილესთან- ნუგზარ ჩხაიძესთან. მკითხველისთვის საინტერესო უნდა იყოს, ვის ადანაშაულებს კლუბის წინააღმდეგ შეთქმულებაში ჩხაიძე და რა ტაბუდადებულ თემებს აშიშვლებს ის. ნუგზარ ჩხაიძემ მზადყოფნა გამოთქვა, ითანამშრომლოს ,,ჰო და არასთან“ ილო ტუღუშის ტრაგედიის გამოძიების საქმეში.
,,საქათმეში ახალი მამალი რომ უნდა გამოჩნდეს, ეს ფაქტია.“
,,თემურ ჩხაიძე მთელი თავისი დეპუტატობის პერიოდში შავ სიაში იყო შეყვანილი და მისი ოჯახისთვის სახელფასო თუ იპოთეკურ სესხსაც ვერ იღებდა.“
,,სანამ იმ პაგონებს დავახევდეთ, ჯობია აზრზე მოვიდეს...“
,,18 სექტემბერს, გია გურულმა დაადასტურა, რომ ამ ეტაპზე ჟორდანიას მოსვლა კლუბში არარეალური იყო, მას ამის შესახებ ინფორმაცია როგორც ჩანს პირველწყაროდან ჰქონდა...“


-თქვენ ,,გურიას“ წინააღმდეგ არსებულ შეთქმულებაზე აღნიშნეთ, თანაც ხანგრძლივი პერიოდი დაასახელეთ 2013-2017 წლები, ვფიქრობ ეს სერიოზული მინიშნებაა, გთხოვთ გაარკვიოთ საზოგადოება, რას გულისხმობთ?

-რა თქმა უნდა, ეს დეტალურად უნდა ავხსნათ, თანაც წლების მიხედვით, ხოლო ეს რამდენად შეესაბამება სინამდვილეს და ნებსით თუ უნებლიედ დაშვებული შეცდომები იყო, ეს მკითხველმა განსაჯოს, ამასთან წინასწარ ვაცხადებ: თუ უნებლიე შეცდომებია, მაშინ ამ საქმის პროფესიონალი კი არა, დილეტანტი ხარ და ფეხბურთზე არც უნდა ილაპარაკო, არამცთუ კლუბში იმუშაო, ხოლო თუ იცი, რომ შეცდომას შეცდომაზე უშვებ და მაინც აგრძელებ მუშაობას, თანაც ხელმძღვანელობ და რაიონის ბიუჯეტის თანხებს 100 ათასობით აქეთ-იქით ,,აკატავებ”, რომელმაც ბოლოს მილიონები დაწერა, უკვე ,,შეთქმულების უნებლიე მონაწილე“ ხდები. აღარ ვლაპარაკობ იმაზე, რომ არ ფიქრობ აუცილებელ რეფორმებზე, სტრუქტურულ ცვლილებებზე და ვერ ღებულობ დროულ გადაწყვეტილებებს, საერთოდ არ გაგაჩნია სტრატეგიული გეგმა, ანუ მიყვები იმ დინებას, რომელიც იცი რომ მომავალში არაფრის მომცემია და ერთ დღეს სადღაც უხერხულ ადგილზე გაგჭედავს.
2012 წლის 1 ოქტომბერს, როცა არჩევნები ,,ქართულმა ოცნებამ“ მოიგო და ხელისუფლებაში მოვიდა, ფეხბურთში ტარდებოდა საშემოდგომო -საგაზაფხულო, ანუ გარდამავალი ეროვნული ჩემპიონატი (2012-2013 წლების) და ,, გურია’’ მე-2 ლიგაში გამოდიოდა. 2012 წლის ბოლოს, ანუ ჩემპიონატის პირველი წრე სამეულში დაამთავრა. რა დაფინანსება ქონდა ეს ჩემი საქმე არაა, მე მხოლოდ ერთი ვიცი, იმ ბიჭებმა მაშინ მაგრად იშრომეს, შედეგი დადეს და თავისი ოფლის საზღაურიც მოითხოვეს. მაგრამ ფული რომ არ გადაუხადეს და სხვადასხვა ტიპის პროტესტი გამოთქვეს, მაჟორიტარმა დეპუტატმა თემურ ჩხაიძემ, პროგრეს ბანკში თავდებობის ხელშეკრულებას ხელი მოაწერა და კლუბმა 435 000 ლარის საკრედიტო ხაზი მიიღო. ხოლო ამ კრედიტს, ხელშეკრულების შესაბამისად რომ ვერ მოემსახურნენ და ფული გრაფიკის მიხედვით ვერ დააბრუნეს, თემურ ჩხაიძე მთელი თავისი დეპუტატობის პერიოდში შავ სიაში იყო შეყვანილი და მისი ოჯახისთვის სახელფასო თუ იპოთეკურ სესხსაც ვერ იღებდა. როგორც ახლა აღმოჩნდა, ამ თანხიდან 237 000 ლარი 2013 წლის 1 იანვრამდე აითვისეს, დანარჩენი კი არ გამოუყენებიათ, რომელზეც ბანკი თავისთავად საჯარიმო სანქციებს გაატარებდა. ყოველივე ზემოაღნიშნულის კურიოზი ის არის, რომ 2013 წლის საგაზაფხულო ჩემპიონატზე , როცა გურია უმაღლეს ლიგაში გადავიდა, (რითაც ასე ტრაბახობს დღემდე მაშინდელი ხელმძღვანელობა) და ფეხბურთელებს დამსახურებულად ეკუთვნოდა თავისი შრომის ანაზღაურება, ხელფასები და პრემიები ბოლომდე არ გადაუხადეს, ფეხბურთელების დიდმა ნაწილმა ქალაქის ცენტრში პოლიციის შენობის წინ ,,რუსთავი-2-ს’’ პრესკონფერენცია მოუწყვეს და ღიად ილაპარაკეს ყოველივე ამის შესახებ. მაშინ პირველ ეტპზე შვიდმა ფეხბურთელმა, ხოლო შემდგომ ხუთმა, გუნდი პროტესტის ნიშნად დატოვა, ანუ გუნდი ორჯერ დაიშალა და მესამეჯერ ასაწყობი დარჩა, რაც საფეხბურთო ლოგიკის ყველა პარამეტრით, ე. წ ,,უნებლიე შეთქმულების“ პირველი შემთხვევა იყო.
ცოტა უკან დავიხევ და მკითველს შევახსენებ, რომ ლანჩხუთში ,,ქართული ოცნების“ ლოზუნგი იყო: ,,ჩვენ გავიმარჯვებთ თქვენთან ერთად“, რადგან ჩვენ სიტყვის პატრონები ვიყავით, კლუბის მაშინდელი ხელმძღვანელობისათვის არავის არ უკადრებია, რომ პოზიციები დაეთმოთ და გუნდიდან წასულიყვნენ. გამგებლის, დეპუტატის და ყველას, ვინც ,,გურიას“ ირგვლივ ვტრიალებდით შეთავაზება იყო ასეთი: არსებული ხელმძღვანელობა პლიუს ორი კაცი. კობა მირზაშვილი და გიალო ჩხაიძე. დამსხდარიყვნენ ერთად , მოელაპარაკათ და გაეგრძელებიათ მუშაობა . ეს ხდებოდა 2013 წლის იანვარში. საბენდიეროდ ყველაფერი ასე მოხდა და თუ ზუსტად მახსოვს კობა მირზაშვილი დაინიშნა ლიცენზირების მენეჯერად და გიალო ჩხაიძე რიგით მწვრთნელად.
2012-2013 წელს საგაზაფხულო ჩემპიონატში, ანუ მეორე წრეში ამ გუნდის ერთად მუშაობის პერიოდში ,, გურია“ მიღწეული შედეგებით გადავიდა უმაღლეს ლიგაში და 2013-2014 წლების ჩემპიონატში მონაწილეობის მისაღებად, გუნდს შეკრება უნდა დაეწყო ივლისის თვიდან. ალბათ გაიხსენებთ, რომ მაშინ არ იყო არც სტადიონი და არც ბაზა. გადაწყდა, რომ გუნდი შეიკრიბებოდა გრიგოლეთში დაქირავებულ კერძო სახლში, კვება იქნებოდა იქვე, ხოლო გუნდი ივარჯიშებდა გრიგოლეთის ბაზის მინდორზე. ოფიციალურ თამაშებს კი ჩაატარებდა ქობულეთში. აქვე მინდა ლანჩხუთელებს შევახსენო, რომ 2013 წელში დეპუტატმა თემურ ჩხაიძემ შეძლო ლანჩხუთის ,,გურიასთვის’’ დაებრუნებია წართმეული გრიგოლეთის ბაზა, ხოლო გამგებელმა ზაზა ურუშაძემ შეძლო შუხუთის ლელობურთზე ჩამოსულ და გამარჯვებულ ლელობურთელებთან ერთად სასაფლაოზე მიმავალ ბატონ ბიძინა ივანიშვილისთვის საქველმოქმედოდ ეთხოვა 500 000 ლარი, რითაც გარემონტდა სტადიონის ადმინისტრაციული შენობა, გასახდელები თუ სხვა ინფრასტრუქტურული ობიექტები,შემოიღობა სტადიონი და სხვა.
ამ პერიოდში, 2013 წლის ივლისში, ანუ როცა გუნდი უნდა შეკრებილიყო, ვგებულობთ, რომ გუნდის ხელმძღვანელობას შორის ხდება შეუთანხმებლობა და გუნდი როგორც ზემოთ მოგახსენეთ, ორჯერ დაშალეს და კობას და გიალოს ხელმძღვანელობით მესამედ ააწყვეს. თუ რატომ მოხდა ყოველივე ეს, ვინ იყო ამის სულის ჩამდგმელი, ვის გაუბედეს ყოველივე ეს და რატომ ვერ მოება თავი ამ კონფლიქტს, რატომ ვერ მიიღო საჭირო გადაწყვეტილებები და ძირშივე ვერ აღკვეთა ასეთი ქმედებები, რატომ არ მიუჩინა ადგილი ე.წ. ,,პროფესიონალებს“, რომლებიც შემდეგ უფრო მეტად გათამამდნნენ და ასეთი ,,პროფესიონალიზმი“ წესად დათესეს კლუბში, რომელიც ამ კლუბის ,,ნოუჰაუ“ გახდა, იცით ვის უნდა ჰკითხოთ?! ალბათ მიხვდით. მაგრამ შეიძლება კითხვაც გაგიჩნდათ ჩემდამი, შენ როგორც გულშემატკივარმა რა ქენიო? იცით რა ვქენი?: ლანჩხუთში ერთ კაცს_ ერთ ოჯახში დავუძახე, ისინი ორნი მოვიდნენ, ჩვენც ორნი ვიყავით. წინასწარ ვუთხარი, ამ ოჯახში პონედელნიკია ნამყოფი და პურმარილი აქვს მიღებული მეთქი, შემდეგ თვალი თვალში გავუყარე და ვკითხე: რა ხდება და რატომ ხდება ყოველივე ეს გრიგოლეთში მეთქი? მე რა შუაში ვარო. შუაში კი არა თავში ვინც არის, ვინც ამ საქმის გენერალია, ჩვენ ეს ყველაფერი ვიცით , ამიტომ სანამ იმ პაგონებს დავახევდეთ, ჯობია აზრზე მოვიდეს და ამ სიბინძურეს თავი დაანებოს მეთქი. შემდეგ, იქ კაცური და მეგობრული საუბარი გაიმართა, მეორე დღიდან კი გრიგოლეთში წესრიგი დამყარდა , გუნდი თავიდან აიწყო მესამეჯერ და ამ გუნდმა 2013-2014 წლების ჩემპიონატის პირველ წრეში მეოთხე ადგილი დაიკავა 27 ქულით. ყოველივე ეს კობა მირზაშვილის ხელმძღვანელობით და საკუთარი ოჯახიდან გამოტანილი ფულით ხდებოდა, რომელიც როგორც შემდეგ გაირკვა 200 000 ათას ლარზე მეტი ყოფილა. შედეგი დადგა, მაგრამ ის სიბინძურე, რაც მოხდა, ეს ხომ ფეხბურთელებმაც დაინახეს და მიხვდნენ, ვინც იდგა ამ საქმის უკან. ფეხბურთელები იქამდე მიიყვანეს და ტვინი ისე გადაუტრიალეს, რომ პოლიციის შენობის წინ,, რუსთავი 2’’-ის ტელეკამერებთან ფეხბურთელისათვის მიუღებელ თემებზე ალაპარაკეს. ასეთი რამე ,,გურია“-სთვის ყოველთვის უცხო რამ იყო, ,, გურია“ ყოველთვის კაცების გუნდი იყო. ფეხბურთელი მართალია ბავშვობიდანვე ,,წაართვი, მოატყუე და შეუგდეს“ პრინციპით იზრდება, მაგრამ იგი მას მინდორზე თამაშის და ვარჯიშის დროს მოეთხოვება. შენ მას ამის საპირისპიროდ ადამიანური და კაცური ქმედებები უნდა დაანახო, არ უნდა წაართვა , არ უნდა მოატყუო და ათასი სიბინძურე არ უნდა შეუგდო, თორემ თავს არ მოგახმარს და არ გაპატიებს, ხოლო თუ შენ მართალი ხარ და მან იგი მაინც გაგიბედა, იმის თავი უნდა გქონდეს, რომ ერთი ადგილი მიაყენებიო, და თუ ეს არ შეგიძლია მაშინ შენ უნდა წახვიდე.
რა მოხდა შემდეგ: 2013 წლის ბოლოს, გურიის მხარის ახალი ხელმძღვანელი დაარწმუნეს იმაში, რომ თურმე რეგიონში ყველაფერი რიგზეა და მხოლოდ ,,გურიაშია“ აღსადგენი სამართლიანობა და უნდა შეიცვალოს კლუბის ხელმძღვანელობა, ასევე მწვრთნელთა შემადგენლობაც. დღესაც თვალწინ მიდგას საკრებულოს თავმჯდომარის კაბინეტში შეკრებილი გუბერნატორის, გამგებლის და ამ შეხვედრაზე დამსწრეთა სახეები: ვერ უპასუხეს ჩემს მიერ დასმულ კითხვას, ამიხსენით მიზეზი რატომ უნდა წავიდეს კობა, მწვრთენელები, რა დააშავეს, გვერდში არ ედგა ქართულ ოცნებას, ლომის წვლილი არ მიუძღვის, რომ თქვენ დღეს გუბერნატორი , გამგებელი და საკრებულოს თავმჯდომარე გახდით, ფული რომ დაჭირდა კლუბს უკან დაიხია, შედეგი არ აქვს თუ რა? ვიკითხე კატეგორიულად და ვერ მივიღე ვერავისგან პასუხი. გამგებელს ენა არ ამოუღია , მეორე დღესაც იყო შემოტევა, მაგრამ ეს პროექტი ჩაუვარდათ. კობა და სხვები დარჩნენ, მაგრამ მოდით ყოველივე ამას შევხედოთ მეორე მხრიდან. ამ ფაქტის შემდეგ დაეცა თუ არა კლუბის ხელმძღვანელობის ავტორიტეტი ფეხბურთელების , თანამშრომლების და საერთოდ საზოგადოების თვალში. არის თუ არა ეს ფეხბურთის საზიანოდ გადადგმული ,,უნებლიე ნაბიჯი“ იმ შეთქმულებაში უნებლიეთ მონაწილეობა, რომელიც შემდეგ შედეგებში პოვებს ასახვას. რა თქმა უნდა, არის. მოკლედ ამ ,,ეგრეთწოდებულმა პროფესიონალებმა“ შეძლეს კობას მდგომარეობიდან გამოყვანა, ამას დაემატა მისი ოჯახური ტრაგედია და კობა წავიდა; მოვიდა გოგი, წავიდა გოგი -მოვიდა ოთარი, წავიდა ოთარი და მოვიდა ლადო, რომელიც მოსვლის დღიდან გაიძახის, ეს სად მოვედიო, რა შეცდომა დავუშვიო. ისე, მას მოერიდა ეტყობა ამის თქმა, მაგრამ მე გეტყვით, ეს არის კაცი, რომელსაც ხელფასს არ აძლევდნენ, მაგრამ კლუბს ემსახურებოდა საკუთარი მანქანით და პროკურორობის პენსიის ფულით ნაყიდი ბენზინით. ამის ანალოგი ალბათ მსოფლიოში არ მოიძებნება. მოდით ახლა საკადრო პოლიტიკის სხვა სტატისტიკასაც გადავხედოთ: ხუთ წელიწადში კლუბში შეიცვალა ხუთი დირექტორი და აღმასრულებელი დირექტორის მოვალეობის შემსრულებელი, ხუთი ფინანსისტი და ფინანსური დირექტორი. 15-ჯერ მთავარი მწვრთნელი,ხოლო გუნდში მოიწვიეს და გუნდიდან წავიდა 280-ზე მეტი ფეხბურთელი. თუ როგორი ფინანსური მდგომარეობა იყო და არის, ამაზე ფინანსურმა დირექტორმა ილაპარაკა. თუმცა მგონი უფრო მეტი კონკრეტიკაა საჭირო, რათა საზოგადოებისათვის ეს საკითხი უფრო ნათელი გახდეს, რათა პასუხგაუცემელი კითხვები მომავალში არ წარმოიშვას და თვითონ არ აღმოჩნდეს უხერხულ მდგომარეობაში.
-შეცდომებისგან გამოწვეულ ფაქტობრივ მდგომარეობებზე ვილაპარაკეთ, ნაწილობრივ ფინანსური, კადრების აგრეთვე ფეხბურთელებისა და მწვრთნელების შერჩევის მიმართულებით რაც თქვენი ფორმულირებით არის შეთქმულებაში უნებლიე მონაწილეობა. რას გვეტყოდით თქვენს პირად შეცდომებზე, რომელიც დაუშვით კლუბში მიმდინარე წელს, რვა თვის მუშაობის მანძილზე, თქვენც ხომ არ გახდით ამ შეთქმულების უნებლიე მონაწილე?
-ჩემი პასუხი ცალსახაა, რა თქმა უნდა მეც, ისე როგორც ყველა, თანამდებობისა და ფუნქციის მიუხედავად, უნებლიე მონაწილე გავხდით იმ დღიდან, როცა მე გავიგე, რომ მერაბ ჟორდანიას ინვესტორად მოსვლა და კლუბის ჩაბარება არარეალური იყო. მე ხომ თავიდანვე შემოთავაზებას კლუბში დირექტორად მოსვლაზე იმ პირობით დავთანხმდი, თუ ჩვენ და რაიონის ხელმძღვანელობა ყველა ერთად ხელს შევუწყობდით და დავაჩქარებდით ჟორდანიას მოსვლას , რადგანაც მე ხომ სხვაზე უფრო ვიცოდი ლანჩხუთლების გემოვნება და მოთხოვნილების დაკმაყოფილება ა(ა)იპ -ის პირობებში შეუძლებელი იყო. ამ ლოდინში დღეები სწრაფად მიქროდა, გუნდი თამაშს თამაშზე აგებდა, თანდათან მეც ამ წუმპეში ვიძირებოდი, მაგრამ იმედს არ ვკარგავდი, ლანჩხუთელებსაც ვარწმუნებდი, რომ ნუ გეშინიათ გუნდი არ გავარდება მეთქი, იმიტომ რომ ასე მჯეროდა. დღეს ამ ხალხს თვალებში ვეღარ ვუყურებ, ამ დროს სუფთა ვარ. შემდეგ, როცა 2017 წლის 21 აგვისტოს მერაბ ჟორდანიამ კლუბის განვითარების კონცეფცია და მარკეტინგის განვითარების შესანიშნავი პროექტი ოფიციალურად გამოაგზავნა გამგებლისა და საკრებულოს თავმჯდომარის სახელზე, ხოლო მათგან ეს დოკუმენტები დეპუტატის ბიუროს მეშვეობით ჩვენს პარლამენტარს მიეწოდა და ჩემი კომისიაზე მიცემული სიტყვა ქალბატონ ნინოსადმი რეალურად შესრულდა, კიდევ ერთხელ იმედი მომეცა, რომ საკითხი გადაწყდებოდა, მაგრამ ამაოდ, პასუხიც არავის მოუცია. 18 სექტემბერს, გია გურულმა დაადასტურა, რომ ამ ეტაპზე ჟორდანიას მოსვლა კლუბში არარეალური იყო, მას ამის შესახებ ინფორმაცია როგორც ჩანს პირველწყაროდან ჰქონდა. მთელი ღამე არ მეძინა, წასვლაზეც ვფიქრობდი, მაგრამ ეს ჩემი მხრიდან ღალატი იქნებოდა, ბოლომდე ბრძოლა გადავწყვიტეთ. სახლში ჩასატარებელი ზედიზედ სამი თამაშის იმედი მქონდა. სამივე წავაგეთ, დავრწმუნდი რომ გია გურული უიღბლო მწვრთნელი იყო და ის უნდა გადამდგარიყო. რითაც სამართლიანობის აღდგენისათვის გიგლა იმნაძეს და გიალო ჩხაიძეს დავაბრუნებდით და ეგებ ღვთის წყალობა დაგვბედებოდა. თუმცა მათგან კატეგორიული უარი მივიღეთ, რადგან მათ თავის დროზე უღირსად მოექცნენ და არ გვაპატიეს, თუმცა უფალმა მაინც გადმოგვხედა, როცა გიორგი ინაიშვილი გამოჩნდა, ხოლო დავით მახარაძე სეზონის ბოლომდე მთავარ მწვრთნელად მუშაობაზე დაგვთანხმდა. გუნდი სხვანაირად ათამაშდა, დარჩენილი შვიდი თამაშიდან_ ოთხი მოვიგეთ, რომელიც საკმარისი არ აღმოჩნდა . პლეიოფის თამაშების ჩათვლით, კვლავ უიღბლობა დაგვებედა. როდესაც შეთქმულებაზე ვლაპარაკობ, ამ სიტყვებში ზოგიერთმა შეიძლება თავისი თავი ამოიკითხოს, ამიტომ თუ აქამდე მოძღვართან არ ყოფილხართ, არ მოგინანიებიათ, აღსარება არ გითქვამთ და შენდობა არ გითხოვიათ, ჯობია ეს დროზე გააკეთოთ.
რაც შემეხება მე, ამ ეტაპზე 7 დეკემბრიდან გამოძიების დამთავრებამდე ჩემი ხელშეკრულება დროებით შეჩერებულია, შევხედავ როგორ განვითარდება მოვლენები, რა დასკვნები დაიწერება, იქნებ დასაჭერი და პასუხისგებაში ვარ მისაცემი (რა თქმა უნდა ცხონებული ილოს თვითმკვლელობას არ ვგულისხმობ) ,შემდეგ კი, მე გადავწყვიტავ და არა სხვა, სად გავაგრძელებ მუშაობას. თუ კლუბში კობა მირზაშვილი დაინიშნა, რომელსაც ყველაზე მეტი მორალური უფლება აქვს კლუბში დაბრუნდეს , მასთან აუცილებლად ვითანამშრომლებ, გააჩნია როგორ სტრუქტურას და სტრატეგიას ჩამოაყალიბებს; საქათმეში ახალი მამალი რომ უნდა გამოჩნდეს, ეს ფაქტია. ,,საქათმეში“ ამ შემთხვევაში მიშას მოგონილ ა(ა)იპ -ს ვგულისხმობ, ნგრევა რომ უნდა მოხდეს ეს გარდაუვალია, როგორ შეიძლება ა(ა)იპი და ფეხბურთი ერთად? ეს ხომ შეუძლებელი და არაფრის მომცემია. სხვათა შორის ამ სტრუქტურულ ცვლილებებზე ოთხი წლის უკან სპორტის მინისტრი ლევან ყიფიანი კატეგორიულად ავალებდა შესაბამის სამსახურებს, მოეხდინათ აღნიშნული ნონსენსის გასწორება, ოთხი წლის შემდეგ ამის გამოსწორება რომელიღაც მუნიციპალიტეტმა ხომ უნდა დაიწყოს. სხვათა შორის, ლანჩხუთის მერიის ვებ გვერდზე ბატონი ალეკოს ინიციატივა წავიკითხე, კლუბის მართვის აუქციონზე გატანასთან დაკავშირებით, რომელიც ძალიან მომეწონა, თუმცა არ ვიცი ბოლომდე რას გულისხმობს. მას არჩევის შემდეგ სულ ერთხელ შევხვდი. შემდეგ ეს ტრაგედია მოხდა და არ დამანახოთო იძახის თურმე. ძალიან გამიკვირდა , თუმცა არ ვუმტყუნებ, მისი კონსიგლიორებისგან ისეა ,,დაგრუზული“, მოვა დრო და ჩვენ ერთმანეთს ჩავხედავთ თვალებში. რაც შეეხება აუქციონის ჩატარების იდეას, მას მივესალმები, მაგრამ თუ აუქციონის პირობები მან ამჟამინდელ მის ,,კონსიგლიორებს“ დააწერინა და კომისიის წევრებიც შემდეგ ისინი იქნებიან, წინასწარ გეტყვით, რომ არაფერი გამოვა და ერთ წრეზე ვივლით. ბატონო ალექსანდრე, თქვენ დღეს იმ რაიონის არჩეული მერი ხართ, სადაც იმპერიის პირობებშიც კი, რეფორმები თამამად განხორციელდა და პირველი პროფესიული საფეხბურთო კლუბი ჩამოყალიბდა, 440 სხვადასხვა პროფილის კოოპერატივი ფუნქციონირებდა, ხოლო პირველი სააქციო საზოგადოება საქართველოში, სწორედ ლანჩხუთში ჩამოყალიბდა და რომლის თავმჯდომარე პირველი სამი წლის განმავლობაში მე ვიყავი, ასე რომ, თამამად იმოქმედე, ნუ გეშინია და თუ შეძლებ, რომ ველური სოციალიზმიდან ქვეყნის გამოყვანის პირველი ნაბიჯები სწორედ ლანჩხუთში გადავდგათ და ამის ელმავალი თქვენ იქნებით, თქვენი სახელი ემზარ ბერიძის, თემურ გუგუნავას, ალბერტი ლომაძის და სხვათა შემდეგ, ლანჩხუთის ისტორიაში ოქროს ასოებით ჩაიწერება. თუ ამას არ იზამთ, იცოდეთ უნებლიეთ მოხვდებით იმ გზაზე, რომელიც ,,გურიას“ დიდებამდე არ მიგვიყვანს.
-მოდით, კიდევ ერთხელ დავუბრუნდეთ გურიას თემას. როგორ წარმოგიდგენიათ მისი მომავალი. რა უნდა გაკეთდეს მისი დიდების აღსადგენად?
-1.დავეთანხმები ბატონ ალექსანდრეს და გამოცხადდეს აუქციონი, კლუბის პირობა დადებული მიყიდვის წესით უკეთესი ინვესტორის (შემდგომ ,,მეპატრონის“) გამოსავლენად. მთავრობა დავარწმუნოთ, რომ ლანჩხუთის ,,გურია“ ვერ იარსებებს გრიგოლეთის საწვრთნელი ბაზის გარეშე, რადგან ლანჩხუთი არ არის თბილისი, ბათუმი, რუსთავი, ქუთაისი და ა.შ. და აქ შეუძლებელია ფეხბურთელი მოიზიდო ბაზის გარეშე. ამიტომ იგი უზურფრუქტით მინიმუმ 25 წლით გადაეცეს ინვესტორს მართვის უფლებით.
2. გრიგოლეთის საწვრთნელ ბაზაზე საინვესტიციო ვალდებულებების (ახლის მშენებლობის, რეკონსტრუქციის,რემონტის და ა.შ.)შესრულებისათვის დახარჯული თანხები ჩაეთვალოს ინვესტორს უზურფრუქტისათვის გადასახდელ ყოველწლიურ ღირებულებაში.
3.ბაზის საინვესტიციო ვალდებულებებში კონკრეტულად უნდა გაიწეროს ასაშენებელი, სარეკონსტრუქციო თუ სარემონტო სამუშაოები მისი სახარჯთაღრიცხვო ღირებულებებით და შესრულების დროით. ინვესტორს უნდა მიეცეს მხოლოდ ფეხბურთის და ბავშვთა ფეხბურთისათვის საჭირო ობიექტების მშენებლობის უფლება.
4.მუნიციპალიტეტი ინვესტორს უსასყიდლოდ უნდა მოემსახუროს სტადიონით და მისი ყველა ინფრასტრუქტურით. ხოლო უზურფრუქტის ღირებულებაში უნდა იყოს ზუსტად ის თანხა, რა მშენებლობებისა და რემონტების ღირებულების განხორციელებასაც ივალდებულებს ინვესტორი, მაგრამ წელიწადში არანაკლებ 300 000 ლარზე ნაკლები.
5. ინვესტორმა უნდა ჩამოაყალიბოს სააქციო საზოგადოება ,,ლანჩხუთის გურია“ იმ საწესდებო კაპიტალის ოდენობით, რა ქონებაც გადაეცა უზურფრუქტით, პლუს კლუბის ქონების ღირებულება ბრენდის ჩათვლით. ყოველივე ამაზე უნდა იყოს აუდიტის დასკვნა.
6. ინვესტორი ვალდებული უნდა იყოს სააქციო საზოგადოების დაფუძნებაში მიაღებიოს მონაწილეობა იმ ლანჩხუთელებს, რომლებიც ადრე იყვნენ კლუბის წევრები და ამჟამადაც გააჩნიათ ამის სურვილი და მათ მიერ შემოტანილი თანხის პროპორციულად უნდა გადაეცეთ აქციები. ამ ფორმით საზოგადოების ჩართულობა სააქციო საზოგადოების ჩამოყალიბებაში გამორიცხავს ამ თემის ირგვლილ აგორებულ სხვადასხვა ჭორებს, იგი უფრო აქტიური და ღირსეული გულშემატკივარი ხდება. ხოლო ასეთი წევრების რაოდენობა და მათი წილი სააქციო საზოგადოებაში ჩემი აზრით არ იქნება 5 %-ზე მაღალი. დანარჩენი 95% კი მთლიანად ინვესტორის ანუ მსხვილი აქციონერის ხელში იქნება, რომელიც მას შეეძლება მართვისათვის განკარგოს მხოლოდ ფეხბურთის სფეროში მოღვაწე პიროვნებებზე და სხვა ცნობილი კლუბების მეპატრონეებზე და აქციონერებზე.
7. ინვესტორი ვალდებული უნდა იყოს, არ შეცვალოს ,,გურია“-ს ლოგო და სხვა ატრიბუტიკა, ხოლო მისი უფლება უნდა იყოს ეწეოდეს მეწარმეობას და კომერციულ საქმიანობას ადგილობრივი პირობების მაქსიმალური ათვისების ხარჯზე, რათა კლუბს შეუქმნას შემოსავლის მყარი წყაროები და მაქსიმალურად დაასაქმოს ადგილობრივი მოსახლეობა.

ამის გარდა, არის მთელი რიგი საკვანძო ორგანიზაციული საკითხები, რომელიც მუშაობის პროცესში გამოჩნდება და დაიხვეწება, მისი გაჟღერება კი დღეს სავალდებულოდ არ მიმაჩნია. დაინტერესებულ პირებს კი შემიძლია უფასო კონსულტაციები ჩავუტარო, მთავარია დავიწყოთ და გადავდგათ გაბედული ნაბიჯები კანონის ფარგლებში, რათა კიდევ ერთხელ არ დავკარგოთ ისეთი პოტენციური და რეალური ინვესტორები, როგორებიც იყვნენ თავის დროზე : 2013 წელში მარინა თოთლაძე და მისი პარტნიორები, 2015 წელში გამგებლის მიერ მოყვანილი ყაზახი მილიარდელი ბიზნესმენი, რომლის საცნობარო საინფორმაციო ბუკლეტზე პირადად მე მთელი ერთი კვირა ვმუშაობდი, 2016 წელში ყოფილი დეპუტატის თემურ ჩხაიძის მოყვანილი ესპანური აგროინდუსტრიული ჰოლდინგის ჯგუფის წარმომადგენლები, რომლებიც ორი პროექტის: საფეხბურთო კლუბის ინვესტირებას და თევზის ინტენსიური ტექნოლოგიით წარმოების განხორციელებას გეგმავდნენ. 2016 წლის აგვისტოდან დაწყებული და დღემდე ბურუსით მოცული შპს ,,ინტერკორის“(მერაბ ჟორდანიას კომპანიის) საინვესტიციო წინადადებები, ხოლო, რაც ახლა ბოლო ერთი კვირის განმავლობაში კობას მიერ მოყვანილი უკრაინული ბიზნესჯგუფის შემოთავაზებული წინადადებების შესახებ შევიტყვე, ჩემთვის წარმოუდგენელია, ასეთი შანსის ხელიდან გაუშვა, თანაც იმ მომეტში, როცა კლუბის ფეხბურთელებით დაკომპლექტება, უკვე დაგვიანებულია და ყოველდღიურად გვიანდება.
თორნიკე ჯიჯიეშვილი

,,მთელი 2013- 2017 ელები მიმდინარეობდა შეთქმულება ,,გურიას“ წინააღმდეგ.“

tengoo,,ამხელა თანხით რომ აფინანსებდნენ კლუბს საკრებულო და მუნიციპალიტეტი, არ უნდა დაინტერესდნენ როგორ იხარჯება ეს ფული?!“

,,ცუდი მენეჯმენტი ,,გურიაში“ კი არ იყო, არამედ იმ შენობაში, სადაც იჯდა ლანჩხუთის მუნიციპალიტეტის ხელმძღანელობა“
,,მთელი 2013- 2017 ელები მიმდინარეობდა შეთქმულება ,,გურიას“ წინააღმდეგ.“
როგორ პასუხობენ ბრალდებებს ,,გურიას“ ყოფილი დირექტორატის წევრები და რა კონტრარგუმენტები აქვთ მათ?!
როგორც მოგეხსენებათ, ,,ჰო და არასთან“ არსებულ საზოგადოებრივ დარბაზში -,,თავისუფალი სახლი“ რამდენიმე დღის წინ გაიმართა დისკუსია ,,გურიას“ თემაზე. ამ შეხვედრამ დიდი ინტერესი გამოიწვია საზოგადოებაში, ზოგიერთი უკმაყოფილო დარჩა იმ ფაქტით, რომ აღნიშნულ შეხვედრას არ ესწრებოდა, მაგრამ ჩვენ გარკვევით გვეწერა, რომ დასწრება თავისუფალი იქნებოდა და ნებისმიერ დაინტერესებულ პირს შეეძლო მოსულიყო. ,,ჰო და არამ“ ვრცელი წერილი მიუძღვნა ამ შეხვედრას, წაიკითხავდით, რომ გამომსვლელთა უმრავლესობამ ,,გურიას“ ამ მდგომარეობაში მიყვანა დააბრალა მუნიციპალიტეტის ყოფილ გამგებელს ზაზა ურუშაძეს, აგრეთვე კლუბის აწ ყოფილ ხელმძღვანელობას_ლადო გვარჯალაძეს, თენგიზ კიკვაძეს და ნუგზარ ჩხაიძეს. ბრალდებებს გამოეხმაურნენ საფეხბურთო კლუბ ,,გურიას“ ყოფილი აღმასრულებელი დირექტორი, მისი მოადგილე და ფინანსური დირექტორი.
თენგიზ კიკვაძე: ,,დავიწყებ იმით, რომ არ მაინტერესებს რა ხდებოდა ჩემს მოსვლამდე კლუბში, არავის ჯიბეში არ ვუყურებ და არც ვაკონტროლებ. მჯერა, რომ ყველა დამსახურებულად იღვწოდა გურიისთვის, ისე როგორც შეეძლო, ღმერთმა ყველას გაუმარჯოს თავის გზაზე. მაგრამ, როდესაც საკითხი ეხება ,,გურიას“ დღვანდელ მდგომარეობას, ჩვენ პასუხისმგებლობას არ გავურბივართ, პირიქით, ყველაზე მეტად თუ ვინმეს სტკივა გული ამ თემაზე, ეს ლადო გვარჯალაძე, თენგო კიკვაძე და ნუგზარ ჩხაიძეა. როგორ შეიძლება, ერთი მოსმით ხელი შეგვახოცონ და თქვან, რომ ჩვენი ბრალია ყველაფერი. ქვევით მოგახსენებთ, რა არის აღმასრულებელი დირექტორის და ფინანსური დირექტორის მოვალეობა, რომელიც გაწერილია მკაცრად. ის თანხები, რომლებიც მოდიოდა ადგილობრივი ბიუჯეტიდან და თითოეული ლანჩხუთელის ჯიბეს აკლდებოდა, ის უნდა წარმართულიყო სწორად და მართებულად. სრული პასუხისმგებლობით ვაცხადებ, რომ ყველა შესყიდვა მაქვს გაკეთებული კანონის სრული დაცვით, მიმიწვდება გასული წლების დოკუმენტაციაზე ხელი და გეტყვით: 28 000 ლარად არის ნაყიდი ფორმები, როდესაც მე 5 000 ლარი გადავიხადე, მინახავს ოთხ თვეში დახარჯული მილიონი, მაგრამ ამაზე იმან აგოს პასუხი, ვინც მაშინ ხელმძღვანელობდა გუნდს და ეს ჩემი საქმე არაა. როდესაც მოვედით კლუბში დაგვხვდა 877 000 ლარი ვალი, საუბარია 2016 წლის დასაწყისზე. როგორც ფინანსურმა დირექტორმა, საკრებულოში დავაყენე საკითხი, რომ კლუბს მიეღო 2 250 000 ლარის დახმარება, რათა გასტუმრებულიყო ვალი და დანარჩენი მოხმაროდა კლუბს. საკრებულომ ხმამაღლა თქვა, თუ გამგეობა გამონახავდა თანხას, ისინი თანახმა იყვნენ დაგვხმარებოდნენ. მაგრამ, გამგეობამ ვერ მოიძია ხსენებული თანხა და გადმოგვცეს 1 250 000 ლარი. ახლა გეკითხებით, როცა ხსენებულ თანხას გაძლევენ და აქედან 877 000 ლარი ვალი გაქვს გასასტუმრებელი, როგორ უნდა აწარმოო სწორი მენეჯმენტი, როცა არ იცი, რომელი მევალე გიჩივლებს სასამართლოში, ვინ მოგადგება კარზე და ა.შ. ყველაფერი წავიდა სპონტანურად, ჩვენი პირადი ურთიერთობებით ვაჩერებდით ფირმებს, კერძო პირებს, რათა არ ეჩივლათ სასამართლოში და ცოტ-ცოტას ვუხდით, კლუბს რომ ზიანი არ მიდგომოდა. გარდა ძირითადი გუნდისა, კლუბს საპატრონო ჰყავდა U10, U15, U17, 19; საჭირო იყო მათი დაფინანსება და ტრანსპორტირება, გარდა ამისა, უნდა მიგვეხედა ბაზისთვის. დამიჯდეს ერთი ის ხალხი, თქვენთან რომ ბრძანდებოდა და ცუდ მენეჯმენტზე საუბრობდა, მიანგარიშოს როგორ შეძლებს 1 250 000-დან მიხედოს ყველა იმ პრობლემას და ვალს, რაც ჩამოვთალე და თან შეძლებს გუნდის უმაღლესში დატოვებას. არ ვიტყვი მეთქი წინამორბედებზე, მაგრამ ჩვენ რომ გვლანძღავენ, საინტერესოა რატომ არ გადაიხადეს ვალი, როგორ დაიხარჯა ზოგიერთს დირექტორობის დროს ხუთ თვეში 700 000 ლარი და რატომ არ გადაიხადა დავალიანებები, მანამდე მიღებული 900 000 ლარიდან, კიდე რომ ვალი წარმოიშვა, ისიც რატომ არ გადაიხადეს და რატომ მაინცადამაინც ჩვენ_კიკვაძემ, გვარჯალაძემ და ამ შემადგენლობამ მივიკელით ყველაფერი იმისთვის, რომ ვალი შეგვემცირებინა. დიდი ძალისხმევის შედეგად მოვახერხეთ, რომ სტადიონი გასულიყო ცალკე და მასზე პასუხისმგებლობა აეღო მუნიციპალიტეტს, რათა უსასყიდლოდ მომსახურებოდა ,,გურიას“, აქაც რა მოხდა? 100 000 ლარი მოაკლეს კლუბს. დაიწყო სტადიონმა ფუნქციონირება. 2016 წლის დასაწყისში, ადგილობრივმა ბიუჯეტმა გამოგვიყო ვალდებულების კლების მუხლით როგორც მახსოვს 520 000 ლარი, რითაც დავიწყე ვალების გასტუმრება, თუმცა ესეც ნაწილობრივ, რათა სასამართლოში არ შეეტანათ ფირმებს საჩივრები. ეს ვალები იყო 2012, 13, 14 და 2015 წლების. სასამართლოში გიჩივლა ხომ პიროვნებამ და მოიგო, ამის შემდეგ ყველა ვადაგადაცილებულ დღზე ემატება საურავი, სწორედ ამის გამო მაქსიმალურად ვცდილობდით სასამართლოს აცილებას.
-თუმცა თქვენ ვერ აიცილეთ თავიდან თემურ ლორიას და თენგიზ პატარაიას სასამართლო, რომელიც წააგეთ...
-ხაზგასმით ვამბობ, რომ ეს ადამიანები განთვისუფლდნენ უკანონოდ და ეკუთვნოდათ კომპენსაცია, ღრმა პატივისცემას გამოვთქვამ ამ პიროვნებების მიმართ. მაგრამ მეორე საკითხია, მართლა მოიგეს სასამართლო თუ რა მოხდა. ისინი გაბრაზებული იყვნენ იმ ხელისუფლებაზე, ვინც გაანთავისუფლა ისინი სამსახურიდან, იჩივლეს საქართველოს ფეხბურთის ფედერაციასთან არსებულ დავების გამხილველ ტრიბუნალში და ფულის გადახდა მოუწია კლუბს. ახლა რა მოხდა, სასამართლო ტრიბუნალზე ჩვენ წავაგეთ, გავასაჩივრეთ უზენაეს სასამართლოში ტრიბუნალის გადაწყვეტილება. ამ პერიოდში ხდება საქართელოს ფეხბურთის ფედერაციაში ცვლილებები, წავიდა ძველი და მოვიდა ახალი. დაგვიბარეს და გვითხრეს: , დაგიდგებით გვერდით და გადაიხადეთ ეს ფულიო“. ყველაფერს აქვს თავისი წესები, კი ბატონო მართლები იყვნენ ლორია და პატარაია, მაგრამ ყველა ვინც მოითხოვდა თანხას, პირდაღებული და ხელებჩამოშვებული ხომ ვერ მივცემდით. მაგრამ, რა გვექნა, გავითვალისწინეთ ფედერაციის თხოვნა, გამოვიწვიეთ უზენაესი სასამართლოდან წერილი და ჯამში 47 000 ლარამდე გადავუხადეთ ამ ორ ადამიანს. ამას გარდა ძველი მევალეების ხვეწნა-მუდარაში ვიყავით მუდამ, მაგრამ ყველა არ ითვალისწინებდა და სასამართლო გზით მიჰქონდათ კლუბის ბიუჯეტიდან, ანდა რას ვემართლებით იმ ხალხს.
-რა მოხდა 2017 წელს, ფეხბურთის განვითარების ფონდმა თქვენ გამოგიყოთ 700 000 ლარი. რაში დაიხარჯა ეს ფული და რატომ ვიწვნიეთ ასეთი კრახი?
-მყარად ვიცოდი, რომ 2017 წელს გვექნებოდა 700 000 ლარი დაფინანსება და არცერთი ზედმეტი თეთრი. მივედი მაშინ საკრებულოში და ღიად განვაცხადე, რომ როდესაც კლუბს აქვს 550 000 ლარამდე ვალი და ფინანსდება 700 000 ლარით, ის ვერანაირად ვერ მოახერხებს წარმატებას მიაღწიოს მეთქი. ახლა სად წავიდა ეს 700 000 ლარი: აქედან 80 000 ლარი ჩავურიცხეთ ფეხბურთის ფედერაციას, ანუ საწევრო. ხოლო, 120 000 ლარამდე, ასევე გადავიხადე ძველი ვალი, დაახლოებით 2017 წლის საანგარიშო პერიოდში ეტაპოვრივად შემოდიოდა სარჩელები სხადასხვა პირებიდან და მომწოდებლებიდან, დაახლოებით 50 000 ლარამდე ესეც იქნა გადახდილი. და იცით რატომ? თუ გუნდი ლიცენზიას ვერ აიღებდა მაშინ მონაწილეობას ვერ მიიღბდა პრო2-ში. ამისთვის საჭირო იყო ფეხბურთელების დავალიანება სრულად გადამეხადა, რათა მათ არ ეჩივლათ და ლიცენზია აგვეღო. მიუხედავად იმისა, რომ ,,გურიას“ ჰქონდა ნახევარი მილიონი ლარი ვალი, მოვახერხე და ლიცენზია წამოვიღე, მაგრამ ეს რა ხვეწნა-მუდარის, დაჩოქების ფასად დაუჯდა თენგო კიკვაძეს და ლადო გვარჯალაძეს, ამას ფეხბურთის საქმიანობაში ჩახედული ხალხი მიხვდება. დაგვრჩა 50 000 ლარი, ეს ის დროა, როდესაც უნდა მოიწვიო მწვრთნელები, ფეხბურთლები დავიწყოთ ფულის ხარჯვა. როგორც მახსოვს 2017 წლის დასაწყისში მიმდინარეობდა მოლაპარაკება ადგილობრივ კადრებთან, მოეწყო საფეხბურთო სამყაროს წარმომადგენლების შეხვედრის ორგანიზაცია გამგეობის ადმინისტრაციულ შენობაში, იმ დღეს მე თბილისში წავედი რიგი დოკუმენტების წარსადგენად ფედერაციაში, შეხვედრას როგორც მითხრეს ესწრებოდნენ გიალო ჩხაიძე, გიგლა იმნაძე, გია გოგუა, თემურ ლორია და სხვები. შეთანხმდნენ, რომ გიალო ჩხაიძე იქნებოდა მთავარი მწვრთნელი, გიგლა იმნაძე მისი მოადგილე და გია გოგუა მეკარეების მწვრთნელი. 2017 წლის 7 თებერვალს 9 ლანჩხუთელი ფეხბურთელი და სამწვრთნელო შტაბის წევრები გავაგზავნეთ ქალაქ თბილისში ზბორებზე და პარალერულად უნდა მოეწვიათ გამოცდილი ფეხბურთელები, ზუსტად მახსოვს მე და აღმასრულებელი დირექტორი ჩავედით თბილისში, შევხვდით სამწვრთნელო შტაბის წევრებს და გავაცანით ჩვენი ფინანსური მდგომარეობა. ბიჭებო, ასეთი სიტუაცია გვაქვს, სულ გვაქვს თვეში 50 000 ლარი ხარჯვით ნაწილში, აქედან 35 000 ლარი უნდა ვიკმაროთ მთლიანად სახელფასო სექტორში, ხოლო დარჩენილი 15 000 ლარი საჭიროა ტრანსპორტირებისთვის, კვებისთვის და სხვადასხვა საორგანიზაციო საკითხებისთვის მეთქი“.
უბრალო არითმეტიკაა 2011, 2012,2013 და სხვა წლებში ლარის კურსი დოლართან მიმართებაში რა იყო და დღეს რა არის, პირობითად ავიღოთ 700000 ათასი ლარი, საშუალოდ რამდენი იყო იმ წლებში და დღეს რამდენია, მისი მსყიდველობითი უნარი როგორია დღეს, ასევე აქვე მინდა აღვნიშნო გამგეობის და საკრებულოს თანადგომა იმ თანხების მოძიებაში, რომელსაც კლუბის ანგარიშზე რიცხავდნენ მთელი ის წლებში , რომელიც ჩემამდე იყო და ჩემს დროსაც.
-ბატონო თენგიზ, ,,თავისუფალ სახლში“ ხშირად გაისმოდა ბრალდებები თქვენს მიმართ, ამბობდნენ, რომ ყოფილ პროკურორს და პოლიციის უფროსს ფეხბურთში არაფერი ესაქმება. გამომდინარე იქედან, რომ თქვენ პროფესიულად არაფერი გაკავშირებდათ სპორტთან, მართლა გასაკვირია, რატომ აიღეთ საკუთარ თავზე ამხელა პასუხისმგებლობა?
-წავიკითხე თქვენს გაზეთში გამოთქმული ბრალდებები ჩვენს მიმართ, მჯერა იქ შეკრებილი საზოგადოება განიცდის ,,გურიას“ თემა, მაგრამ, ძალიან შეურაცხყოფილი ვარ იმით, რომ პოლიციელის მუნდირს, ასე უხეშად და აუგად იხსენიებენ. თენგიზ კიკვაძე ამაყობს იმით, რომ იყო, არის და იქნება პოლიციელი. ამაყობს იმით, რომ არის პოლიციის პოლკოვნიკი. ასევე მე ვიყავი კაცი, რომელსაც 100-ზე მეტი პოლიციელის ბედი ებარა და არცერთს თმის ღერი არ ჩამოვარდნია. თქვენი გაზეთით კიდევ ერთხელ მინდა იმ დაზარალებულებს ბოდიში მოვუხადო ვისი საქმეებიც ჩემი მუშაობის პერიოდში დარჩა გაუხსნელი, მაგრამ შემდგომ წლებში, სადაც კი მიმუშავია ყოველთვის ჩემი ლანჩხუთის და ლანჩხუთელების გვერდით ვიყავი, რაც შეეხება, ,,გურიაში“ ჩემს ფინანსურ დირექტორობას, მოვიდნენ და შემამოწმონ. შემეჯიბრონ ამ საქმეში, თუ ასე გულით სწადიათ. ხმამაღლა ვამბობ, კლუბის ფინანსურ საკითხებში, ჩემი მუშაობის დროს, ვართ პასუხისმგებლები მე, მურმან ხუხუნაიშვილი და ბაჩანა ზაქარეიშვილი. არანაირად, აღმასრულებელ დირექტორს არ გადავუნაწილებ ამ პასუხისმგებლობას. თავდაპირველად, ,,გურიაში“ მოვედი სამი თვით, მაგრამ არ ვარ მიჩვეული ბრძოლის ველიდან გაქცევას. თუმცა მეც მიმტყუნა ნერვებმა და რამდენიმეჯერ განცხადება დავწერე წასვლაზე, თუმცა არ დაკმაყოფილდა. თუ ვინმე დაადასტურებს, რომ ლადო გვარჯალაძემ და კიკვაძემ ეხვეწა ვინმეს სამსახურში გაჩერება, მზად ვარ ლანჩხუთი დავტოვო, პირიქით კი ხდებიოდა. მოვახერხე და 877 000 ლარი ვალი, 350 000 ლარზე დავიყვანე. შემეძლო, ოქტომბერში წავსულიყავი სამსახურიდან, ან ნოემბერში და ის სირცხვილი ამეცილებინა თავიდა, რასაც ,,გურიას“ დაქვეითება ჰქვია. მაგრამ, ბოლომდე მჯეროდა იმ საქმის, რასაც ვაკეთებდი. მრცხვენია, მაგრამ ვამბობ, თითქმის ყველა მაღაზიის ვალი მაქვს კლუბის გამო, ძალიან ბევრთან შევირცხვინე თავი. ეს რისთვის გავაკეთე? მხოლოდ და მხოლოდ ,,გურიას“ გამო. იცით, რომ ადმინისტრაციის თანამშრომლებმა ხელფასები შევიმცირეთ იმის გამო, რომ კლუბს არ მიკლებოდა? იცით, რამდენი თვის სახელფასო დავალიანება გვაქვს მთლიანად ადმინიისტრაციის? გავანახევრეთ ვალები, შევიმცირეთ ხელფასები, დაგვედო კლუბის გამო პირადი ვალები და ახლა გამოდიან გვლანძღავენ და გვაგინებენ. ერთი ზარი განახორციელა მერიამ, წადით სამსახურიდანო და წავედით. არ ვარ იმის კაცი, ვინმეს ავეტუზო კარებთან, სხვებისგან განსხვავებით. თითოეულ თეთრზე ვარ პასუხისმგებელი. რაც ფინანსური დირექტორის მოვალეობაში შედიოდა, ყველაფერი პირნათლად შევასრულე. ყოფილი პოლიციის უფროსი და ყოფილი პროკურორი მიუღებელი არის დამნაშავეთა სამყაროსთვის, ესე იგი გავედით პენსიაზე და დაველოდოთ უნდა იმ ქვეყნად როდის წაგვიყვანს უფალი, არ არის ეს სწორი მიდგომა, მე ძალიან ბევრი პიროვნების წარსულიც ვიცი და მათი ოჯახური მდგომარეობა, რომელიც ამ საზოგადოებისათვის მიუღებელია, მაგრამ სადმე გინახავთ რომ გამოვსულვარ და რაიმე მეთქვას, ვინც ჩემს ყოფილ პროფესიას შეეხო მათ გული მატკინეს, ალბათ იმათაც ვინც მუნდირს ატარებს დღეს.
-ყველა საუბრობს გაბერილ შტატებზე...
-ძალიან კარგი, რომ ეს საკითხი წამოწიეთ. აგერ მაქვს უწყისები: ნახეთ ახლა 2014 წელი- 109 კაცი, 2015 წელი-102 კაცი, ჩვენი მოსვლის შემდეგ ეტაპობრივად იკლებს მათი რიცხვი, ჯერ დავიყვანეთ 88 კაცამდე, შემდეგ კი 58-მდე, 2017 წლის საანგარიშო პერიოდში საშუალოდ დასაქმებულ ადამიანთა რიცხვი შეადგენს 50: მათ შორის 22 ფეხბურთელი, 7 ძირითადი გუნდის სამწვრთნელო შტაბის წევრი, 7 ჭაბუკთა ლიგის სამწვრთნელო შტაბის წევრი, ხოლო დანარჩენი წარმოადგენდა ადმინისტრაციის და ბაზის თანამშრომლებს, აღნიშნულ საშტატო შემადგენლობას ითხოვს ლიცენზირების პროცესი. რაც ნიშნავს იმას, რომ თითქმის გავანახევრეთ სახელფასო ვალდებულებები. არ იქნება მართებული თორემ სიამოვნებით წარმოგიდგენთ სახელფასო ნუსხას თუ ვის რამდენი ქონდა. ამასთან ერთიც მინდა დავამატო ის ადამიანები, რომლებიც წლების განმავლობაში ხელფასებს ღებულობდა, დღეს მოგვადგა და გვაგინებს, ერთი კი მაინტერესებს როდისმე საკუთარ თავს კითხვა დაუსვეს რაში ღებულობდნენ, ანდა მეორე ყველა საინფორმაციო საშულებების გამოცემას მივესალმები, მაგრამ რამდენად სწორია ყველა ნომერში გურია იყოს აუგად მოხსენიებული და განსაკუთრებით მისი ხელმძღვანელობა, თქვენ დალოცვილის შვილებო თენგომ და ლადომ შეგიშალათ ხელი მოსვლაზე, მოდით მიხედეთ და კიდევ შეძლების და გვარად დაგეხმარებით. არა ლანძღვა-გინებით არამედ საქმით.
-პირადად ადმინისტრაცია ერეოდით ფეხბურთელების მოყვანაში ან გაშვებაში?
-პირდაპირ გიპასუხებთ, არც ერთი ფაქტი არ არსებობს ჩემი და აღმასრულებელი დირექტორის მხრიდან, ვინმეს მოყვანაში მიგვეღო მონაწილეობა. ჩვენი მოვალეობა იყო მათთვის შეგვექმნა ყველა პირობა სათამაშოდ, იმ მწირი ბიუჯეტით, რომელიც გვქონდა.
-როგორც ვიცი, მიმდინარე წელს კლუბში შემოსული იყო აუდიტი, საინტერესოა რა დასკვნა დადო აუდიტმა?
-აგერ, აუდიტის მიერ დაწერილ დასკვნის პატარა ამონარიდს წაგიკითხავთ: ,,ჩვენ გავესაუბრეთ ადმინისტრაციის მუშაკებს, შევისწავლეთ მათი კვალიფიკაცია, გამოცდილება და დავრწმუნდით, მათ პროფესიონალიზმში და პატიოსნებაში. ამასთან ერთად, შემოწმების პერიოდში ზეპირი ინფორმაციის მიღების მიზნით, გამოკითხვა- საუბარი ჩავატარეთ: ა(ა)იპ ლანჩხუთის მუნიციპალიტეტის საფეხბურთო კლუბ ,,გურია“-ს აღმასრულებელი დირექტორთან ბატონ ვლადიმერ გვარჯალაძესთან; ,, გურია“ -ს ფინანსურ დირექტორთან, ბატონ თენგიზ კიკვაძესთან; შესყიდვების მთავარ სპეციალისტთან, ბატონ ერეკლე სარჯველაძესთან; ბუღალტერ მურმან ხუხუნაიშვილთან; დავადგინეთ წარმოდგენილი ფინანსური ანგარიშების არსებითობის დონე, რისთვისაც ვიხელმძღვანელეთ არსებითობის დონის დადგენის ასს320- ,,არსებითობა აუდიტის დაგეგმვისა და ჩატარების დროს“ პრინციპების საფუძველზე შემუშავებული შიდა საფირმო სტანდარტით“. ამას ხელს აწერს:საჯარო სექტორის აუდიტორი, აუდიტორული შემოწმების ჯგუფის ხელმძღვანელი, თამაზ ბუკია. ასევე, შპს აუდიტორული ფირმა ,,ლაზიკა აუდიტი“-ს აუდიტორ-დირექტორი, ეკონომიკის აკადემიური დოქტორი, პროფესორი_მამუკა ზარანდია. მე მგონი, ამით ყველაფერია ნათქვამი.



თენგიზ კიკვაძის შემდეგ, კლუბის ყოფილ აღმასრულებელ დირექტორის მოვალეობის შემსრულებელს ლადო გვარჯალაძესაც ვთხოვეთ ჩვენს კითვებზე ეპასუხა:
-ბატონო ლადო, ბრალდებები თქვენი მისამართითაც უხვად ისმის. პროკურორმა კაცმა, რატომ გადაწყვიტეთ გამხდარიყავით ,,გურიას“ აღმასრულებელი დირექტორი?
-პირველ რიგში, ვიტყვი იმას, რომ პროკურორობით ვამაყობ და მთელი ჩემი კარიერა ღირსეულად გავატარე. ადამიანის ლანძღვა იმის გამო, რომ ის იყო პროკურორი, არის უმეცრება. თქვენს დარბაზშში მყოფ გამომსვლელებს ვიცნობ, ვიცი მათი წარსული და პატივს ვცემ. კარგი იქნებოდა მათაც გამოეხატათ ეს ჟესტი და უსაფუძვლო ბრალდებებზე არ გადმოსულიყვნენ. რას ჰქვია ფეხბურთი არ მიყვარს. მე კლუბში მოვედი იურისტად, შემდეგ მთხოვეს დროებით გამხვდარიყავი კლუბის აღმასრულებელი დირექტორის მოვალეობის შემსრულებელი, ,,დროებით“ დღემდე გაგრძელდა. ვთქვი და გავიმეორებ, რომ ასეთი შეცდომა ცხოვრებაში არ დამიშვია. თუმცა, არ ვფიქრობ იმას, რომ ჩემის გამოისობით კლუბს რაიმე ზიანი მიადგა. რაც შედიოდა აღმასრულებელი დირექტორის მოვალეობაში_ ხელმძღვანელობა გაუწიოს კლუბს, ხელშეკრულებები გაუფორმოს თანამშრომლებს, მწვრთნელებს და მათ მიერ წარმოდგენილ ფეხბურთელებს, არ დააგვიანოს ხელფასები, მისცეს მათ ნორმალური სავარჯიშო პირობები, კარგად გამოკვებოს და ა.შ. ამას, ზედმიწევნით კარგად ვასრულებდი. ჩვენ არც წახალისება დაგვიკლია მწვრთნელ-ფეხბურთლებისთვის და საჭიროების შემთხვევაში არც ჯარიმებს მოვრიდებივართ. მაგალითად, წყალტუბოს ,,სამგურალთან“ მოგების შემდეგ, მწვრთნელებმა და ფეხბურთელებმა მიიღეს 500-500 ლარი პრემიის სახით. ვინაიდან, საპლეიოფო თმაშები თელავის ,,თელავთან“იყო ძალზედ მნიშვნელოვანი გუნდის მომავლისათვის, გადავწყვიტეთ, რომ მწვრთნელ-ფეხბურთლებისთვის სტიმული მიგვეცა და წარმატების შემთხვევაში მთელ გუნდს გამოვუყოფდით 40 000 ლარს. სამწუხაროდ, მივიღეთ ნეგატიური შედეგი, რის გამოც გავატარეთ საჯარიმო სანქციები და ძირითადი შემადგენლობის მწვრთნელ-ფეხბურთლებს ნოემბრის თვის ხელფასიდან 50 % ჩამოვაჭერით, რაც სამომავლოდ კლუბს წაადგება ფინანსურად. მაინტერესებს, მეტი რა შეეძლო გაეკეთბინა აღმასრულებელი დირექტორის მოვალეობის შემსრულებელს, ფეხბურთის თამაში ჩემი პრეროგატივა არ იყო, სხვა მხრივ კი ძალისხმევა არ დაგვიშურებია. ნებისმიერ დაინტერესებულ პირს შეუძლია მოიძიოს, თუ რა გამიკეთებია კლუბის იურისტობის დროს და ასევე მაშინ, როდესაც აღმასრულებელი დირექტორის მოვალეობას ვასრულებდი. გარდა მორალური სტრესისა, ამ ორი წლის განმავლობაში არაფერი მიმიღია აქ მუშაობით. რაც შეეხება იმას, თუ რატომ გავჩერდი ამ თანამდებობაზე ამდენ ხანს, მოგახსენებთ, რომ ყურად არ იღეს გამგეობაში ჩემი არაერთი თოვნა იმასთან დაკავშირებით, რომ განვთავისუფლებულიყავი დაკავებული თანამდებობიდან. ასე რომ, ეს ჩემი ახირება არ ყოფილა.

nugo
ლადო გვარჯალაძის შემდეგ, ,,გურიას“ ყოფილი აღმასრულებელი დირექტორის მოადგილესთან_ ბატონ ნუგზარ ჩხაიძესთან ჩავწერეთ ინტერვიუ, რომელმაც ძალიან სკანდალური და საინტერესო განცხადებები გააკეთა ,,გურიას“ დღევანდელ მდგომარეობასთან დაკავშირებით. ის შეგვპირდა, რომ თუ ჩვენი გაზეთი მისცემს მას საშუალებას, იგი სიღრმისეულად გაანალიზებს ამ შედეგის გამომწვევ მიზეზებს და მისი თქმით, ,,დიდი ,,ქარიშხალია“ მოსალოდნელი, რომელიც ბევრ რამეს ახდის ფარდას. მან იქვე დააკონკრეტა, რომ ეს არის შეთქმულება_ ლანჩხუთის ,,გურიას“ წინააღმდეგ, რომლის უნებლიე მონაწილეებიც გახდნენ ის ადამიანები, რომლებმაც თავისი დილეტანტობით და არაპროფესიონალიზმით მიიყვანეს ,,გურია“ კატასტროფამდე 2013 წლიდან დღემდე და დღესაც აგრძელებენ გაუაზრებელ ქმედებებს და შეფასებებს, რითაც შეცდომაში შეჰყავთ ჭეშმარიტი გულშემატკივრები და ის ადამიანები, რომელთაც მართლაც აღელვებთ ,,გურიას“ ბედი.“
-რას იტყვით იმაზე, რომ გულშემატკივართა ნაწილს ეჭვი აქვს, რომ ,,გურია“-,,თელავის“ მატჩი იყო გარიგებული?
-კატეგორიულად გამოვრიცხავ, ამ თამაშის ირგვლივ რაიმე ბინძურ გარიგებას და არ მარტო ამ თამაშის. ვერავის ექნებოდა წვდომა, ან ფეხბურთლები მოესყიდა, ან მსაჯი მოექრთამა. ეს თემა არის თითიდან გამოწოვილი და იმ ადამიანების მიერ გაჟღერებული, რომელთაც გარკვეული პირადი ინტერესები ამოძრავებთ ,,გურიასთან“ დაკავშირებით. ჩვენ მრავალგზის განვიხილეთ და გავაანალიზეთ, კომპეტენტურ პირებთან ერთად პლეიოფის ორთავე თამაში და კიდევ ერთხელ გამოჩნდა, როგორც ბატონი ჯემსუატ ურუშაძე აღნიშნავს, ამ გუნდის რეალური პოტენციალი. ხოლო, რატომ არ ჰქონდა ამ გუნდს მეტი პოტენციალი, ამაზე ჩემს აზრს მოგახსენებთ.
-გთხოვთ, აქვე განმარტოთ, რას გულისხმობთ...
- როდესაც გუნდს, სხვა გუნდებიდან დაწუნებული და გამოშვებული ფეხბურთელებით დააკომპლექტებ, როდესაც გუნდს 17 თებერვალს შეკრიბავ, ხოლო ჩემპიონატი მარტის პირველი რიცხვებიდან იწყება(3 მარტს, უკვე პირველი გასვლითი მატჩი ჰქონდა ,,გურიას“ რუსთავში), როცა გუნდი ცუდი კლიმატური პირობების გამო მხოლოდ 12 სრულფასოვან ვარჯიშს მოახერხებს_ გრიგოლეთის საწვრთნელ ბაზაზე, ვერ ჩაატარებ ვერცერთ სრულფასოვან საკონტროლო მატჩს ჩემპიონატის დაწყებამდე, ხოლო პირველი წრის დამთავრებამდე უსაფუძვლოდ და კატეგორიულად მოითხოვ სამწვრთნელო შტაბის გადაყენებას, რომელიც კარგად იცი რა პირობებით მოიყვანე გუნდის ხელმძღვანელობაში, ხოლო ჩემპიონატს უკვე მესამე მთავარ მწვრთნელს დაამთავრებინებ, სხვა შედეგს ნამდვილად არ უნდა ელოდო. აქვე დავამატებ, რომ სწორედ არაპროფესიონალიზმის, უცოდინარობის და იმ განუკურნებელი სენის_მწვრთნელებისა და ფეხბურთელების სისტემატიური ცვლის ბრალია ის, რომ პირველი წრის დამთავრებამდე, ხუთი ტურით ადრე, ჩაანაცვლეს გიალო ჩხაიძე და გიგლა იმნაძე_ გია გურულით. რომელმაც, პირველი წრის შემდეგ გუნდიდან გაუშვა რვა ფეხბურთელი და ისინი ჩაანაცვლა მათზე უფრო ნაკლები კვალიფიკაციის მქონე ფეხბურთელებით და ჩვენ ამის შესახებ, მეორე წრის დაწყებამდე ხუთი დღით ადრე დაგვაყენა ფაქტის წინაშე. ჩემი შეცდომა ამ საკითხში მდგომარეობს იმაში, რომ დროულად ვერ გავერკვიეთ, თუ ვისი კანდიდატურა იყო გია გურული. როგორც შემდეგ, ,,ვიტ-ჯორჯია“-სთან ლანჩხუთში წაგებული თამაშის შემდეგ გავიგე, ეს ,,ყოვლისმცოდნე“ ზაზა ურუშაძის დაჟინებული მოთხოვნა და კანდიდატურა ყოფილა, რასაც, როგორც სჩვევია, ახლაც რომ შეეკითხოთ, კატეგორიულად უარყოფს.
-ვინ მოითხოვა სამწვრთნელო შტაბის გადაყენება ჯერ კიდევ პირველი წრის დასრულებამდე და საერთოდ ვინ არის თქვენი ბრალდებების ადრესატი?
- ღიად ვაცხადებ, ამ სენის მატარებელი იყო და არის ლანჩხუთის მუნიციპალიტეტის ყოფილი გამგებელი_ზაზა ურუშაძე. ყოველ შემთხვევაში, ,,ვიტ-ჯორჯიასთან“ თამაშის შემდეგ, ჩემი კატეგორიული მოთხოვნის შედეგად, ეს დაადასტურა კლუბის აღმასრულებელი დირექტორის მოვალეობის შემსრულებელმა და ფინანსურმა დირექტორმა, იმედია ისინი ამ ფაქტს არ იუარებენ.
- ,,თავისუფალ სახლში“ ხშირად გაისმოდა ბრალდებები კლუბის არასწორ მენეჯმენტთან დაკავშირებით. თქვენი აზრით კლუბის მენეჯმენტი გამართულად მუშაობდა?
- მაინტერესებს, იმ გამომსვლელებმა, რომლებიც ,,გურიას“ არასწორ მენეჯმენტზე აპელირებენ, საერთოდ თუ იციან ამ სიტყვის მნიშვნელობა. თუ ისინი ამაში მხოლოდ კლუბში მომუშავე კადრებს გულისხმობენ, ეს ნამდვილად არასწორი შეხედულებაა. მენეჯმენტის განმხორციელებელნი, პირველ რიგში კარგი მენეჯერები უნდა იყვნენ. რაშიც მე პირადად შემიძლია ნებისმიერ პიროვნებასთან შევიდე დებატებში..1988 წელს, საქართველოს მაშინდელი ხელისუფლების თანხმობით და პირადად ჩემი ხელმძღვანელობით, განვახორციელე საინტერესო პროექტი და ჩამოვაყალიბეთ პირველი პროფესიული საფეხბურთო კლუბი ,,ლანჩხუთის გურია“. რომელიც, დღეს რომ ლანჩხუთელებმა სამართლიანად მოითხოვოს და თუ, საქართველოს მთავრობამდე მიიტანენ სწორად ლანჩხუთელების მოთხოვნას, აღდგენას და ხელახალ რეგისტრაციას დაექვემდებარებოდა. და თუ, ეს ასე მოხდებოდა, ავტომატურად მოიხსნებოდა მართვის და მენეჯმენტის ის პრობლემები, რომელიც ე.წ. ა(ა)იპ-ის პირობებში ექმნებათ საფეხბურთო კლუბებს. სამწუხაროდ, ჩემი მრავალგზის მოთხოვნის მიუხედავად, ამაზე დღემდე არავის არ უფიქრია. 2015 წელს, საკრებულოს და მუნიციპალიტეტის თხოვნის შესაბამისად, მოვამზადე და გავაკეთე ,,ლანჩხუთში ფეხბურთის განვითარებისა და ,,გურიას“ ფუნქციონირების გრძელვადიანი პროგრამა“ და წარვუდგინე მათ. 2016 წლის ზაფხულში, მათივე თხოვნით, პოტენციური ინვესტორისათვის გავაკეთე ,,საფეხბურთო კლუბ ,,გურიას“ ფუნქციონირებისა და კომერციული საქმიანობის საინფორმაციო ბუკლეტი“, რომელიც თარგმნილი და შესაბამისი დიზაინით წარვუდგინე რაიონის მაშინდელ ხელმძღვანელობას. როგორც შემდგომში აღმოჩნდა, ეს ნაშრომი საერთოდ წანაკითხი არ ჰქონდათ მათ. კლუბის მენეჯმენტის მუშაობის თაობაზე აღმასრულებელმა დირექტორმა და ფინანსურმა დირექტორმა უკვე მოგახსენათ. 2017 წლის ივნისში, რაიონის ხელმძღვანელობის მიერ გამოგზავნილმა აუდიტმა, დაახლოებით ასგვერდიანი დასკვნა დაწერა, რომლის ორი ეგზემპლიარი პირადად მე ჩავაბარე მუნიპალიტეტის კანცელარიას. თუ წაიკითხეს და რამე ხარვეზები ნახეს, რატომ რეაგირება დროზე არ მოახდინეს? დღეს გაიძახიან, რომ შვიდი მილიონი დაგვიჯდა ,,გურიას“ გაგდებაო, ამხელა თანხით რომ აფინანსებდნენ კლუბს საკრებულო და მუნიციპალიტეტი, არ უნდა დაინტერესებულიყვნენ როგორ იხარჯება ეს ფული?! სხვათაშორის, ამ თემასთან დაკავშირებით, ყოფილმა დეპუტატმა და პროფესიონალმა ფეხბურთელმა თემურ ჩხაიძემ, თავისი მოსაზრებები და რჩევები მოახსენა მათ, ვისაც ეს ეხებოდა და ასე უთხრა: ,,თუ ასე გააგრძელებთ, ეს თანხა ბუხარში შეყრილი ფული იქნებაო“. რა თქმა უნდა, თემურის ეს რჩევა მათ არ გაითვალისწინეს. ის თანხები, ნამდვილად რაიონის ბიუჯეტიდან იყო გამოყოფილი, ხოლო 2016-2017 წლებში, კლუბი ცენტრალური ბიუჯეტიდან, ფეხბურთის განვითარების ფონდიდან ფინანსდებოდა. ეხლა მკითხველმა განსაჯოს, ცუდი მენეჯმენტი ,,გურიაში“ ყოფილა, თუ იმ შენობაში, სადაც იჯდა ლანჩხუთის მუნიციპალიტეტის ხელმძღვანელობა. ჩემი სურვილია, მუნიციპალიტეტის ახლანდელი ხელმძღვანელობა იგივე სენით არ დაავადდეს.
თორნიკე ჯიჯიეშვილი

იმის გამო რომ, ნუგზარ ჩხაიძესთან ინტერვიუს გაგრძელება ტექნიკურად შეუძლებელი იყო, ხოლო მის მიერ გამოთქმული სკანდალური ბრალდებები, ნამდვილად მრავალფეროვანია, ,,ჰო და არას“ მომდევნო ნომერში გთავაზობთ ამ ინტერვიუს გაგრძელებას და მკითხველს ვპირდებით, მასალა იქნება ძალზედ საინტერესო.

კობა მირზაშვილი ლანჩხუთის მერს ღიად დაუპირისპირდა!

kobuci25 დეკემბერს, საფეხბურთო კლუბ ,,გურიას“ ყოფილმა ხელმძღვანელმა კობა მირზაშვილმა და მისმა მხარდამჭერებმა შეკრება მოაწყვეს და ღიად ისაუბრეს კლუბის ირგვლივ შექმნილ გაუგებრობაზე. იგეგმებოდა, რომ კობა მირზაშვილი პრესკონფერენციას ,,ჰო და არასთან“ არსებულ საზოგადოებრივ დარბაზში გამართავდა. თუმცა ისე მოხდა, რომ მუნიციპალიტეტის სხდომათა დარბაზში გაიმართა შეხვედრა. ალექსანდრე სარიშვილმა მირზაშვილის მხარდამჭერების მიერ დასმულ შეკითხვებს უპასუხა. ,,ჰო და არა“ წინა ნომრებში წერდა, რომ კობა მირზაშვილის მიერ ჩამოყვანილი ინვესტორები უკან გაბრუნდნენ, მირზაშვილი ამ ფაქტს იმით ხსნიდა, რომ სარიშვილის მიერ დაფიქსირებული ხისტი პოზიციის გამო, ისინი განაწყენდნენ და ქვეყანა დატოვეს. პოტენციური ინვესტორები შეხვდნენ დეპუტატთა ნაწილს და მერს, მაშინ ინფორმაციამ გამოჟონა, რომ მიუხედავად დეპუტატთა მხარდამჭერისა, ალექსანდრე სარიშვილმა თითქმის გადაწყვეტილი უარი უთხრა ინვესტორებს, რასაც თავად მერი არ ადასტურებს. კობა მირზაშვილი ღიად აცხადებდა, რომ მისი კანდიდატურა მიუღებელი იყო გარკვეული პიროვნებებისთვის და ისინი სარიშვილზე ზეგავლენას ახდენდნენ, ის ასახელებდა გოგი ფაცურიასაც. სიტუაცია იმდენად დაიძაბა, რომ კობა მირზაშვილმა ცენტრალური ტელევიზიებიც კი მოიწვია. თავდაპირველად სატელევიზიო კომენტარები მერიის ფოიეში კეთდებოდა, ამის შემდეგ მხარდამჭერებმა მოითხოვეს, რომ ალექსანდრე სარიშვილს მათი კითხვებისთვის პასუხი გაეცა სხდომათა დარბაზში. შეხვედრას ესწრებოდა ყველა ადგილობრივი პრესის წარმომადგენელი და აშუქებდა რამდენიმე ცენტრალური ტელევიზია. ალექსანდრე სარიშვილის თქმით, ის გაოცებულია, თუ რატომ აწყობდნენ ამ დღეს ,,აქციას“ და სად იყვნენ ,,გურიას“ გულშემატკივრები მაშინ, როცა გუნდი უფსკრულისკენ მიდიოდა: ,,ყველა ჩვენთაგანს უნდა, რომ ,,გურია“ ამოიყვანოს ამ წუმპიდან და არამგონია კლუბის ამ დღეში მიყვანა ჩვენი ბრალი იყოს. მე მაინტერესებს ვის უწყობთ ამ აქციას, რას აპროტესტებთ და რა მიზანი აქვს ამ ყველაფერს. თუ აქცია კეთდება იმიტომ, რომ გაარკვიოთ ვინ იქნება მენეჯმენტში, გეტყვი იმას, რომ ხალხმა გამოგვიცხადა დიდი ნდობა და როგორმე გადავწყვეტთ ამ საკითხს. გპირდებით ამას გავაკეთებთ საჯაროდ და არა მალულად. ვაპირებთ დავიწყოთ ბავშვთა ფეხბურთის განვითარებით და ყველა დონეზე მიდის ამაზე მუშაობა. აქ მე, ვერც კობას, ვერ სხვის ინტერესების გათვალისწინებით ვერ ვიმოქმედებ, ჩვენ უნდა ვიმოქმედოთ ,,გურიას“ ინტერესებიდან გამომდინარე. იცით, რა სიტუაციამდეა მისული გუნდის მდგომარეობა, ტრაგედიაც კი მოჰყვა ბოლოს და გამოძიება მიმდინარეობს. რაც შეეხება უკრაინელი ინვესტორების საქმეს, სად იყო ოფიციალური წინადადება ან მომართვა. ვერ გავიგე რა ახირებაა ამ სპონსორზე საუბარი, ერთი არ ყოფილა აქ, იყვნენ სხვებიც, ყველას უნდა მოვუსმინოთ და გადაწყვეტილება ისე მივიღოთ. კონკრეტული უარი არავისთვის არ გვითქვამს. ულტიმატუმის ენით თუ გინდათ საუბარი, არაა პრობლემა. იყო ბევრი შეკითხვები კობას მიერ ჩამოყვანილ პოტენციურ ინვესტორებთან დაკავშირებით, ასევე იყო სხვა ჯგუფიც, რომელიც ძალიან კარგ პირობებს გვთავაზობდა. ძმაკაცობით და ნაცნობობით არ უნდა წყდებოდეს ,,გურიას“ ბედი. ჩვენ დავითხოვეთ ,,გურია“-ს მენეჯმენტი არადამაკმაყოფილებელი შედეგების გამო და იმასაც შევძლებთ როგორმე, ახალი მენეჯმენტიც დავნიშნოთ. კლუბს აქვს 480 000 ლარი ვალი, არის იურიდიული საკითხები, რომელიც ეტაპობრივად უნდა გავიაროთ. დაინიშნება აუქციონი იჯარის წესით გაცემაზე და საუკეთესო წინადადების მქონე პიროვნებას თუ პიროვნებებს მიენიჭებათ უპირატესობა. დასვით შეკითხვები და გიპასუხებთ.“ ასეთი მიმართვით გახსნა შეხვედრა მერმა.
მერს შეკითხვები დაუსვეს გულშემატკივრებმა, ყოფილი ფეხბურთელი ავთანდილ მეიშვილი ცხარე კამათში შევიდა სარიშვილთან: ,,რა აქცია, რის აქცია, ჩვენი გულისტკივილის გამოთქმის უფლება არ გვაქვს? აქ ვისაც ხედავთ, ყველანი ფეხბურთის გულშემატკივრები ვართ, ამას გარდა უამრავი ადამიანი დგას ჩვენს უკან. მაინტერესებს რა მოხდა, ვიცოდით, რომ კობა მირზაშვილს მოყავდა ინვესტორები ,,გურიაში“, რაზეც ალექსანდრე სარიშვილს თანხმობა ჰქონდა მიცემული. ამ ხალხის ჩამოყვანის შემდეგ კი ხდება მათი სრული იგნორირება, არადა მე ვიცი, რომ სერიოზული და საქმიანი ხალხი იყო ჩამოსული. როგორც ვიცი, ჰქონდათ არაჩვეულებრივი შემოთავაზებები, რაც ბევრ დეპუტატს მოეწონა, მაგრამ პირადად მერმა განაცხადა უარი. გთხოვთ გაგვარკვიოთ, რაშია საქმე და რატომ არის თქვენთვის მიუღებელი კობა მირზაშვილი? ნუ გვაფიქრებინებთ, რომ თქვენც ფულის გათეთრება გინდათ.“
ამის შემდეგ თავად კობა მირზაშვილმა მიმართა მერს და იქ შეკრებილ საზოგადოებას: ,,ბატონო ალექსანდრე, თქვენ იყავით საქმის კურსში, რომ უნდა ჩამომეყვანა ინვესტორები, იცოდით, რომ ესენი იყვნენ სერიოზული პიროვნებები. როდესაც მე ჩამოვიყვანე ეს ხალხი, თქვენგან ველოდები კონკრეტულ პასუხს, რათა ინვესტორები შემეჩერებინა. როგორც გავიგე, დადებითი პასუხი კი არა, თქვენ განაწყენებულხართ იმ დეპუტატებზე, ვინც მოვიდა და გკითხათ, რა პასუხი გავცეთ მირზაშვილსო. დავამატებ იმას, რომ თქვენს კაბინეტში ბატონ გოგი ფაცურიას უთქვამს, რომ ჩვენც გვიკეთებია რაღაც ფეხბურთშიო. მინდა გითხრათ ბატონო გოგი, რომ მე მართლა მიკეთებია ,,რაღაც“ ფეხბურთში და არ მრცხვენია უკან მოხედვის. პასუხისმგებელი ვხდებოდი, რომ ყველანაირი ტვირთი ჩამომეხსნა მუნიციპალიტეტისთვის და ისე მეპატრონა გუნდისათვის. ის ხალხი აპირებდა სპორტული კომპლექსის აშენება გრიგოლეთის ბაზაზე, ხოლო შემოსული თანხით აქეთ დაეხმარებოდნენ მუნიციპალიტეტის ბიუჯეტს, მზად იყვნენ იმდენი დაეხარჯათ კლუბის წარმატებისთვის, რამდენიც საჭირო იქნებოდა. იყო სერიოზული წინადადებები, რომლებიც თქვენ არც კი განიხილეთ. როგორც ყოფილი ფეხბურთელი და გუნდის ხელმძღვანელი ისე ვუდგები ამ საკითხს, შეიძლება ეს დრო თქვენთვის არაფერს ნიშნავს, მაგრამ სასიცოცხლოდ მნიშვნელოვანია კლუბისთვის. ბოდიშების მოხდა მომიწია იმ ხალხთან, ვინც აქ ჩამოვიყვანე თქვენგან შეურაცხყოფილი დავრჩი. ერთი შვილი მყავდა და იმის საფლავს გეფიცები, რომ გეთქვათ ადრე ჩემთვის, ,,კობა მიუღებელი ხარ ვიღაცეებისთვის და განზე გადექიო“, ასეც მოვიქცეოდი. თქვენ ხელს იშვერთ კობიაშვილისკენ და ფედერაციისკენ, დამიჯერეთ ხალხნო, ფედერაცია ამ საქმეში არაფერ შუაში არ არის.“
ამის შემდეგ, კიდევ რამდენიმე გამომსვლელმა დააფიქსირა თავისი აზრი, იყო კითხვა-პასუხები, თუმცა საერთო აზრამდე ვერ მივიდნენ. სარიშვილისა და მირზაშვილის დებატების დროს, ძირითადად მხარეები დაობდნენ სპონსორის თემაზე, ასევე მირზაშვილის მხარდამჭერები მერს ,,სხვა ჯგუფის“ლობირებაში სდებდნენ ბრალს. ეს ,,სხვა ჯგუფი“_ფაცურია-ებრალიძე-ლორია-გოგუა-ქურიძე-ს შემადგენლობაა .
კობა მირზაშვილმა საკონტროლო გასროლა ბოლოსთვის მოიტოვა, მან ალექსანდრე სარიშვილს შემდეგი წინადადებით მიმართა: ,,კარგი, მოიყვანეთ სპონსორი ვინც გინდათ და თქვენი თქმით წაადგება გუნდს. დამნიშნეთ მე სპორტულ დირექტორად და პირობას ვდებ, პირველ წრეში გუნდი მეყოლება ზედა სამეულში, ხოლო თუ ეს შედეგი ვერ ვაჩვენე, მაშინ ბოდიშს მოვიხდი თითოეული ლანჩხუთელის წინაშე და ამ საქმეს აღარ გავეკარები.“
ამაზე ალექსანდრე სარიშვილს პასუხი არ გაუცია. შეხვედრის შემდეგ, კობა მირზაშვილმა აღნიშნა, რომ ის არ აპირებს ხელები ჩამოუშვას. როგორც ჩვენთვის ხდება ცნობილი, მან უკვე გააკეთა ხარჯთაღრიცხვა და ის სავარაუდო მონახაზი, რომლის მიხედვითაც წარმატებას მიაღწევს.

კობა მირზაშვილი მერიის წინააღმდეგ?!

ko,,ჰო და არას"ინფორმაციით, ორშაბათს 25 დეკემბერს, დღის 11:00 საათიდან ლანჩხუთის მუნიციპალიტეტის მერიის შენობასთან იკრიბებიან კობა მირზაშვილის მხარდამჭერები. რა თქმა უნდა, საქმე ეხება საფეხბურთო კლუბ ,,გურიას"ირგვლივ მიმდინარე პროცესებს. როგორც ჩვენთვის ხდება ცნობილი, მირზაშვილის მიერ ჩამოყვანილი ინვესტორების შეთავაზებულ პირობებს საკრებულოს დეპუტატთა უმრავლესობა მოწონებით შეხვდა. მაგრამ, მერი ალექსანდრე სარიშვილი კატეგორიული წინააღმდეგი წავიდა, მისი თქმით ეს საკითხი კვირიკაშვილისა და კობიაშვილის დონეზე წყდებოდა, ხოლო კობა მირზაშვილი მიუღებელი იყო გარკვეული პიროვნებებისათვის. ამის შემდეგ, განაწყენებულმა უკრაინელმა ინვესტორებმა ქვეყანა დატოვეს, თუმცა არ გამორიცხეს მირზაშვილს მაინც დახმარებოდნენ. კობა მირზაშვილი აცხადებს, რომ მას აქვს მორალური უფლება ჩაიბაროს, ,გურია", ის თავის მხრივ გაოცებულია იმით, თუ რატომ გაუკეთა სარიშვილმა იგნორი. თუმცა, ის არ აპირებს ფარ-ხმალი დაყაროს და ხვალ 11:00 საათიდან გულშემატკივრების შეკრებას იწყებს, რათა როგორც ის ამბობს, სამართლიანობა აღადგინოს. შეგახსენებთ, რომ ეს არის, ,ჰო და არას" წყაროს ინფორმაცია, რომელიც საკმაოდ სანდოა.

თორნიკე ჯიჯიეშვილი

მოიწონეთ სტატია