დიდებული სპექტაკლი, რომელსაც ცოტა მაყურებელი ესწრებოდა!

teatrinohod12 იანვარსს ლანჩხუთის ეგნატე ნინოშვილის სახელობის ლანჩხუთის სახალხო თეატრმა წარმოადგინა სპექტაკლი მარკ კამელოტის პიესა ,, F A M I L Y ფრანგული გარნირით”. სპექტაკლის რეჟისორი დავით წერეთელი. ლანჩხუთელმა ახალგაზრდა მსახიობებმა წარმოადგინეს „ოჯახური იდილია“ სცენაზე. მონაწილეობდნენ: გურამ იმნაძე, ბაჩანა პატარაია, ქრისტინა ლორია, თეკლა დვალიშვილი, ლელა ჭეიშვილი, ბაჩი ხუხუნაიშვილი. სპექტაკლი ნამდვილად პროფესიონალურად იყო დადგმული, რა თქმა უნდა, ამაში განსაკუთრებული წვლილი რეჟისორს_დავით წერეთელს მიუძღვის. სამწუხარო მხოლოდ ერთი ფაქტი იყო, ეს ჩვენთვის ,,ერთი ფაქტი“, თორემ არტისტებისთვის მთავარი. სპექტაკლს არცთუ ისე ბევრი ხალხი ესწრებოდა, თვალში საცემი იყო სკოლის მოსწავლეების მაღალი ინტერესი. სპექტაკლს ოფიციალური პირებიც ესწრებოდნენ: ლანჩხუთის მერი, მერის პირველი მოადგილე და საკრებულოს რამდენიმე დეპუტატი. ეს იყო ნამდვილად გამორჩეული ერთი საათი ლანხუთის კულტურულ ცხოვრებაში. მსახიობები იმდენად კარგად თამაშობდნენ, რომ ალბათ დამსწრე საზოგადოებიდან არც ერთ ადამიანს სპექტაკლის დამთავრება არ უნდოდა. სასიხარულოა, როდესაც ასეთ მაღალ საშემსრულებლო კლასს აჩვენებენ ჩევნი მუნიციპალიტეტის ახალგაზრდა მსახიობები. ვფიქრობთ, რომ ყოფილიყო ორგანიზატორების მხრიდან საზოგადოების მეტი ინფორმირება, დარბაზში ბევრად ნაკლები სკამი დარჩებოდა ცარიელი. ლანჩხუთის საზოგადოება ნამდვილად არ არის განებივრებული მსგავსი საღამოებით და სპექტაკლზე დასასწრებ ძალზედ იაფიან (ორი ლარი) ბილეთში ფულის გადახდა არ დაენანებოდათ. სხვას რომ ყველაფერს თავი დავანებოთ, სპექტაკლს ის ხალხიც არ ესწრებოდა, ვისაც ხელოვნების სიყვარულზე და ცოდნაზე აქვს პრეტენზია. კულტურის გაერთიანების ცენტრში კი მუშაობს იმდენი ადამიანი, რომ სულ მცირე რამდენიმე რიგი კიდევ შევსებულიყო დარბაზში და რეჟისორისთვის, მსახიობებისთვის მეტი სტიმული მიეცათ. თუ თვითონ უკეთეს პროექტებს გვთავაზობენ და მისი მომზადებით არიან დაკავებულები, ამასაც მალე ვიხილავთ. ბრავო დავით წერეთელს, ბრავო მის მსახიობებს!
თორნიკე ჯიჯიეშვილი

თბილი ტანგო და მხიარული საღამო, რომელიც ლადო აფხაზავას მიუძვნა საქართველოს პედაგოგთა და მეცნიერთა თავისუფალმა პროფკავშირმა (ლანჩხუთის რაიონულმა ორგანიზაციამ)

MMMM743928 4990054062528344613 nსაღამომ, რომელიც ლელა ქურიძის ხელმძღვანელობით ჩატარდა, ძალიან თბილ და მეგობრულ გარემოში ჩაიარა. ლელა ქურიძე გახლავთ საქართველოს პედაგოგთა და მეცნიერთა თავისუფალი პროფკავშირის ლანჩხუთის რაიონული ორგანიზაციის ხელმძღვანელი. მოგეხსენებათ, რომ ლადო აფხაზავა გახდა მასწავლებლის ეროვნული ჯილდოს პირველი გამარჯვებული საქართველოში, ლანჩხუთელმა კოლეგებმა და შემოქმედებითი კუთხით მოღვაწე ადამიანებმა, გადაწყვიტეს ერთი დასამახსოვრებელი საღამო ეჩუქებინათ ლადოსთვის. ღონისძიებაზე მოწვეული სტუმრის რანგში იმყოფებოდნენ საქართველოს პედაგოგთა და მეცნიერთა თავისუფალი პროფკავშირის პრეზიდენტი მაია კობახიძე და მისი მოადგილეები, ლანჩხუთის საგანმანათლებლო რესურსცენტრის ხელმძღანელი ნინო ჩიტაძე, აგრეთვე ლანჩხუთის მუნიციპალიტეტის საკრებულოს თავმჯდომარე ბესიკ ტაბიძე, მისი მოადგილე ვლადიმერ ნანაძე და საკრებულოს ერთ-ერთი კომისიის თავმჯდომარე ალექსანდრე მახათაძე, ლანჩხუთის მერი საპატიო მიზეზის გამო ვერ ესწრებოდა აღნიშნულ საღამოს. საქართველოს პირველმა პედაგოგმა ცოტათი დაიგვიანა, ხოლო მის დარბაზში შემოსვლას ოვაციებით შეხვდნენ, ეკრანზე გადიოდა ის დაუვიწყარი მომენტები, როდესაც ლადო აფხაზავას მასწავლებლის ეროვნული ჯილდო გადასცეს. შეხვედრაზე იმყოფებოდნენ პედაგოგები მუნიციპალიტეტის თითქმის ყველა სკოლიდან, ზოგიერთმა მათგანმა საღამოს გმირს სიმღერა, ლექსი, ცეკვა მიუძღვნა. განსაკუთრებით გაახალისა დამსწრე საზოგადოება სუფსის კოლექტივმა, მათ ლადო აფხაზავას ვარსკვლავი გაუხსნეს. დარბაზი მთლიანად აიყოლია მარინა ბარამიძის და ლადოს ტანგომ. უნდა აღინიშნოს, რომ ზოგიერთი შემსრულებლის პროფესიის დადგენა გაგიჭირდებოდათ, იმდენად არტისტულები იყვნენ, საღამოზე აქტუალური იყო ,,კომედი შოუს“ სკეტჩები, სტუმრებმა განსაკუთრებით ისიამოვნეს ,,ბუთქუნა და თამაზას“, ასევე ,,ზოიას და მარინას“ ლანჩხუთური ინტერპრეტაციით. შეხვედრაზე აღინიშნა, რომ ხელისუფლება ყურადღებას იჩენს პედაგოგთა საზოგადოების მიმართ და მასწავლებლის ეროვნული ჯილდოს დაწესებაც ამის ნათელი მაგალითია, ხაზი გაუსვეს იმ გარემოებასაც, რომ აღნიშნულ ღონისძიებას ადგილობრივი მთავრობაც ესწრებოდა. ბესო ტაბიძე თავის სიტყვაში ძალზედ ემოციური იყო, მან ყველას შეახსენა, რომ ლადო აფხაზავა ნიგვზიანელია და ის ამით განსაკუთრებულად ამაყობს, მან გვერდით დგომა აღუთქვა პედაგოგებს და მადლობა გადაუხადა მათ, ღირსეული მოღვაწეობისათვის. საქართველოს პედაგოგთა და მეცნიერთა თავისუფალი პროფკავშირის პრეზიდენტის, მაია კობახიძის თქმით, მას ეს დღე არასდროს დაავიწყდება, ის აღფრთოვანებული დარჩა ლელა ქურიძის და ლანჩხუთელების მასპინძლობით. როგორც მან აღნიშნა, ლადო აფხაზავა იმსახურებს ასეთ სიურპრიზებს და ის მის გამო ბედნიერია. პედაგოგებმა მას სხვადასხვა სამახსოვრო საჩუქრები გადასცეს.
თორნიკე ჯიჯიეშვილი

გაზეთ ,,ჰო და არას“ რედაქციას

lanchkhuti mus 1გასულ კვირაში თქვენი გაზეთის ინტერნეტ და ბეჭდურ ვერსიაში დაიბეჭდა სტატია სათაურით: ,,რა მოთხოვნები აქვს მხარეთმცოდნეობის მუზეუმს“ (18 ნოემბერი, 2017 წელი).
ლანჩხუთის მუნიციპალიტეტის კულტურის დაწესებულებათა გაერთიანების დირექცია თავს ვალდებულად თვლის გამოეხმაუროს სტატიას, რომელიც რბილად რომ ვთქვათ, საზოგადოების შეცდომაში შეყვანის მცდელობაა.
ლანჩხუთის მუნიციპალიტეტის კულტურის დაწესებულებათა გაერთიანება შეიქმნა 2015 წლის 22 თებერვალს. მის დაქვემდებარებაშია შემდეგი დაწესებულებები: ლანჩხუთის კულტურის ცენტრი აცანის, სუფსისა და ჯურუყვეთის განყოფილებებით; ცენტრალური ბიბლიოთეკა მასში შემავალი 17 სასოფლო ბიბლიოთეკით; ლანჩხუთის მარიკა ორაგველიძის სახელობის სამუსიკო სკოლა; სუფსის სამუსიკო და ვილი ბარამიძის სახელობის სამხატვრო სკოლები; ვალოდია წულაძის თეატრისა და კინოს, თემურ ფირცხალაიშვილის სახელობის შემოქმედთა და სპორტის მუზეუმები; ეგნატე ნინოშვილის სახელობის სახალხო თეატრი.
კულტურის დაწსესებულებთა გაერთიანებაში დასაქმებულია 15 თანამშრომელი, რომელთა ფუნქცია–მოვალეობაა ზემოთ ჩამოთვლილი დაწესებულებების მართვა და ორგანიზება.
აუცილებელი აღნიშვნის ღირსია ის ფაქტი, რომ მხარეთმცოდნეობის მუზეუმი დამოუკიდებელი ორგანიზაცია არასოდეს ყოფილა. 1978 წლიდან მუზეუმი შედიოდა ლანჩხუთის რაიონის კულტურის განყოფილების დაქვემდებარებაში. 2007 წლიდან ექვემდებარებოდა
სამუზეუმო გაერთიანებას. 2009 წლიდან დაექვემდებარა კულტურული მემკვიდრეობის დაცვისა და ტურიზმის განვითარების ცენტრს. 2015 წლიდან კი კულტურის დაწესებულებათა გაერთიანებაშია. მთელი ამ ხნის მანძილზე ლანჩხუთის მხარეთმცოდნეობის მუზეუმის გამგე (და არა დირექტორი, როგორც ეს სტატიაშია) ქალბატონი ნონა იმნაძე, მუდმივად ილაშრებს ყველა გაერთიანების წინააღმდეგ და სამიზნე ყოველთვის მისი ზემდგომია!
დასანანია, რომ აღნიშნულ სტატიაში ქალბატონ ნონას მოსაზრებები მეტწილად ფინანსური დაინტერესებებითაა ნაკარნახევი და ნაკლებად მუზეუმის საქმიანობით. როდესაც ვერ ხერხდება მუზეუმის ფინანსური და ინფრასტრუქტურული საკითხების სათანადოდ მოწესრიგება,მისი გაღიზიანების ობიექტი კულტურის დაწესებულებათა გაერთიანების არსებობა და მასში დასაქმებულ ადამიანთა ანაზღაურებაა. აღსანიშნავია ისიც, რომ კულტურის დაწესებულებათა გაერთიანებამ სახელფასო ფონდის გარდა მხარეთმცოდნეობის მუზეუმისათვის სხვა მუზეუმებისგან განსხვავებით, 2016 წელს გამოყო 10368 ლარი , ამ თანხაში შედის მუზეუმის წინა ფასადის ფანჯრების გამოცვლა, რომლის ღირებულებამ შეადგინა – 4268 ლარი. როცა მუზეუმის საექსკურსიო შემონატანი გახლდათ–109,5 ლარი , 2017 წელს გაერთიანებამ მხარეთმცოდნეობის მუზეუმისათვის გაიღო 5010 ლარი , მათი საექსკურსიო შემონატანი კი იყო 136 ლარი
2016 წლის 1 თებერვლიდან კულტურის დაწესებულებათა გაერთიანებამ მუზეუმის გამგეებს ხელფასი გაუზარდათ 50 ლარით, ჩვენი აზრით ქალბატონმა ნონა ამ ციფრებზეც უნდა დაფიქრდეს.
რაც შეეხება კულტურის დაწესებულებათა გაერთიანების თანამშრომლების სახელფასო ანაზღაურე ბას, რომელსაც ქალბატონი ნონა ყველა საგაზეთო სტატიებში, თუ შეხვედრებზე აღნიშნავს, უნდა იცოდეს, რომ იგი თავის დროზე განსაზღვრა ლანჩხუთის მუნიციპალიტეტის საკრებულომ და არა გაერთიანებაში დასაქმებულმა ადამიანმა.
ქალბატონი ნონა ინტერვიუში აღნიშნავს, რომ გაერთიანებამ არ დააფინანსა წიგნის ,,ძველი ლანჩხუთის გამოცემა“, რომლის ავტორი გახლავთ ბატონი ავთანდილ მახარაძე, რომლისთვისაც საჭირო იყო ხუთი ათასი ლარი. აქვე დავსძენთ რომ წესით და კანონით მხარემცოდნეობის მუზეუმმა უნდა მოიძიოს სპონსორები წიგნის გამოსაცემად ამ სპეცსახსერებით უნდა მოხდეს მისი გამოცემა,როგორც ამას სხვა მუზეუმები ახერეხებენ.
და ბოლოს გვინდა იცოდეთ ჩვენი მოსაზრება იმის შესახებ,რომ კულტურის დაწესებულებათა გაერთიანებაში შემავალი განყოფილებების თანამშრომლებს მართლაც დაბალი ანაზღაურება აქვთ, რომლის გაზრდის შესახებ არაერთხელ დაისვა საკითხი ჩვენს მიერ ზემდგომ ორგანოებში, ეს საკითხი დღევანდელი ხელისუფლებისათვისაც კარგად ცნობილია, იმასაც კარგად ვხედავთ, რომ კულტურის დაწესებულებათა გაერთიანებაში შემავალ განყოფილებებს აქვს ინფრასტრუქტურული და სხვა სახის პრობლემები,მათი გადაჭრა ერთდროულად შეუძლებელია.ამიტომ ჩვენ იმედს ვიტოვებთ იმასთნ დაკავშირებით, რომ ახალი საბიუჯეტო წლიდან ეტაპობრივად მოხდება მათი მოგვარება.
ლანჩხუთის მუნიციპალიტეტის კულტურის დაწესებულებათა გაერთიანების დირექცია.

პასუხი: ლანჩხუთის მუნიციპალიტეტის კულტურის დაწესებულებათა გაერთიანების დირექცია წერს, რომ სტატია ,,რა მოთხოვნები აქვს მხარეთმცოდნეობის მუზეუმს“, ემსახურება საზოგადოების შეცდომაში შეყვანას. ამ მოსაზრებას რედაქცია კატეგორიულად არ ეთანხმება, ჩვენ კონკრეტული ორგანიზაციის_ მხარეთმცოდნეობის მუზეუმის მოთხოვნები და პრეტენზიები გავაშუქეთ, რაც არ ნიშნავს იმას, რომ რედაქცია რომელიმე მხარის პოზიციას ემხრობა ან ვისამე დისკრედიტაციას ეწევა. ჩვენ მომავალშიც ვითანამშრომლებთ ნებისმიერ სუბიექტთან, რომელიც გადაწყვეტს , რომ ,,ჰო და არას“ დახმარებით საზოგადოებას გააგებინოს თავისი პრობლემების შესახებ.
,,ჰო და არას“ რედაქცია.

როდის აიშენებთ ოქროს სარაიას და როდის დადგება ჩვენთვის ეს ეტაპი?!

muzeumiii78937640798 894988698 nნამდვილად არ გვინდოდა, საზოგადოება კიდევ ერთხელ გადაგვეღალა ჩვენი მუზეუმის პრობლემებით, მაგრამ ქალბატონა ადელინა კილაძემ ,,გაღმა შეედავეს“ პრინციპით ისეთი სტატია გამოაქვეყნა კულტურის დაწესებულებათა გაერთიანების დირექციის სახელით, რომ სხვა გზა არ დაგვიტოვა. შევეცდებით ძალიან მოკლედ მოგახსენოთ.
პირველ რიგში, გვინდა აღვნიშნოთ და ამაში ალბათ თქვენც დაგვერწმუნებით, რომ ის მოსაზრებები, რაც თქვენ გაზეთში გამოქვეყნდა ჩვენი მუზეუმის სახელით, ასახავს ყველა თანამშრომლის პოზიციას და არა მხოლოდ ნონა იმნაძის.
ამ სტატიაში, ზოგადად ვწერდით გაერთიანებაში მომუშავე მაღალი ანაზღაურების მქონე ადამიანებზე, რომლებიც ძირითადად უფუნქციოა და ვითხოვდით ხელფასების თანასწორად გადანაწილება. თუ კონკრეტულად გაინტერესებთ ქალბატონო ადელინა, თქვენი მეუღლე, რომელიც მუზეუმების კურატორად გყავთ გაფორმებული, რას აკეთებს მუზეუმებისთვის, ჩვენ მაგალითად არაფერში დაგვხმარებია.
ამჯერად, თავს ვიკავებთ იმ გახმაურებულ ფინანსურ დარღვევებზე საუბრისგან, რომელიც თქვენს გაერთიანებაში მოხდა და როცა ამდენი ფული წყალში იყრება, ჩვენი მუზეუმის 40-წლიანი ნაშრომი (და არა ავთანდილ მახარაძის?) წიგნის ,,ძველი და ახალი ლანჩხუთისგამოცემა“, რომლის ანალოგი ჯერ ლანჩხუთში არ გამოცემულა და რომელშიც მთელი რაიონის ისტორიაა შესული, საქილიკო არ უნდა გახადოთ.
თქვენ ვერ გვასწავლით სპონსორის მოზიდვას, თუ რაიმე ღირებული გაკეთებულა მუზეუმში, ჩვენს მიერ მოძიებული შპონსორების წყალობაა, დაწყებული მუზეუმის გახსნიდან დღემდე. ჩამოთვლას არ დავიწყებთ, რადგანაც შორს წავალთ.
რაც შეეხება ნონა იმნაძეს, რომელიც საკუთარი ხელფასების მაძიებლად გამოიყვანეთ, სწორედ ეს არის საზოგადოებაში შეცდომაში შეყვანის მცდელობა. გარდა მუზეუმის დირექტორობისა, მას უხელფასო ბრძანებით შეთავსებული აქვს ძეგლთა დაცვის სპეციალისტის თანამდებობა და მის მიერ მომზადებული, ძეგლთა დაცვის ეროვნულ სააგენტოში გადაგზავნილი დოკუმენტაციის წყალობით, ეგნატე ნინოშვილის სახელობის მემორიალურ მუზეუმს ძეგლის სტატუსი მიენიჭა ამ ერთი კვირის წინ და იქნებ ეს სასიხარულო ამბავი გააგებინოთ მუზეუმების კურატორ თქვენს მეუღლესაც. ორი წლის წინ, ნონა იმნაძე ერთადერთი იყო გურიის რეგიონიდან, რომელიც კულტურის მინისტრმა სიგელითა და ფასიანი საჩუქრებით დააჯილდოვა, ეს ჩვენი მუზეუმის აღიარება იყო. თქვენ კი, სიტყვიერადაც არ მოგილოციათ, ის კი არა, 15 წუთით სამუშაოს ადრე დამთავრების გამო, ყოველგვარი ახსნა-განმარტების გარეშე, მთელ მუზეუმს, ბრძანებით საყვედური გამოგვიცხადეთ და ამაზე პასუხი ჯერაც არ გიგიათ.
პ.ს ბოლოს, ქალბატონი ადელინა ბრძანებს, რომ ჩვენი დაბალი ხელფასები ეტაპობრივად გაიზრდება. 2007 წლიდან, ვინც ნამდვილ საქმეს ემსახურება, ლარითაც კი არ მოგვმატებია ხელფასები. როდის აიშენებთ ოქროს სარაიას და როდის დადგება ჩვენთვის ეს ეტაპი?! მაინც იმედს ვიტოვებთ, რომ ,,წყალნი წავლენ და წამოვლენ, ქვიშანი დარჩებიანო“.
მხარეთმცოდნეობის მუზეუმის თანამშრომლები.

რა მოთხოვნები აქვს მხარეთმცოდნეობის მუზეუმს

muzeumiii78937640798 894988698 nმხარეთმცოდნეობის მუზეუმის დირექტორს და მის თანამშრომლებს მიაჩნიათ, რომ კულტურის გაერთიანების ცენტრი სრულიად უფუნქციოა და მისი შექმნა თავის დროზე შეცდომა იყო!
ლანჩხუთის მხარეთმცოდნეობის მუზეუმი ერთ-ერთი გამორჩეულია მთელი ქვეყნის მასშტაბით, ის საქართველოს 100 საუკეთესო მუზეუმს შორის შედის და 38-ე ადგილს იკავებს. წლებია ამ მუზეუმს ნონა იმნაძე ხელმძღვანელობს, ქალბატონი ნონა გამოირჩევა მებრძოლი ხასიათით, უკან არასდროს დაუხევია მუზეუმის ინტერესების დაცვის დროს. ნონა იმნაძე საკრებულოს სხდომებზეც ხშირად გამოსულა, გაუპროტესტებია მუზეუმში არსებული მძიმე მდგომარეობა, უყურადღებობა შესაბამისი სამსახურების მხრიდან, თანამშრომლების დაბალი ხელფასები და ა.შ. ჩვენ დავინტერესდით, ახლა რა სიტუაციაა მუზეუმში, რაიმე ხომ არ შეიცვალა სასიკეთოდ ან პირიქით. მხარეთმცოდნეობის მუზეუმის დირექტორს და მის თანამშრომლებს მიაჩნიათ, რომ კულტურის გაერთიანების ცენტრი სრულიად უფუნქციოა და მისი შექმნა თავის დროზე შეცდომა იყო. ხაზგასასმელია, რომ მართლაც მაღალი ხელფასები აქვთ ცენტრის ადმინისტრაციაში, რაც მუზეუმის თანამშრომლების გაღიზიანებას იწვევს. მათ მიაჩნიათ, რომ ადმინისტრაციაში შტატები გაბერილია და მეტიც, საერთოდ არაფრის კეთებაში იღებს ხელფასს ზოგიერთი. აგერ უკვე რამდენი ხანია, ხუთი ათასი ლარის გამოყოფა ვერ მოხერხდა მხარეთმცოდნეობის მუზეუმისთვის, რათა მომზადებული წიგნი ,,ძველი ლანჩხუთი’’ გამოეცათ. მუზეუმის დირექტორის, ნონა იმნაძის თქმით, მათ ძალიან ეიმედებათ ახლადარჩეული მერის ალეკო სარიშვილის კეთილგონიერების. როგორც თანამშრომლები აცხადებენ, აუცილებელია მუზეუმის შემოღობვა, ფასადის გაკეთება და შემდგომ შიდა რემონტი. მეცნიერ -თანამშრომელი ლალი რამიშვილი აღნიშნავს, რომ სამუზეუმო-სამეცნიერო თემის სრულყოფილ მომზადებას და ასევე სამუზეუმო სასწავლო პროექტების განხორციელებას სჭირდება მივლინება, მუზეუმიდან გასვლა, ფინანსური ხარჯები და უფრო მეტი ყურადღება ცენტრის მხრიდან. მუზეუმის დირექტორი თვლის, რომ მხარეთმცოდნეობის მუზეუმი გამორჩეულია თავისი მრავალფეროვნებით, ექსპონატებით, დამთვალიერებლებით და ნამდვილად იმსახურებს მეტ ყურადღებას.
ნონა იმნაძე: ,, ჩემს თანამშრომლებს ასეთი მიზერული ხელფასები აქვთ, კულტურის ცენტრის გაერთიანებაში დასაქმებული ადამიანები ბევრად მეტ ხელფასს იღებენ,რაც ნამდვილი უსამართლობაა. უნდა მოხდეს სამართლიანად თანხის გადანაწილება. ამ დღეებში იყვნენ მოსული ცენტრის ინფრასტრუქტურის სამსახურიდან,აწარმოეს აზომვითი სამუშაოები მუზეუმის შენობის სარემონტოდ და იმედია დაწყებული საქმე ბოლომდე მივა. ჩვენ განსაკუთრებულს არაფერს არ ვითხოვთ, გვჭირდება ელემენტალური მხარდაჭერა, რათა მუზეუმმა იარსებოს და ამ მიზერული ხელფასების გაზრდა, რომ ვიარსებოთ. აქ ყველანი ჩვენი საქმის ერთგული ვართ, ვცდილობთ მაქსიმალურად დავიხარჯოთ და ხარისხიანად ვაკეთოთ ჩვენი საქმე. იმისთვის, რომ თანამშრომლებმა სრულყოფილად იმუშაონ, შედეგები აჩვენონ, საჭიროა მათი ხელშეწყობა. აუცილებლად უნდა დადგეს კულტურის ცენტრის რეორგანიზაციის საკითხი. გულწრფელად გეტყვით, ძალიან დიდი იმედი მაქვს ალექსანდრე სარიშვილის და მისი გუნდის. მჯერა, კულტურის სფეროში არსებულ ხარვეზებს მოაგვარებენ.’’
თორნიკე ჯიჯიეშვილი

მოიწონეთ სტატია