სვანიძეების ოჯახის გასაჭირი

kaci888სოფელ ნინოშვილში მცხოვრები სვანიძეების ოჯახი მძიმე და ამავდროულად უცნაურ სიტუაციაში იმყოფება. უცნაურში იმიტომ, რომ ალბათ ასეთი რამ მხოლოდ საქართველოში თუ შეიძლება მოხდეს. ოჯახი მრავალსულიანია, მოხუც ცოლ-ქმარს, ვალერიან სვანიძეს და რიმა ჩხარტიშვილს იმთავითვე მძიმე ხვედრი არგუნა განგებამ, მათ ერთი შვილი გარდაცვლილი ჰყავთ, ჯანღონით სავსე ახალგაზრდა კაცი 2000 წელს, ჯარში შემთხვევით გასროლილმა ტყვიამ იმსხვერპლა. მათ დარჩათ კიდევ ერთი ვაჟი, გია სვანიძე, რომელსაც დიაბეტი აწუხებს. გია დაოჯახებულია, ჰყავს მეუღლე და სამი შვილი. სამწუხაროდ ერთ-ერთ შვილს, საბა სვანიძეს ასევე დიაბეტი აღმოუჩნდა ოთხი წლის წინ. საბას ყოველ სამ თვეში ერთხელ თბილისში კონსულტაცია სჭირდება, რომელიც დაახლოებით 400 ლარამდე ჯდება. როგორც ბავშვის მშობლები ამბობენ, ექიმი გაოგნებულია, ეკითხება მათ საიდან არიან, რვა წლის ბავშვს, რომელსაც დიაბეტი აქვს, მთავრობა როგორ არ ეხმარებაო. ოჯახს თავდაპირველად ეძლეოდა სოციალური დახმარება, თუმცა იმის გამო, რომ გია სვანიძემ ბათუმში დაიწყო მუშაობა და ამის შესახებ არ განაცხადეს სოციალურ სამსახურში, ეს დახმარება შეუწყდათ.


სვანიძეებმა აღიარეს უნებლიეთ დაშვებული შეცდომა და მიმართეს შესაბამის სამსახურებს თხოვნით, რომ ჯანმრთელობის დაზღევა მაინც აღედგინათ, ოჯახის წევრების ჯანმრთელობის უმძიმესი მდგომარეობიდან გამომდინარე. ვინაიდან გია სვანიძე წასული იყო სამუშაოდ ბათუმში, ის ამოეწერა ოჯახის წევრობიდან, რათა ამ გარემოებას ხელი არ შეეშალა სოციალური პაკეტის აღდგენაში. ოჯახს მართლაც აღუდგა სოციალური დახმარება, მაგრამ სამი თვის შემდეგ ისევ შეუწყდათ ეს სტატუსი. მიზეზი კი ვალერიან სვანიძის 80 წლის ლოგინად ჩავარდნილი ბიძაშვილი ლამარა სვანიძე გახდა. საქმე იმაშია, რომ ეს ქალბატონი ფოთში, ძმისშვილთან ერთად ცხოვრობდა, სარგებლობდა სოციალური პაკეტით. ზამთრობით, ვალერიან სვანიძის ოჯახი მოხუც ნათესავს თავისთან ინახავდა, მაგრამ მოხდა ისე, რომ ზამთარს წელიწადის სხვა დროებიც დაემატა, ანუ ლამარა სვანიძის ძმისშვილმა უარი განაცხადა მამიდის მოვლა–პატრონობაზე და ისედაც მძიმე მდგომარეობაში მყოფ მრავალსულიან ოჯახს შეატოვა ხელში. ამ ფაქტმა გამოიწვია ის, რომ სოციალური შემწეობის პაკეტი მოეხსნა არამარტო ლამარა სვანიძეს, არამედ მთლიანად მის მასპინძელ ოჯახს, რადგან ახალი წევრის შემატების შესახებ არ აცნობეს შესაბამის სამსახურს. ლამარა სვანიძე მიჯაჭვულია საწოლს, ის დამოუკიდებლად საკვებსაც ვერ იღებს, თავისი პენსია მედიკამენტებშიც არ ჰყოფნის. ყველაზე მძიმე მდგომარეობაში ოჯახის უფროსიqali33 ვალერიან სვანიძეა, მას ყოველკვირეულად 50 ლარის მედიკამენტები სჭირდება, შვილმკვდარ მამას ახლა ავთვისებიანმა სიმსივნემ შეუტია, დაუნიშნეს 7000 ლარიანი დასხივების კურსები, პენსიონერის დაზღვევა მნიშვნელოვნად ეხმარება, მაგრამ თავიანთი გადასახდელი 1000 ლარიც ვერ იშოვეს. ბატონი ვალერიანი შვიდი წელია უმძიმესი დაავადებით იტანჯება. გასული წლის ოქტომბრის საპარლამენტო არჩვნებამდე რამდენიმე დღით ადრე, მათთან სახლში სტუმრად ლანჩხუთისა და ჩოხატაურის მაჟორიტარი ნინო წილოსანი იმყოფებოდა. მას გააცნეს ოჯახის მდგომარეობა, წილოსანის განცხადებით, იმ ეტაპზე სვანიძეების ოჯახისთვის დახმარება მას ჩაეთვლებოდა ამომრჩევლის მოსყიდვაში, ასე რომ, დაჰპირდა მათ არჩევნების დასრულებისთანავე დახმარებას. ისინი ენდნენ ამ დაპირებას და ხმაც ,,კოალიციას“ მისცეს. როგორც სვანიძეები აცხადებენ, ამის შემდეგ მათ არავიან შეხმიანებიათ და მითუმეტეს არ დახმარებიათ. ოჯახის წევრების ჯანმრთელობის მდგომარეობის გაუარესების გამო, ისინი იძულებულნი შეიქნენ ივნისის თვეში კვლავ შეეწუხებინათ დეპუტატი და მისი ადგილობრივი ბიურო, ამჯერად მათ პირდაპირ განუცხადეს, რომ მათ მიერ წარმოდგენილი ფორმა ასების მიხედვით არანაირ დახმარებას არ იმსახურებდნენ და ვერაფრით დაეხმარებოდნენ.
ნანახი და მოსმენილი მართლაც მძიმე აღმოჩნდა ჩვენთვის, ეს ოჯახი არ ითხოვს საკვებს, ან ტანისამოსს. მათ სიცოცხლეს სერიოზული საფრთხე ემუქრება, ამაზე პასუხისმგებელი კი პირველ რიგში ის ხალხია, ვისაც არჩევნებში მისცეს ხმა. ეს არის წარმოუდგენელად მძიმე ამბავი, მძიმე ავადმყოფ ბაბუას - შვილს – შვილიშვილს და ლოგინად ჩავარდნილ, შეკედლებულ, უმწეო მოხუცს არც სოციალური დახმარება აქვთ და არც ჯანმრთელობის სადაზღვევო ბარათი.
თორნიკე ჯიჯიეშვილი

მოიწონეთ სტატია