ვისთვის ჩინური და ვისთვის გასაგები ბიუჯეტი!

tot826889812723 6802512942783940939 n28 ნოემბერს, ლანჩხუთის მუნიციპალიტეტის საკრებულომ რიგგარეშე სხდომა გამართა. სხდომაზე განიხილებოდა ერთი საკითხი : „ლანჩხუთის მუნიციპალიტეტის 2017 წლის ბიუჯეტის დამტკიცების შესახებ“ ლანჩხუთის მუნიციპალიტეტის საკრებულოს 2016 წლის 28 დეკემბრის N30 დადგენილებაში ცვლილების შეტანის თობაზე“ ლანჩხუთის მუნიციპალიტეტის საკრებულოს დადგენილების დამტკიცების შესახებ!“- მომხსნებელი როლანდ ლაშხია. სანამ მომხსენებელი სიტყვით გამოვიდოდა, წინა სხდომის მსგავსად, ამირან გიგინეიშვიმა გააპროტესტა ბიუჯეტის წარდგენა როლანდ ლაშხიას მიერ. მისი თქმით: ,,დაირღვა საქართველოს ორგანული კანონი, ადგილობრივი თვითმმართველობის კოდექსი, როდესაც საკრებულოს სხდომაზე, ბიუჯეტის პროექტი ადმინისტრაციული წარმოების დასაწყებად, არაუფლებამოსილმა პირმა გამოიტანა. კერძოდ, კოდექსის თანახმად, მუნიციპალიტეტის მერი შეიმუშავებს და საკრებულოს დასამტკიცებლად წარუდგენს მუნიციპალიტეტის ბიუჯეტისა და ბიუჯეტში შესატანი ცვლილების პროექტებს; უზრუნველყოფს დამტკიცებული ბიუჯეტის შესრულებას თავისი უფლებამოსილების ფარგლებში; იმავე კოდექსისი თანახმად, მერს არა აქვს უფლება, მოახდინოს საკრებულოზე გასატანი საკითხის დელეგირება სხვა პირზე, თუ ეს საკითხი, საკრებულოს მიერ დამტკიცებას საჭიროებს.“ამირან გიგინეიშვილმა შესთავაზა უმრავლესობას, რომ ცვლილება შეეტანათ პროცედურულ საკითხებში, წინააღმდეგ შემთხვევაში სასამართლო გზით მოუწევს ამის გაკეთება. მას პასუხი გასცა ეთიკის კომისიის თავმჯდომარემ, ვერიკო კვირკველიამ. მისი თქმით, როლანდ ლაშხია ბიუჯეტის წარდგენას არ აკეთებს და ეს უბრალოდ შინაარსის მოყოლაა. ამის შემდეგ როლანდ ლაშხიამ მოხსენება გააკეთა:
,,მიმდინარე წლის 9 ნოემბერს დაგვეწერა N1373 წერილი ლანჩხუთის მუნიციპალიტეტის მერიის სოციალურ საკითხთა,განათლების,კულტურის,სპორტისა და ახალგაზრდულ საქმეთა სამსახურის ბიუჯეტის დამტკიცებულ ასიგნების ფარგლებში სამკურნალო და საოპერაციო ხარჯებით დახმარების პროგრამის 13186 ლარის შემცირების ხარჯზე, გაიზარდოს მრავალშვილიანი ოჯახების დახმარების პროგრამა 500 ლარით; ბიკარბონატული ჰემოდიალეზით-თირკმლის ქრონიკული უკმარისობით დაავადებულთა სამედიცინო დაწესებულებაში ტრანსპორტირების პროგრამა 6336 ლარით; სხვადასხვა ომებსა და კონფლიქტებში მონაწილე ვეტერანთა დახმარების პროგრამა 6350 ლარით; ასევე სხვადასხვა ომებსა და კონფლიქტებში მონაწილე ვეტერანთა დახმარების პროგრამის სხვა საქონელი და მომსახურების მუხლის 400 ლარით და სხვა ხარჯების მუხლის 500 ლარის შემცირების ხარჯზე გაიზარდოს სოც:უზრუნველყოფის მუხლი 900 ლარით; სამხედრო აღრიცხვისა და გაწვევის სამსახურის სხვა საქონელი და მომსახურების მუხლის 1012 ლარის შემცირების ხარჯზე გაიზარდოს შრომის ანაზღაურების მუხლი 1012 ლარით; წინა პერიოდში წარმოქმნილი ვალდებულებების დაფარვა და სასამართლოს გადაწყვეტილების აღსრულების ფინანსური უზრუნველყოფის 4000 ლარით შემცირების ხარჯზე გაიზარდოს: მუნიციპალიტეტის საკრებულოს სხვა ხარჯების მუხლი 1050 ლარით, მუნიციპალიტეტის გარე განათების ელექტროენერგიის ხარჯის არაფინასური აქტივების ზრდის მუხლი გაიზარდოს 450 ლარით და ქალაქის ტერიტორიაზე მუნიციპალური შენობა ნაგებობაში დახარჯული წყლის გადასახადის ოფისი მუხლი 2500 ლარით. საპროექტო დოკუმენტაციისა და სამშენებლო სამუშაოების ტექნიკური ზედამხედველობის მომსახურეობის შესყიდვა სხვა საქონელი და მომსახურების მუხლის 157353 ლარის ხარჯზე გაიზარდოს არაფინანსური აქტივების მუხლი 157353 ლარით. ლანჩხუთის მუნიციპალიტეტის საკრებულოს საქონელი და მომსახურების მუხლი 4000 ლარის შემცირების ხარჯზე გაიზარდოს საკრებულოს ტრანსპორტის მუხლი 4000 ლარით. მუნიციპალიტეტის მერიის საქონელი და მომსახურების მუხლის 3600 ლარის შემცირების ხარჯზე გაიზარდოს ტრანსპორტის მუხლი 3600 ლარით. მუნიციპალიტეტის მერიის სამხედრო აღრიცხვისა და მობილიზაცის სამსახურის საქონელი და მომსახურების მუხლი 900 ლარის შემცირდების ხარჯზე გაიზარდოს ტრანსპორტის მუხლი 900 ლარით.“
ამ მოხსენებას დიდი პროტესტი მოჰყვა ოპოზიციონერი დეპუტატის, კახა ასკურავას მხრიდან. ის დაინტერესდა, არის თუ არა ინფრასტრუქტურის სამსახურის მიერ ჩაბარებული ის ობიექტი, რომლის კომუნალურ გადასახადებსაც მუნიციპალიტეტი გადაიხდის, მაგრამ მისი მთავარი სამიზნე მოხსენების ის პუნქტი იყო, სადაც წერია, რომ ,,საპროექტო დოკუმენტაციისა და სამშენებლო სამუშაოების ტექნიკური ზედამხედველობის მომსახურეობის შესყიდვა სხვა საქონელი და მომსახურების მუხლის 157353 ლარის ხარჯზე გაიზარდოს არაფინანსური აქტივების მუხლი 157353 ლარით.“ ასკურავა ითხოვდა, რომ პასუხი გაეცათ, რატომ ხდება ამხელა თანხის გამოყოფა წლის მიწურულს. მას უთხრეს, რომ ხდება თანხის მუხლიდან-მუხლში გადანაცვლება და ეს თანხა აუცილებლად უნდა გამოიყოს განხორციელებული პროექტების ინსპექციისთვის. ასკურავას თქმით, მისთვის გაუგებარია, საერთოდ რას ნიშნავს რეგიონალური ტენდერი და რა მიზნებისთვის მიიმართება ასეთი დიდი თანხა. მისი სიტყვით გამოსვლის დროს, არ წყდებოდა სხვადასხვა სახის რეპლიკები უმრავლესობის დეპუტატების მხრიდან, ისინი მოუწოდებდნენ ასკურავას დამშვიდებულიყო და თავგამოდებით ამტკიცებდნენ, რომ მათთვის ყველაფერი გასაგები იყო. ამ დროს კახა ასკურავამ ერთ-ერთ დეპუტატს, ელისო ჭიჭინაძეს მიმართა:,,ელისო, დიდი ბოდიში, მაგრამ ეს თემა შენთვის ჩინურივითაა და მაცალე აზრის გამოხატვა“. თავის მხრივ, ელისო ჭიჭინაძემ ,,არ აპატია“ ოპოზიციონერ კოლეგას ასეთი მიმართვა და ეთიკის კომისიას სთხოვა, რომ ასკურავას ჭკუა ასწავლონ. ,,ძალიან გთხოვთ, რომ კახა ასკურავას მისამართით გაატაროთ შესაბამისი სანქციები, ეს არ არის პირველი გამოსვლა, სადაც ზრდილობის ფარგლებიდან გამოდის, თქვენ თუ არ გააკეთებთ ამას, მაშინ არსებობს ჭკუის სწავლების სხვა ხერხები“ - ცხარობდა ჭიჭინაძე. სანამ კახა ასკურავას გაშოლტავენ, ან დასჯის სხვა მეთოდს მიმართავენ, მანამდე სხდომის მიმდინარეობას დავუბრუნდეთ.
უმრავლესობის თქმით, მნიშვნელობა არა აქვს იმას, ჩაბარებულია თუ არა ობიექტი, კომუნალური გადასახადები აუცილებლად უნდა ანაზღაურდესო. ამ საკითხთან დაკავშირებით ზოგიერთი დეპუტატის მხრიდან სხვადასხვა სახის რეპლიკები ისმოდა, ისეთი რომელზე იტყვიან, რომ ,,ტყემალზეა და ბალს ჭამსო“. ნებისმიერ მოქალაქეს ამ სხდომის შემხედვარე გაუჩნდებოდა აზრი, რომ ზოგიერთისთვის დეპუტატის მანდატი სრულიად არაადეკვატურია და მათთვის საკრებულო ხელფასიან, გასართობ ადგილს წარმოადგენს.
რაც შეეხება სხვა ოპოზიციონერი დეპუტატების გამოსვლას: ლელა ჩახვაძეც დაინტერესდა იმ თანხის მიზნობრიობით და აუცილებლობით, რომელსაც მუნიციპალიტეტი გამოუყოფს 157 353 ლარის სახით ტექნიკურ ზედამხედველობას. ასევე, ჩახვაძემ აღნიშნა, რომ,, განსხვავებული აზრის, მტრის აზრს სულაც არ ნიშნავს და უნდა ისწავლონ პოლიტიკური დებატების მცნება. სოსო ჩხაიძე დაინტერესდა, ლანჩხუთის მერიის ინფრასტრუქტურის სამსახურს აქვს თუ არა უფლება, რომ ზედამხედველობა თვითონვე განახორციელონ, რაზეც უპასუხეს, რომ ამ ეტაპზე მათ ეს უფლება ჩამორთმეული აქვთ. ასევე ასკურავამ და ჩხაიძემ, ბოლოს მაინც ,,გამოტეხეს“ ინფრასტრუქურის სამსახურის უფროსი, რომ ობიექტი, რომლის კომუნალურ გადასახადებში 2500 ლარი მიდის, ჯერჯერობით ჩაბარებული არ არის, მთლიან ობიექტზეა აქ საუბარი.
საბოლოო ჯამში საკითხი მხარდაჭერილი იქნა უმრავლესობის მიერ.
თორნიკე ჯიჯიეშვილი

 

ახალი მოწვევის საკრებულოს პირველივე სხდომა კანონდარღვევით წარიმართა?!

amiran 834939470001465 6016157268020635662 nამირან გიგინეიშვილის თქმით ახალი მოწვევის საკრებულოს ფაქტიური პირველივე სხდომა კანონდარღვევით წარიმართა

24 ნოემბერს გაიმართა ლანჩხუთის მუნიციპალიტეტის საკრებულოს სხდომა. აღსანიშნავია, რომ სხდომა მინი-სკანდალით დაიწყო. საქმე იმაშია, რომ 2018 წლის მთავარი ფინანსური დოკუმენტის წარდგენა როლანდ ლაშხიამ აიღო თავის თავზე, რაც გააპროტესტა ოპოზიციონერმა დეპუტატმა ამირან გიგინეიშვილმა, რომელიც ამავდროულად ექსპერტია თვითმმართველობის საკითხებში და უკვე 10 წელია საქარველოს ყველა მუნიციპალიტეტში ტრენინგებს ატარებს ამ კუთხით. გიგინეიშვილმა ასევე გააპროტეტა ის ფაქტი, რომ მას, როგორც დეპუტატს დაგვიანებით ეცნობა საკრებულოს სხდომის ჩატარების შესახებ და არც დღის წესრიგი არ მისვლია: ,,როცა ადამიანს ქორწილში პატიჟებენ, მას ამის შესახებ რამდენიმე დღით ადრე ატყობინებენ, რათა მოემაზადოს და საორგანიზაციო საკითხებიც მოაგვაროს, მირეკავენ ორი დღით ადრე და მეუბნებიან პარასკევს საკრებულოს სხდომა იმართებაო, ხოლო რას განვიხილავთ აზრზეც არ ვარ, რადგან დღის წესრიგი არ მომსვლია“- განაცხადა ამირან გიგინეიშვილმა. მან პროტესტის ნიშნად დატოვა დარბაზი და სასამართლოს გზით დაანონსა იმის გარკვევა, მერს უნდა წარედგინა ფინანსური დოკუმენტი თუ როლანდ ლაშხიას. უკვე დარბაზიდან გასულ კოლეგას ყველაფერში დაეთანხმა კიდევ ერთი ოპოზიციონერი დეპუტატი კახა ასკურავა, რომლის თქმითაც, როლანდ ლაშხიას მიერ ბიუჯეტის წარმოების წარდეგენა, ორგანული კანონის დარღვევაა. ის ასევე დაინტერესდა, სრულდება თუ არა 2017 წლის ბიუჯეტი სრულყოფილად და კითხვები ამჯერად მერს დაუსვა. ალექსანდრე სარიშვილმა განაცხადა, რომ რამდენიმე სამსახურს მასზედ დაკისრებული გაუთვალისწინებელი ხარჯების გამო, ფინანსთა სამინისტრო დამატებით თანხებს გამოუყოფს. ასკურავა გაკვირვებული დარჩა იმ ფაქტით, რომ ასე წლის მილეურულს ხდება ამ საკითხების მოგვარება და არა, დავუშვათ, 4-5 თვით ადრე. ლანჩხუთელი პირველი ნაციონალის რამდენიმე რეპლიკას დარბაზში მცირეოდენი ხმაური მოჰყვა: ,,ვიცით, თუ რის გამო არ და ვერ დაინტერესდით ამ საკითხებით რამდენიმე თვით ადრე, თქვენ მაშინ არ გეცალათ და დაკავებული იყავით წინასაარჩვნო კამპანიით, ამომრჩევლების მოსყიდვით და შანტაჟით“- განაცხადა ასკურავამ. ამის შემდეგ, უმრავლესობის რამდენიმე წევრი მივიდა მიკროფონთან და ოპოზიციონერ დეპუტატს კორექტულობისკენ მოუწოდა. ,,ადამიანურად ძალიან დიდ პატივს გცემთ, მაგრამ ვფიქრობ თქვენი გამოსვლა დღეს არ იყო სწორი“- მიმართა გიორგი ჩახვაძემ ლანჩხუთის ყოფილ გამგებელს. თითქმის იდენტური იყო ოცნების სხვა დეპუტატების გამოსვლები ამ საკითხთან დაკავშირებით. კახა ასკურავამ უმრავლესობას პასუხი გასცა და თქვა, რომ რაც განაცხადა სიმართლეა და მის გამოსვლაში არაკორექტული არაფერი არ ყოფილა.
ამის შემდეგ საკრებულომ კომისიის თავმჯდომარეების წარდგინებით მიიღო განკარგულება კომისიების შემადგენლობის დამტკიცების შესახებ.
კომისიების შემადგენლობა შემდეგნაირად დაკომპლექტდა:
სამანადატო, საპროცედურო, იურიდიულ საკითხთა და ეთიკის კომისია: ვერიკო კვირკველია (კომისიის თავმჯდომარე), კახა ბოლქვაძე, გოდერძი ქურიძე, კახაბერ ასკურავა.

საფინანსო-საბიუჯეტო კომისია: ალექსანდრე მახათაძე (კომისიის თავმჯდომარე), თორნიკე ტიკაძე, გიორგი ჩახვაძე, იოსებ ჩხაიძე, ამირან გიგინეიშვილი, დავით ჩხარტიშვილი, ემზარ თევდორაძე, აკაკი იმნაიშვილი, ზურაბ კუკულავა.

სივრცით-ტერიტორიული დაგეგმარებისა და ინფრასტრუქტურის კომისია - გიორგი გვარჯალაძე (კომისიის თავმჯდომარე), ცისანა ურუშაძე, კახა ბოლქვაძე, ბესიკ კუპრაძე, ოთარ პატიეშვილი, სპარტაკ კვაჭაძე, ლელა ჩახვაძე, ზაზა წულაძე, რეზო კვაჭაძე , კახა თედორაძე, იოსებ ჩხაიძე, ემზარ თევდორაძე, ამირან ქანთარია, აკაკი იმნაიშვილი, ელისო ჭიჭინაძე.

სოციალურ საკითხთა, განათლების, კულტურისა და ახალგაზრდულ საქმეთა კომისია : ელისო ჭიჭინაძე (კომისიის თავმჯდომარე), რევაზ კვერენჩხილაძე, კარლო კვიტაიშვილი, ამირან ქანთარია, გოდერძი ქურიძე, კახა თედორაძე, რეზო კვაჭაძე, გიორგი გვარჯალაძე, ბესიკ კუპრაძე, ზაალ სანაძე, ამირან გიგინეიშვილი.

ეკონომიკის, ქონების მართვისა და ბუნებრივი რესურესბის საკითხთა კომისია: გიორგი ჩახვაძე (კომისიის თავმჯდომარე), ზაზა წულაძე, კარლო კვიტაიშვილი, ალექსანდრე მახათაძე, ზაალ სანაძე, თორნიკე ტიკაძე , ოთარ პატიეშვილი , ზურაბ კუკულავა.

საკითხებზე, რომლებიც კომისიების დებულების დამტკიცებას შეეხება, საკრებულომ ადმინისტრაციული წარმოება დაიწყო.
საკრებულომ ადმინისტრაციული წარმოება დაიწყო საკითხზე, „ლანჩხუთის მუნიციპალიტეტის საკრებულოს 2018 წლის ბიუჯეტის დამტკიცების შესახებ“ .
ბიუჯეტის პროექტი საკრებულოს გამგეობის საფინანსო-საბიუჯეტო და მუნიციპალური შესყიდვების სამსახურის უფროსმა, როლანდ ლაშხიამ წარუდგინა. პროექტის მიხედვით, 2018 წლის ბიუჯეტი 8 628 700 ლარით განისაზღვრა. მომხსენებელმა მთავარი ფინანსური დოკუმენტის ძირითად პარამეტრებზე გაამხვილა ყურადღება. გაიმართა ტრადიციული ,,სხვადასხვა“, სადაც ძირითადად, ბაღებში არსებულ პრობლემებზე ისაუბრეს, მაშინ როდესაც, ბოლო წლების მანძილზე დავით წულაძის გაერთიანებას ყველა ქება-დიდებას ასხამდა.

სხდომის დამთავრების შემდეგ, ,,ჰო და არამ“ გადაწყვიტა ინტერვიუ ჩაგვეწერა ამირან გიგინეიშვილისთვის, რომელსაც ქვემოთ გთავაზობთ:

რამ გამოიწვია თქვენი აღშფოთება, თქვენ პროცედურების დაწყებამდე , სიტყვით გამოსვლის შემდეგ დატოვეთ დარბაზი...

-ახალი მოწვევის საკრებულოს ფაქტიური პირველივე სხდომა კანონდარღვევით წარიმართა. დაირღვა საქართველოს ორგანული კანონი, ადგილობრივი თვითმმართველობის კოდექსი, როდესაც საკრებულოს სხდომაზე, ბიუჯეტის პროექტი ადმინისტრაციული წარმოების დასაწყებად, არაუფლებამოსილმა პირმა გამოიტანა. კერძოდ, კოდექსის თანახმად, მუნიციპალიტეტის მერი შეიმუშავებს და საკრებულოს დასამტკიცებლად წარუდგენს მუნიციპალიტეტის ბიუჯეტისა და ბიუჯეტში შესატანი ცვლილების პროექტებს; უზრუნველყოფს დამტკიცებული ბიუჯეტის შესრულებას თავისი უფლებამოსილების ფარგლებში; იმავე კოდექსისი თანახმად, მერს არა აქვს უფლება, მოახდინოს საკრებულოზე გასატანი საკითხის დელეგირება სხვა პირზე, თუ ეს საკითხი, საკრებულოს მიერ დამტკიცებას საჭიროებს. არადა, 2018 წლის ბიუჯეტის პროექტზე ადმინისტრაციული წარმოების დაწყება, სწორედაც რომ დამტკიცებას საჭიროებს საკრებულოს მიერ. აქედან გამომდინარე, როლანდ ლაშხიას მიერ ბიუჯეტის პროექტის წარმოდგენა პირდაპირ ეწინააღმდეგება თვითმმართველობის კოდექსს. როცა ამის შესახებ განვაცხადე, საკრებულოს თავმჯდომარემ მადლობა გადამიხადა და ეს საკითხი კენჭისყრაზე დააყენა, რაც კანონდარღვევაა. სრულიად უცერემონიოდ გაგრძელდა სხდომის მიმდინარეობა, რაც ეჭვს ბადებს, რომ საკრებულოს თავმჯდომარე და მისი მოადგილეც არაკომპეტენტურები არიან პროცედურულ საკითხებში. საკრებულოს თავმჯდომარეს ამაში უმრავლესობამაც აუბა მხარი. ახალმა საკრებულომ თავისი საქმიანობა კანონდარღვევით დაიწყო.

როოლანდ ლაშხიამ გაკვირვება გამოთქვა იმის გამო, რომ თქვენ ამხელა პროტესტი გამოხატეთ, მისი თქმით ეს არ იყო ბიუჯეტის წარდგენა და უბრალო მოსამზადებელ პერიოდს გადიოდნენ.
-ადგილობრივი თვითმმართველობის კოდექსი და ზოგადი ადმინისტრაციუკო კოდექსი არ ცნობენ ისეთ ტერმინებს, როგორიცაა ,,მოსამზადებელი პერიოდის გავლა“. ეს როლანდ ლაშხიამ კარგად იცის. ბიუჯეტთან დაკავშირებულ ნებისმიერ საკითხზე კოლეგიალურ ორგანოსთან ურთიერთობა უნდა ჰქონდეს მხოლოდ მერს და სხვას არავის, ეს ეხება როგორც ადმინისტრაციული წარმოების პერიოდს, ასევე ბიუჯეტის დამტკიცებას.
საკრებულოს სხდომის დასრულებისთანავე, გაიმართა საფინანსო-საბიუჯეტო კომისიის სხდომა ალექსანდრე მახათაძის ხელმძღვანელობით. კომისიამ , ბიუჯეტი უკან გაიწვია, მისი არასრულყოფილების და რიგი შეცდომების გამო.
თორნიკე ჯიჯიეშვილი

ბესიკ ტაბიძეს საკრებულოს უმრავლესობამ თითი დაუქნია!

TABIDZE4 3795192461404877965 nახალი მოწვევის საკრებულომ პირველი სხდომა გამართა, სადაც აირჩიეს თავმჯდომარე, მოადგილე და კომისიების თავმჯდომარეები. როგორც წესი და რიგია, ახალი საკრებულო ლანჩხუთის საოლქო კომისიის თავმჯდომარემ გახსნა. ხოლო შემდეგ სხდომა უხუცესმა წევრმა ამირან ქანთარიამ წაიყვანა. თავდაპირველად აირჩიეს დროებითი სამანდატო და ხმის დამთვლელი კომისიები 3-3 დეპუტატის შემადგენლობით. სამანდატო კომისიაში აირჩიეს ლელა ჩახვაძე პტრიოტთა ალიანსიდან, ციცო ურუშაძე და დავით ჩხარტიშვილი მმართველი პარტიიდან. ხოლო ხმის დამთვლელი კომისიის წევრებად ვერიკო კვირკველია, გიგი გვარჯალაძე და აკაკი იმნაიშვილი აირჩიეს, სამივე ოცნებიდან. ,,ევროპული საქართველო“ და ,,ნაციონალური მოძრაობა“ კენჭისყრაში მონაწილეობას არ იღებდა. ამ ოპოზიციურმა პარტიებმა უარი განაცხადეს არჩევნებში მონაწილეობის მიღებაზე.



უმრავლესობის რამდენიმე წევრმა საკრებულოს თავმჯდომარეობის პოსტზე ბესიკ ტაბიძის კანდიდატურა დაასახელა. სხვა კანდიდატურა არ წამოყენებულა და შესაბამისად კენჭი უყარეს ტაბიძის საკრებულოს თავმჯდომარედ არჩევა-არაჩევას. სხდომას არ ესწრებოდა აცანის დეპუტატი ემზარ თევდორაძე, ასე რომ კენჭისყრაში მონაწილეობას იღებდა სულ 27 დეპუტატი, მათგან 26 ოცნების წარმომადგენელი, ხოლო ერთი პატრიოტთა ალიანსიდან ლელა ჩახვაძე. როდესაც ხმის დამთვლელმა კომისიამ ბიულეტინების დათვლა დაიწყო, ბესიკ ტაბიძეს აღელვება დაეტყო, რადგან შეატყო ხმები ნაწილდებოდა. საბოლოოდ 27 დეპუტატიდან 18-მა ხმა ბესიკ ტაბიძეს მისცა, რვა წინააღმდეგი წავიდა, ხოლო ერთი ბიულეტინი ბათილად სცნეს. ტაბიძე ხმათა უმრავლესობით საკრებულოს თავმჯდომარე გახდა. ახლადარჩეულმა თვმჯდომარემ მადლობა გადაუხადა დეპუტატებს ნდობისთვის, ასევე აღნიშნა, რომ იმ დეპუტატებს, რომლებმაც მხარი არ დაუჭირეს, საქმით დაუმტკიცებს რომ შეცდნენ. რა მოხდა სინამდვილეში? როგორც ამბობენ ილა კეჭაყმაძის მხარდაჭერით დაიმედებულ ტაბიძეს იმედი ჰქონდა, რომ უპრობლემოდ გახდებოდა თვმჯდომარე. უმრავლესობას წინასწარ ჰქონდა გავლილი კონსულტაციები, თუ ვის უნდა მიეცა ხმა და ვის არა. გამომდინარე იქედან, რომ ლელა ჩახვაძის ხმას ვერ ენდობოდნენ, გადაწყვიტეს, რომ 17 დეპუტატს მხარი დაეჭირა ტაბიძისთვის და ამით ცენტრალური ოფისის რისხვა აეცილებინათ თავიდან, მაგრამ ამავდროულად დაენახვებინათ ტაბიძისთვის და კეჭაყმაძისთვის, რომ ისინი ემიჯნებოდნენ ნიგვზიანის დეპუტატის კანდიდატურას. აშკარაა, ამ მოწვევის საკრებულოს უმრავლესობას სხვა დეპუტატი სურდა თვმჯდომარედ, მაგრამ ვერ გაექცნენ უფროსობის მოთხოვნას. ამის ნათელი დადასტურებაა ის, რომ საკრებულოს თავმჯდომარის მოადგილედ, 27 დეპუტატიდან 26 -მა ვლადიმერ ნანაძე შემოხაზა. ბოლო დღეებში აქტიურად განიხილებოდა მხოლოდ ორი კანდიდატურა თავმჯდომარეობაზე ნანაძე და ტაბიძე. კენჭისყრის შედეგებით უმრავლესობამ ტაბიძეს თითი დაუქნია და უთხრა, ნანაძე ჩვენთვის გაცილებით მისაღები კანდიდატი იყო, მაგრამ პარტიის მოთხოვნებს დავემორჩილეთო. ამით ახალმა უმრავლესობამ ორი რამ თქვა, ერთი ის, რომ ცხვრებივით ვერ მართავს მათ ტაბიძე და მეორე, კომუნისტური წყობა არ გვაქვს და თავისუფალი აზრი გაგვაჩნიაო. ბევრის აზრით, ეს ცუდი პრეცენდენტია და ოცნებამ აჩვენა, რომ ერთი გუნდი არაა. ბესიკ ტაბიძე მთელი დარჩენილი სხდომის მანძილზე ვერ მალავდა თავის უგანწყობილებას და თავს უკმაყოფილოდ აქნევდა.
თავმჯდომარის და მოადგილის არჩევის შემდეგ, კომისიის თავმჯომარებიის არჩვას უყარეს კენჭი. სამანდატო- საპროცედურო, იურიდიულ საკითხთა და ეთიკის კომისიას ვერიკო კვირკველია უხელმძღანელებს. დეპუტატი, რომელიც რეალური კანდიდატი იყო საკრებულოს თავმჯდომარეობის.
საფინანსო- საბიუჯეტო კომმისიას ალექსანდრე მახათაძე უხელმძღვანელებს. დეპუტატი, რომელიც ლანჩხუთის მერის უახლოეს გარემოცვაში შედის.
სოციალურ საკითხთა, განათლების, კულტურისა და ახალგაზრდულ საქმეთა კომისიის თავმჯდომარე ელისო ჭიჭინაძე გახდა. ექიმმა დეპუტატმა დიდი პასუხისმგებლობა აიღო საკუთარ თავზე, გამომდინარე იქედან რომ, ის სამედიცინო სფეროშიც აქტიურად მოღვაწეობს.
ეკონომიკის, ქონების მართვისა და ბუნებრივი რესურსების საკითხთა კომისიას კვლავინდებურად გიორგი ჩახვაძე უხელმძღვანელებს. გიორგი ჩახვაძეც, მახათაძის მსგავსად ალექსანდრე სარიშვილის უახლოესი მეგობარია.
სივრცით-ტერიტორიული დაგეგმარებისა და ინფრასტრუქტურის კომისიის თავმჯდომარედ გიგი გვარჯალაძე აირჩიეს. როგორც ამბობენ, გვარჯალაძე ამ სფეროში ერკვევა.
სხდომაზე ,,ქართული ოცნება-დემოკრატიული საქართველოს“ ფრაქციის შექმნის თაობაზე ინფორმაცია ცნობად იქნა მიღებული. საკრებულოს წევრებმა ფრაქციის თავმჯდომარედ ბესიკ კუპრაძე აირჩიეს.
ლანჩხუთის მუნიციპალიტეტის საკრებულოში თანამდებობები გარკვეულია.
,,წილი ნაყარია, რუბიკონი გადალახულია“! ვნახოთ თუ გადალახავს ეს საკრებულო რუბიკონს.
თორნიკე ჯიჯიეშვილი

როგორი ურთიერთობა ექნება საკრებულოს და მერიას?

ALEKOO 1626627894389970535 nროგორც მოგეხსენებათ, ახლადარჩეული მერი ალექსანდრე სარიშვილი წინა მოწვევის დეპუტატი იყო, მას ურთიერთოებები ჩამოუყალიბდა კოლეგებთან, რომლებიც ამ მოწვევის საკრებულოშიც მრავლად არიან. ასევე, სარიშვილს ახლადგამომცხვარ დეპუტატებთანაც კარგი ურთიერობა აქვს, სავარაუდოდ მერს არ გაუჭირდება საკანონმდებლო ორგანოსთან თანამშრომლობა, ის კი არა, ამბობენ 32 დეპუტატიდან მინიმუმ 20-ის იმედი უნდა ჰქონდესო. ადრე ყველაფერი სხვანაირად იყო, ზაზა ურუშაძის გუნდი და საკრებულო ვერაფრით ეწყობოდნენ , მაგრამ ეს საგაზეთოდ, ისე ერთმანეთის გადაწყვეტილებებს უპრობლემოდ აპრავებდნენ. ახლა არც ზაზა ურუშაძეა მერი და არც გოგი ხელაძე საკრებულოს თავმჯდომარე, მეტიც, დიდი შანსია ურუშაძეც და ხელაძეც სამსახურების გარეშე დარჩნენ. მართალია ზაზა ურუშაძე იმუქრება ანტიკორუფციულ სამსახურში მივდივარო და თავის მხრივ გოგი ხელაძეც არ დაკლებია წინასაარჩევნო შეხვედრებს, მაგრამ ფაქტია მათ რეალურს არაფერს სთავაზობენ. ალექსანდრე სარიშვილის მოადგილედ კარგა ხანია განიხილება გოგი ფაცურიას კანდიდატურა, თუ ეს ასე მოხდა, მაშინ უფრო მეტი საფუძველი გვაქვს ვთქვათ, რომ მერიასა და საკრებულოს შორის ურთიერთობები დიპლომატიური გახდება. თითქმის გადაწყვეტილია, რომ ადმინისტრაციის ასამსახურის ხელმძღვანელის პოსტს კვლავ მაგული კუნჭულია დაიკავებს. თავის მხრივ ქალბატონ მაგულისაც არაფერი საწინააღმდეგოო არა აქვს ახალი საკრებულოსი. რაც შეეხება მერიის სხვა სამსახურებს, ნაკლებ სავარაუდოა მათი აზრი ვინმემ გაითვალისწინოს. კოორდინირებული მუშაობა რომ ეფექტს მოიტანს, ამაზე ყველა თანხმდება. ახლა საკითხავია ზაზა ურუშაძის გუნდიდან ვის დატოვებს და ვის გაუშვებს სარიშვილი, ცვლილებები რომ იქნება, ამას ახალი მერი ადასტურებს. თუმცა ლანჩხუთის პოლიტიკა ყოველთვის გამოირჩეოდა ყვარყვარე თუთაბერის განსაკუთრებული სიყვარულით, ვინც გუშინ ურუშაძის მარჯვენა ხელი იყო, დღეს სარიშვილს ძმობას შეჰფიცებს. თუ ახალი მერიაც ნეპოტიზმის ხაზით წავა, მაშინ მუნიციპალიტეტი იმაზე უარეს შედეგს მიიღებს, რაც გასულ წლებში ჰქონდა. არ უნდა დაგვავიწყდეს ერთი რამ, ის რაზეც მაცაცო ბურჭულაძე საუბრობდა წინა საკრებულოს ბოლო სხდომაზე: ,,ახალ მერს და საკრებულოს უმრავლესობას მძიმე მემკვიდრეობა ხვდათ წილად, მაგრამ ნუ დაგავიწყდებათ, იმ პროცესებში თქვენც მიგიძღვით წვლილი და არც ისე პატარა“. დიახ, ნურავინ აირიდებს ძველ ცოდვებზე პასუხისმგებლობას, მარტო წინასაარჩევნოდ აღნიშნავდა ყველა, რომ თურმე ,,პატარ-პატარა“ შეცდომები ჰქონდათ. საკრებულოც და მერიაც მუშაობას ახლა იწყებს, ვნახოთ როგორ განვითარდება მოვლენები
თორნიკე ჯიჯიეშვილი

 

18 ხმით ბესიკ ტაბიძე საკრებულოს თავმჯდომარეა!

23593357 831417917020287 6485357205425736432 oყველასთვის მოულოდნელად ბესიკ ტაბიძემ ბეწვის ხიდზე გაიარა. 32 დეპუტატიდან 5 არ იღებდა მონაწილეობას. 18 დეპუტატმა ტაბიძის თავმჯდომარეობას დაუჭირა მხარი, 8 დეპუტატმა არ გააკეთა არჩევანი და არ შემოხაზა არაფერი, ხოლო ერთი ბიულეტინი ბათილად სცნეს. ასე და ამგვარად ბესიკ ტაბიძე საკრებულოს თავმჯდომარე გახდა!

მოიწონეთ სტატია